أحمد عفيفي يكتب: دموع « مصرية » في صندوق زبالة !!

هى خريجة فنون جميلة .. وسيدة محترمة .. متزوجة وعندها ثلاثة أبناء .. تعيش في مدينة نصر ..التي أصبحت مسرحا كل جمعة لعمليات إرهابية وتجمعات إخوانية .. مهمومة بالشأن العام في مصر .. فرحت جدا بثورة 25 يناير ونزلت في ثورة 30 يونيو .. وقالت يارب .. يارب افرجها بقى .. احنا كلنا تعبنا .. ونفسنا في شوية راحة ، ونشوف البلد دي بتطلع لقدام .. شافت فيلم " خليك فاكر " اللي عملته ساندرا نشأت ، فتحمست جامد ونزلت تقول نعم للدستور .. ورجعت بيتها ، ومن اا فبراير 2011 لحد اللحظة دي .. وهى منتظرة حاجة تحصل تشوف منها ضوء أمل ولو بسيط ان بكره احسن من امبارح ومن النهارده.
قالت لي : انا قلقانة جدا ومش مطمنة ..
سألتها : ليه .. الببلاوي مشي .. والانتخابات الرئاسية قبل البرلمانية .. وحمدين اعلن ترشحه والسيسي في الطريق .. ليه بقى خايفة وقلقانة؟
قالت : فيه حاجة غلط ومش واضحة ومش قادرة افهمها
قلت : ايه هى؟
قالت : ما انا بقولك حاجة مش واضحة .. مش قادرة احط ايدي عليها .. بس مش مرتاحة
قلت : اختيار محلب لرئاسة الوزارة عامل لك قلق؟
ردت : لأ .. بالعكس .. يمكن فعلا يكون حماسه ده على حق ويقدر يعمل حاجة
قلت : السيسي حسب كلام عمرو موسى حيعلن ترشحه خلال 10 ايام .. يعني الأمور ماشية
ردت : انت شايفها كده ماشية؟
قلت : يعني .. على رأى المثل .. خليك ورا الكداب لحد باب الدار.
قالت : بس الكدابين كتروا اوي .. حنجري لحد باب الدار ورا مين ولا مين .. وتفتكر احنا لسه عندنا وقت .. الناس روحها بقت في مناخيرها .. لايهمها السيسي يجي ولا يروح .. ولا يهمها كلام حمدين صباحي .. ولا يعنيها ان الببلاوي مشى ومحلب جه .. ولا مرسي يصرخ ورا القفص الزجاجي : انا عتريس انا عتريس .. استاذ احمد .. انت قاعد في الكويت وبتنزل شهر في السنة .. اكيد بتحاول تقضي اجازة سعيدة مع ولادك .. فمشفتش الناس في الحارات والعشوائيات عايشين ازاى .. مفتكرش انك عدّيت في اجازتك على مستشفى حكومي وشفت الغلابة عاملين ايه هناك .. لو مشيت بالليل بعربيتك بعد الساعة 12 .. اركن على جنب وامشي على رجلك وشوف كام عيل وبنت نايمين تحت كوبري 6 اكتوبر و15 مايو .. واكتر منهم في في الحدائق اللي في الميادين .. مرحتش قرى ونجوع الصعيد .. عشان تعرف قيمة نقطة الميه وهى نازلة م الحنفية حتى لو مخلوطة بمية المجاري .. وتعرف قيمة ان عندك حمام تدخله وتقفل بابه عليك .. يمكن تشوف ا ن دي حاجات عادية .. وهى فعلا اقل اقل الحقوق الانسانية .. لكنها عند ناس كتير جدا جدا مش موجودة .. لحد النهاردة يا استاذ احمد فيه ناس بتاكل من صناديق الزبالة .. وفيه ناس بتموت عشان مش لاقيه عشرين جنيه تشتري بيها حقنة .. وناس عايشين 9 افراد في غرفة واحدة بيناموا فوق بعض .. كل ده بعد ثورتين في 3 سنين .. مش حاقولك المفروض بعد الثورتين نبقى اوربا .. مش للدرجة دي .. لكن حاقولك - وانا ببكي - المفروض نبقى بني ادمين .. عارف يعني ايه بني ادمين .. يعني" نتستر " واحنا بنقضي حاجتنا .. فيه طلب اقل من كده تواضع ؟ .. ناس كتير مش لقياه .. اللي زي دول يا استاذ لايهمهم الببلاوي يمشي ولا يقعد ، ولا السيسي يرشح نفسه ولا ميرشحش .. ولا حمدين يبقى واحد مننا ولا كان هنا من شوية .. الناس دي عايزه تعيش .. عايزه تاكل وتشرب وتتعالج .. عايزه لما العيد يجي ، عيالها تفرح بجزمة جديدة وعيدية .. مش تقوللي السيسي قرر يترشح .. وبعدين لأ لسه بيفكر .. ولا حمدين برنامجه مفيش منه .. ولو السيسي خرج من اللعبة دي حيجي شفيق ويكسب قضية الانتخابات اللي كانت قصاد مرسي ويبقى هو الرئيس!
يجي اللي يجي .. بس يجي .. خلينا نخلص من المط والعجن ده .. خلي الغلبان يشم نفسه .. خلي الفقير يرفع راسه قصاد عياله وهو راجع البيت بكيس جوافة .. هو ده المهم .. يتحقق بقى على ايد السيسي .. على ايد حمدين .. على ايد الجن الازرق .. المهم انه يتحقق .. او على الاقل نشوف امارة ان اللي جي أحلى .. احسن طعم المرار صعب اوي .. انا بقولك كده وانا عارفه انك مجربتهوش ، وعشان اكون صادقة ، .. ولا انا كمان جرّبته .. بس حسّيته يا استاذ احمد لما شفت بعيني مرة وانا راكبة عربيتي ، واحدة ست واقفة قصاد صندوق زبالة .. والمسكينة مش مستحملة الريحة البشعة .. ومع ذلك بتدور على اى حاجة تاكلها .. حتة لحمة .. او رغيف عيش .. رماه واحد من بتوع النخبة او حقوق الانسان.!!