** حريق في العاصمة الإدارية الجديدة.. هو فيه عاصمة إدارية جديدة.. إزاي تولع وهي هي لسة بتتبني.. عصر اليوم.. ظهر تصاعد الادخنة اللي غطت سماء العاصمة الإدارية. وقال اللواء علاء عبدالظاهر، مدير الإدارة العامة للحماية المدنية بالقاهرة، إن الإدارة تلقت بلاغا بحريق شب في العاصمة الإدارية الجديدة، لم تتضح ملابساته. وأوضح «عبدالظاهر»، ل «صوت الأمة»، أنه تم الدفع ب 10 سيارات إطفاء، و3 خزانات مياه للتبريد نحو العاصمة الإدارية الجديدة لإطفاء الحريق. احنا مش معترضين.. بس احنا مش فاهين... إيه اللي ولع بالظبط.. الأخبار بتقول: إن الحريق نشب في قاعة احتفالات تابعة لفندق تحت الانشاء.. رسالة مننا لينا... ربنا يستر على مصر مننا.. ** قررت الحكومة المصرية زيادة قيمة بطاقات التموين خلال شهر رمضان 14 جنيها للفرد.. وهذا ما تسبب في شعور الكثير من المواطنين بالأمان وأنا أولهم والله.. أصلي كنت بعمل جولة بريئة في سوبر ماركت كبير عشان أجيب ياميش رمضان «كل سنة وأنتم طيبين».. ولاقيت الأسعار غريبة ميقدرش عليها غير «الشديد الأقوي».. تخيل كدة لما يبقي الفسدق ب 350 جنيها والبندق ب 250 جنيها وأقل حاجة الزبيب ب 55 جنيها وطبعا روحت البيت «أجري يا مجدي».. فتحت «فيسبوك» لاقيت خبر إن الحكومة أديت لكل مواطن 14 جنيها زيادة على بطاقة التموين فاحسيت براحة النفسية وأني هقدر أجيب ياميش رمضان.. «ربنا يخليلنا الحكومة». * *هوجة إن المسيحيين كفرة و«أصحاب عقيدة فاسدة» بما أثار غضب الكثيرين وأولهم الأزهر الشريف.. بالصدفة إمبارح شوفت راجل مسيحي بيعمل كل سنة مائدة رحمن في رمضان على أرضه عشان يأخذ الثواب وياكل مسلميين.. ولما اتكلمت معاه قالي مفيش حاجة أسمها مسلم ومسيحي إحنا مصريين وبنتعامل بأخلاقنا وربنا اللي يفصل بيننا يوم القيامة.. الراجل ده شكله مش متعلم أوي بس عنده حكمة ما باشوفهاش عند كتير من الناس اللي عندها معلومات.. المعلومات حاجة والعلم حاجة والحكمة حاجة تالتة خالص.. ** المسرحية بدأت.. مسرحية الثانوية العامة.. اجتماعات كثيرة في وزارة التربية والتعليم بخصوص قرب امتحانات الثانوية العامة، الاجتماعات بتتكلم عن أهمية التخطيط الجيد لسير العمل والتدريب المسبق على مراحل استلام صناديق كراسات الأسئلة، وآليات تسليمها للجان التابعة وتأمينها، وضمان سريتها، والتوزيع الأمثل لها.. و«شاومينج» ورفاقه اللي احترفوا تسريب الامتحانات أعلنوا انهم هم كمان مستعدون لتبويظ خطة الوزارة زي كل سنة.. مين بقى بيتفرج على المسرحية دي... الأهالي اللي بتدفع اللي وارها واللي قدامها عشان الدروس والعيال تنجح وتدخل كلية كويسة.. قال يعني هيشتغلوا بتخصصاتهم... والله الموضوع أبسط من كل الكلام دة أصله في الأخر نصيب سواء اتسربت الامتحانات أو لاء.. أصل كليتك مكتوبالك من وأنت في بطن مامتك.. أرجوكم ما تعقدوش العيال.. والله المسرحية دي كلها فشر على الفاضي.. أرموا حمولكم على الله **«أكلت كام حمار لحد دلوقتي»؟ سؤال بيطرح نفسه لأننا كلنا بناكل أكل سريع وكل شوية نشوف خبر بيقولك إن المطعم دة بيبع لحم حمير.. بس تصدق طعمها حلو وشكلها شغالة معانا عادي... بدليل إن احنا ما بنتخضش غير لما بنعرف إن المحل اللي بقالنا 3 سنين بناكل فيه كان بيبيع لحم حمير.. بس الحكومة مسكتتش.. حطت غرامة 500 جنيه على الشخص اللي بيبيع لحمة الحمير.. والبرلمان قرر يتدخل حيث تقدم أحد النواب بمشروع قانون لتعديل بعض أحكام القانون 48 لسنة 1941 بشأن قمع الغش والتدليس، وتجريم بيع لحوم الحمير والكلاب والقطط والبغال والتجارة فيها.. الحمد لله.. ما دام تدخل البرلمان... يبقى احنا كده في الأمان..
