المعجبانى

جوزى راجل عايق.. ويمكن ستات كتير بيحسدونى عليه.. أصلهم مش عارفين إن عياقته دى هى السبب الرئيسى فى إصابتى بالضغط وكمان ممكن تجيبلى السكر.. ليه؟
أصله طول النهار بيدلع فى نفسه. هدومه مكوية زيادة كأنها خارجة من المصنع وياويلنا لو فيها حتة كسرة صغيرة.. نقعد نكوى فيها لحد ما نوصل للى هو عاوزه. الشرابات أشكال وألوان وطبعا لازم نرص كل لون لوحده.. أما القمصان فحدث ولا حرج كل قميص متستف فوق أخوه بس بشرط الألوان اللى زى بعض فوق بعض.. وكمان إيه عكس عكاس عشان الياقة متتبهدلش.. علبة للساعات.. وعلبة للأقلام.. ودولاب كبير للجزم.. كل جزمة فى كيس.. وكل لون جزمة له الفرشة والفوطة بتاعته.. وياويلنا لو استعملنا الفوطة اللى بيمسح بيها الجزمة السودا للجزمة البنى.. أما المشكلة الكبرى فإنه مش مهنينى على كل كريمات العناية بالبشرة اللى بشتريها لنفسى واللى مش بلحق استخدمها. ومهما قلت له إن الكريمات اللى تصلح لبشرة الستات مختلفة عن بتاعة الرجالة مفيش فايدة بادن فى مالطة..
يوم الجمعة فى بيتنا هو يوم الفرسة الكبيرة.. هو بيصحى من النوم ياخد الدش وطبعا يملا البانيو ويقعد فيه لزوم الاسترخاء ونعومة الجلد.. وياسلام على أنواع وأشكال الصابون اللى بيحطها فى الميه.. وبعدين يخرج من الحمام يبدأ فى الماسكات والله بتكلم جد ماسك للبشرة وماسك للشعر (مع إنه معندوش غير عشر شعرات بس معتز بيهم جدا). وبعد صلاة الجمعة لازم يروح لل«مانيكريست» يعمل ايده ورجله وحمام بخار لوشه.. وكل يوم بالليل يطلع الهدوم اللى حيروح بيها الشغل تانى يوم ويشوف إيه يليق على إيه.. وطبعا لازم اهتم وأقوله رأييى واللا بيزعل جدا.. وتقولولى إيه اللى فارسنى.. أصلكم مش عارفين إنى معنديش وقت خالص أعمل نص اللى هو بيعمله.. حتى إيدى اتهرت من غسل المواعين.. وبتكسف أسلم عليه واللا لا سمح الله اسيبه يمسك إيدى لا يكتشف إن إيده بقيت أنعم بكتير من إيدى.. وإن بشرته أحلى بكتير من بشرتى.. طب والحل إيه؟
كنت بالصدفة قاعدة مع جوز واحدة صاحبتى وهو بالمناسبة جراح كبير قوى قلت له تفتكر يا دكتور هو أنا ممكن أعمل عملية واتقلب راجل.. على اعتبار إنى مش ناقصنى كتير وأبقى راجل.. ضحك الدكتور وقاللى أعتقد إنك محتاجة عملية تتقلبى ست..