باعترافات أحد الكابوهات.. «صوت الأمة» تكشف خطة «دولة الأولتراس» (مستندات)

حصلت «صوت الأمة» على النص الكامل من اعترافات أحد كابوهات رابطة مشجعي نادي الزمالك، المعروفة إعلاميا ب«الوايتس نايتس» في اتهامه مع سيد مشاغب، وآخرين بتكوين الجناح العسكري للأولتراس F 16 والكتيبة 101 عسكرية.
تحقيقات النيابة كانت مع حسن مجدي سليمان منصور، الشهير ب«حسن كازرولا» أو «جزره»، 19 سنة، بالفرقة الثالثة ثانوي، حيث أكد أنه انضم إلى رابطة الألتراس «وايت نايتس» سنة 2008، وكان عضوًا فى دولة اسمها الأمبولية وهو الاسم الحركى لمنطقة مدينة نصر والقاهرة الجديدة، والمسئول عنها في ذلك التوقيت كريم زرار.
«جزره» قال خلال التحقيقات: «كانت بصحبة محمد محي، وعلي محمد، وشهرته علي مشاغب وكريم معتز وشهرته كريم زعيم، وبدأت أعرف أهداف اللى على أساسها اتعمل الأولتراس اللى هي تشجيع كل الفرق الرياضية، بتاعت نادي الزمالك، والسفر وراء كل الفرق بكل المحافظات وبره مصر، بالإضافة إن من أفكار الأولتراس هي إن كل ضباط الشرطة أوغاد، ولازم يتم مواجهتهم، لأنهم أنظمة قمعية، ويمنعوا دخول الدخلات بتاعت الجماهير اللي بتحفز اللاعيبة، ومن ضمن أفكار الأولتراس إسقاط كل الأنظمة القمعية، بالإضافة إلى أن الألتراس ضم الأعلام، وبتمتع أعضائه من الظهور الإعلامى بالوجه ممكن بالصوت وفى سنة 2009، بقيت أنا مسئول منطقة مدينة نصر وكان معايا حسن مغربى وأنس توفيق وسامر محمد» .
وأضاف «جزره»: «تعرفت على سيد على فهيم وشهرته سيد مشاغب أو مستر x وهو ده من ضمن مؤسسين الوايت نايتس فى 17 مارس 2007، وكان معاه أحمد عادل وشهرته أحمد فقدو ومحمد جمال وشهرته جيمى هود، وأحمد الجارحي وشهرته الدكتور، ومصطفى أحمد وشهرته مصطفى تقاوي، وبعد كده اكتف يعنى عضو نشط فى 2010، وكان الأعضاء الناشطين فى الفترة دى هما سيد مشاغب وياسر سيد وشهرته ياسر جوجو، ومحمد محى، وأحمد حزوب وأحمد صلاح».
وتابع: «2008 بدأت علاقتي بالتراس وايت نايتس، وده كان من خلال سعيد شحاته، وعبدالله صلاح، ودول في اولتراس أهلاوي ومن خلالهم عرفت يعنى إيه التراس وأفكارهم ومفاهيم فبدأت أدخل على الفيس بوك، ودخلت على الصفحة الرسمية لأولتراس وايت نايتس اللى هى uwk للصفحة، وده كان مسئول الصفحة سيد مشاغب وأحمد خروب وإسلام عبد الظاهر و محمد محى و أحمد صلاح وياسر سيد وشهرته ياسر بوجو، وعرفت من الصفحة بتاعت الأولتراس على الفيس بوك ان مسئول المنطقة اللى ساكن فيها فى مدينة نصر واحد اسمه كريم زرار، وشهرته كوته، وكان رقم تليفونه مكتوب على الصفحة وكلمته، وقولتله أنا عاوز أكون عضو فى الأولتراس، وطلب منى ان هو يقابلنى على قهوة اسمها سهر الليالى قدام كنتاكى اللى فى شارع الطيران بمدينة نصر، وكان قاعد معاه مجموعة من التراس وايت نايتس، ومن ضمن اللى قاعدين معاه محمد محى، وعلى مشاغب وكريم معتز وشهرته الزعيم، وبدأت أعرف من كريم زرار شروط أنى أكون عضو فى الأولتراس ومنها اشتراك كارنية وده قيمته 20 جنيه فى الشهر، وحضور المباريات بلا غياب ولو ما حضرتش ماتشات اتشال من الجروب والسفر لحضور المباريات داخل مصر إجبارياَ وخارج مصر اختيارياَ، وبقيت عضو فى منطقة مدينة نصر».
وكشف «جزره» خلال التحقيقات، أسرار عن دولة الأولتراس، حيث استطرد: «المنطقة عند الأولتراس اسمها دولة، ومنطقة مدينة نصر أسمها دولة الأمبولية، وكانوا مسئولية المنطقة مسنده لكريم زرار، ومحمد محى، وعلى محمد وشهرته على مشاغب وكريم معتز وشهرته الزعيم وفى خلال الفترة من ساعة ما بدأت لغاية 2009، وأنا عضو عادى مجرد أنى بحضر ماتشات وبدفع الإشتراك الشهرى، بعدها بدأت أقرأ عن الأولتراس ونشأتها من البداية من عام 1932 فى ايطاليا واليونان ومن خلال قراءاتى عن الأولتراس بدأت أعرف الأأفكار اللى اتعلمت علشانها الأولتراس وهى إسقاط الأنظمة القمعية، وأن ضباط الشرطة أوغاد والسبب فى كده أن الألتراس بيسعى لتشجيع الفرق بلا حدود ومش عايز قيود بينه وبين تشجيع فريقه وبيرفض أى قيود سواء دينية أو أخلاقية أو قانونية بمعنى حرية لا متناهية، والمعلومات دى بيعرفها العضو الجديد من خلال الجروبات والموقع الرسمى لمجموعة الوايت نايتس، ولازم أحفظ كل حاجة عنهم من حيث عقلية الأولتراس بمعنى أفكارهم ومبادئهم وثقافتهم والجروبات الخاصة بالأولتراس فى العالم وحركتهم بمعنى أعرف اغانيهم والحانهم ودخلتهم للماتشات وثقافتهم الفكرية واتجاهاتهم زى امتى يواجهوا الأمن وامتى يظهروا فى الاعلام بوجوههم وتجهيل أفراد المجموعة يعنى محدش يعرف التانى بمعنى ان محدش يعرف إن أنا مثلاَ أولتراس وده نوع من أنواع إنكار الذات لحد ما شربت أفكارهم، وبعد كده بتبدأ تقرأ فى الأمنيات التواصل زى أمنيات الرحكة زى إزاى تهرب من الشرطة، ومقولش حاجة عن أفراد المجموعة بتاعتى أو عن نفسى وإنى لو اتمسكت ما اعترفش بأى حاجة أنا عملتها أو انفى أى من المجموعة ».



ويستكمل صوت الأمة نشر الكواليس في الحلقة الثانية.

موضوعات متعلقة:
السيسي في عيد العمال: 100 مليون جنيه من تحيا مصر لصندوق الطوارئ.. وزير القوى العاملة: وفرنا 82 ألف فرصة عمل.. ورئيس اتحاد العمال يطالب بسرعة الانتهاء من قانوني المعاش والتأمين الصحي