بالصور.. عمال "أرب ديرى" يعتصمون اعتراضًا على قرارات الفصل التعسفى

واصل المئات من العمال فى الشركة العربية أرب ديرى "باندا" بقرية "سندبيس" القليوبية اعتصامهم لليوم الخامس على التوالى اعتراضا على قرارت الفصل التعسفى التى قامت بها الادارة الجديدة وتسريح العاملين دون صرف مستحقاتهم، بعد أن سقطت فى يد رجل الاعمال "وليد زكى " فى مارس الماضى.
إستهل "سيد حسن " أحد العمال المفصولين حديثه بقوله "الشركة كانت ملك رجل أعمال سعودى واشتراتها مجموعة "بايونيرز" الاستثمارية وصاحبها "وليد زكى " والشركة الجديدة بتفصل العمال فصل تعسفى دون حدوث أى أخطاء من العمال ودون اعطائهم حقوقهم "
ويضيف "سألنا صاحب الشركة انت بتمشى العمال ليه قال أنا عايز أقل عمالة وأكثر انتاج طب ادينا حقوقنا قال ملكوش حقوق عندى ودلوقتى الماكينة اللى كان بيشتغل عليها 5 عمال بقى بيشتغل عليها 2 بس ".
ويستكمل "حسن " حديثه قائلا " جايبين لواء اسمه احمد حسن كان مدير امن الجيزة ومسئول عن أمن الشركة بيقولنا اللى انفصل مش هيرجع واللى قاعد احنا هنمشيه احنا بنصفى " مضيفا " عايو تمشينى مشينى بس ادينى حقوقى ادينى على السنة 2000 جنيه " .
أما " حسن سعد " يقول " احنا شغالين فى الشركة بقالنا 8 سنين وسياسة الادارة قايمة على الظلم لاغوا اجازاتنا واشتغلنا وزودوا ساعات العمل واشتغلنا برده ولو واحد فينا اتصاب ملوش اى حقوق من الشركة وصابرين رغم كل العواقب دى وشغالين عشان ناكل عيش و اعتراضنا معاهم همشى عايز حقى وقانون العمل مش بيحمينى وقانونهم وقت مش احتاجك يلا مع السلامة " .
ويشير أن " اللواء أحمد حسن عمل فينا محضر تخريب وجت معاينة من مركز القناطر الخيرية ولقت مفيش تخريب وامبارح عمل محضر تانى وقال أن العمال منعين تحميل العربيات ووقفين الشغل وجه المركز عاين ولقى الشغل ماشى " .
ويضيف " احنا هنفضل معتصمين داخل المصنع لحد ما وزير القوى العاملة ييجى ويسمعنا أو الهيئة العامة للنقابة أو محافظ القليوبية أو اى مسئول ييجى ويحللنا مشكلتنا ".
"محمد نجاح " يقول " احنا بقالنا 4 أيام اعتصام واضراب عن العمل ومحدش من المسئولين فكر يجيلنا ومفيش قانون فى الدولة يضمن لنا حقوقنا والحل الوحيد هو التفاوض مع صاحب العمل وصاحب العمل قال الشغل أولا وبعدين نتفاوض " .
ويضيف " احنا كل اللى عايزينه يبقى فيه عقود لمدة 5 سنين بدل العقود السنوية وزمايلنا اللى مشيوا يرجعوا ".
"عبدالله الشبانى " يقول الشركة عملت ضدنا محاضر تخريب والنهاردة جه مسئول من حقوق الأنسان فى المركز وهنروح نثبت عكس كده وهنعمل محاضر ضد الشركة للناس المفصولة من غير حق ".
ويضيف " فيه ناس كانت شغالة يوم الخميس وجالهم النهاردة جوبات فصل وكل يوم بينزل أسماء جديدة أكتر من 3 ألاف أسرة هيتشردوا فى الشارع والشركة بتفصل العمال عشان تبيعها فاضية ".
"محمود عبد الباقى " يقول أنا شغال فى الشركة من 5 سنين وماضى عقد من 40 يوم وبعتولى جواب على البيت بالفصل والشركة قالتلى احنا مستغنيين عن خدمتك "
أما " محمد عبدالله " يقول " مفيش مسئول فى الدولة عايز ييجى يشوف مطالبنا احنا جهة انتاج والشركة دى كبيرة وبتصدر للدول العربية واحنا أولى الناس أن الدولة تقف جنبها"
ويضيف " احنا هنفضل معتصمين ومش هنشتغل لحد ما مطالبنا تتحقق " .