العيال كبرت على مسرح الجمهورية

قرب قرب وشوف مسرحية العيال كبرت أقوى المسرحيات الكوميدية فى تاريخ المسرح السياسى المصرى، ضحك للركب، واللى ميلاقيش ركب يركب قطر عشان ما يجيش!
المسرحية تواصل عروضها متفوقة على نفسها على مسرح الجمهورية كلها بطول البلاد وعرضها، زى المخرج ما عايز لها.
المسرحية صورة فوتوشوب مكبرة لمسرحية العيال كبرت اللى مليانة مسخرة. العيال فيها ما بتحترمش كبيرها أبوها وتتهمه إنه بيحب واحدة غير أمهم.
يبدأ العرض اليومى بعيل يقول: رمضان السكرى لازم يمشى واخر بيقول: رمضان بيحب جماعته أكتر من أمنا. وعيل ثالث يقول: لا أمنا الحمد لله بخير بس كل محافظة مستقلة بذاتها. الأم تظهر على المسرح تهدى فيهم: عيب دا أبوكوا يا عيال: يطلع واحد منهم يقول: يا شيخة اتنيلى ولا انتى فاهمة حاجة. فيرد عيل من طرف المسرح: وحى أحى احرقوا بيتهم ندفى عليه. فيرد واحد طالع من تحت السرير بيفرك فى عينيه، إحنا لازم نحرق البلد كلها عشان كرسى المعسل ونتدفى أحسن الدنيا برد قوى! يدخل المسرح بلية صبى المعلم كرشة لأن المسرحية تمثل كافة طوائف المجتمع، يقول بمعلمة: ولا يهمكوا يا عيال: أنا خربت فرامل القطر وبكرة تسمعوا الهوايل فيرد أحدهم ساخراً: اتنيل على عينك ما البلد كلها ما فيهاش فرامل وإحنا مش عارفين رايحين على فين (صوت من الخارج) دستووور يا إخوانا، فيرد أحد العيال اتفضل اتفضل يا خويا كلنا روسنا مكشوفة. يحتج أحد العيال قائلاً: مش لاعب، ودينى ما أنا لاعب معاكوا طول ما صاحبنا قاطع عنى المصروف. يتحرك أحد العيال من جانب المسرح إلى وسطه منادياًً: اجتماع على مستوى القاعدة، فيرد أحدهم أنا منسحب.. لا حوار إلا الحصار فيردد العيال خلفه لا حوار إلا الحصار. يظهر على المسرح فجأة عيل يقول: أنا المتحدث الرسمى باسم اللهو الخفى، لازم نحاصر رمضان السكرى.. فيقاطعه أحدهم.. قصدك رمضان أبو صرة؟!. فيرد بلا مبالاة: لا ماتفرقش أهو كله برتقال. ويتابع: يا رمضان طلع رجالتى البلطجية اللى إنت حابسهم أحسن والله أطربقها على دماغ الجميع.
وفى الختام وقبل أن يحل الظلام. صوت غناء جماعى:
طول ماعيالنا همه كبارنا الخير مانشمه ولا يحضرنا..
ولا نور الحق ينور دارنا.. مهما سكتنا ومهما صبرنا (ستار).