شباب الجامعة : صباحي فقد شعبيته بعد الانتخابات الرئاسية الماضية ..والسيسي يكتسح

يعد الشباب هم اساس المجتمع ودليل توجية بوصلته ومع ابتداء ماراثون الانتخابات الرئاسية كان لابد من استطلاع اراء الشباب حول المرشحين لخوض الانتخابات وتولي منصب الرئاسة خاصة بعد ان كشف الاستفتاء علي الدستور عزوف الشباب عن المشاركة السياسية , وما بين صباحي والسيسي اختلفت الاراء بين مؤيد و معارض من شباب الجامعات فمنهم من أكد ارتفاع شعبية الاخير علي حساب خسارة الاول شعبيته وارضية كبيرة بعد تواجده مع الاخوان فقالت دينا احمد طالبة بكلية الحقوق ل"صوت الأمة " انا بالنسبالى اى مرشح مدنى هو اللى يستحق انه يحكم الفترة القادمة , سواء حمدين اوغيره انا ضد انتخاب اي شخص عسكرى لان لان البلد محتاجه شخصية مدنية قادرة علي تفهم مطالب الشعب .
فيما قال "حسنين محمد " طالب بكلية الحقوق أولا "لازم يكون عنده برنامج يتحقق مش برنامج يكون مجرد دعاية انتخابية وبس , وبعد الانتخابات وفوزه بالمنصب ينتهي كل شي " مضيفا أن الدولة في اقصي حالات الضعف ولا يجب التهاون مع اي مرشح سواء مدني او عسكري علي الجميع الارتفاع باحوال المواطنين .
فيما اختلفت "ايناس محمد " طالبة بكلية الاداب معهم في الرأي قائلة " أن حمدين فقد مصداقية كبيرة بسبب موقفه فى الانتخابات السابقة موقفي الشخصي مقاطعة الانتخابات القادمة لانها كاسبقها تمثيلية مش لازم لشباب يشارك فيها "
وقال حلمى الخياط طالب باداب اعلام أن ترشح حمدين صباحى لى جانب ايجابى واخر سلبى السلبية ان الموضوع تقريبا محسوم لمرشح الدولة , اما الجانب الايجابى ان فى مشهد ديمقراطى على الساحة احسن من الفترة اللى فاتت بين اختيار مرسى او شفيق وهيبقى عندنا امل في التغيير .
وطالبت منة احمد كلية الحقوق حمدين صباحى بالثبات وخوض الانتخابات ولا يستمع للاراء التي تطالبه بالانسحاب لصالح المشير السيسي قائلة "ومينفعش يبقى قدامه دا مش ديمقراطية , انا رشحت حمدين فى الانتخابات السابقة بس انا مدعمة للسيسى دلوقتى بس كمان عايز جو من الديمقراطية "
فيما قالت "ياسمين صلاح " كلية الحقوق "انا شايفة لو حد عسكرى يحكم هيبقى افضل لان هيبقى عنده خبرة اكتر ودراية كاملة بكل مشاكل البلد واحنا جربنا الرئيس المدني والنهاية ان غرق البلد "
واعتبرت "ساندى عادل " كلية علوم أن حمدين صباحى شخص متفهم لاحوال البلاد ولكن الافضل للبلد حاليا المشير "السيسى " والشعب كله تقريبا متفق عليا والفترة دى محتاجة حد يوحدنا .
واوضح " اندرو نصرى " حقوق انجليزى انه" كويس ان حمدين هيترشح بس مش يقدر يعمل حاجة امام ترشح السيسى لان شعبيته كبيرة , بس ممكن ناس كتير هيتنخبه بس اغلبية الشعب هترشح السيسي وبالتالي يوسع نطاق الديمقراطية وانا بحترم حمدين كشخصيه لكن علي مستوي القيادة مقدمش حاجة للبلد "
وقالت خلود محمد اداب اعلام "حمدين صباحى من الصعب انه يفوز بالانتخابات خصوصا لو اترشح السيسى لانه فقد مصدقيته ومبقاش عنده شعبية زى الانتخابات اللى فاتت وهو مصر انه يرشح نفسه , وانا عن نفسى رشحته الانتخابات السابقة بس مش هديله صوتي فى الانتخابات القادمة "
وعن البرنامج الانتخابي للمرشحين قالت "صفاء حسين " كلية الاداب كل المرشحين لم يظهر لهم برنامج واضح وبعدين المشير السيسي بيتكلم مع الناس بالعواطف اكتر من انه بيتكلم عن برنامجه الانتخابى