علَّق الإعلامي تامر أمين، على ضبط مديرية الطب البيطري «11 حمارًا» بمدينة نصر قبل بيع لحومها للمواطنين، قائلًا: «لما حصلت نفس المشكلة دي من كام شهر، سألت بعض أصحاب المحلات عن الموضوع ده، قالولي إن اللي بيقول إننا بنبيع لحم حمير بدّل اللحم العادي هو اللي حمار، علشان لحم الحمار غالي جدًا، ورغم إننا بنشتم الحمار وبنتجنى عليه إلا إنه في واقع الأمر ثمن الحمار غالي». أضاف أمين، خلال تقديمه برنامج «الحياة اليوم»، عبر فضائية «الحياة»، «مديرية الطب البيطري تقول في الواقعة إنه تم التحفظ على الحمير المذبوحة.. هو إنتوا بتتحفظوا على الحمير وبس؟ طيب بالنسبة لأصحاب الحمير حصلهم إيه؟ يعني تم التحفظ على الحمار.. فين بقى الحمار اللي ذبح الحمار؟ واضح إننا عندنا مشاكل كتير في موضوع اللحوم ونحتاج إلى رقابة أكثر». تابع: «بالمناسبة يعني.. عشان متقلقوش أوي ولا حاجة، ومع إن ده غّش تجاري ويضربوا بالنار اللي بيعملوا كده، بس لحم الحمير مش مضر، عشان بس الناس اللي بتقول إحنا بناكل و(نهق)، مفيش الكلام ده خالص، شوية أعراض عادية ممكن تؤدي إلى (الرفس)، لكن مفيش تأثير كبير ولا حاجة الحمد لله».