المجلس القومي للرجل

إذن أخذت المرأة المصرية حقوقها كاملة و أصبحت مواطن من الدرجة الأولى و حان الوقت ليطالب رجال مصر المحروسة بمساواتهم بنساء مصر المحظوظات ..مش تقولوا؟..أنا إكتشفت الموضوع ده بالصدفة و أنا باتصفح موقع جمعية (المجلس القومي للرجل).. موقع الجمعية -اللي بيقال إن أعضاءها تقدموا بطلب لإعلانها رسميا كجمعية شعبية و الطلب رفض من السلطات- عارض مباديء الجمعية المنطقية الهامة..
أول مبدأ بيقول : إذا رأيت سيدة تتعرض لموقف سيئ في الشارع لا أساعدها..ده على أساس إن الرجالة مقطعين بعضهم عشان يساعدوا الستات و الحكومة بتنظم مساعداتهم دلوقتي عن طريق بطايق التموين ..
المبدأ الثاني: مقاطعة جميع المحلات والشركات التي تمتلكها أو تعمل بها فتيات..طيب ..قضوها بأه فول و كشري و عصير قصب ..و بدل ما تكونوا المقهورين في الأرض هتبقوا المنتفخين في الأرض و صحة و عافية إن شاء الله..
المبدأ الثالث: مقاطعة المنتجات التي تظهر في الإعلانات التلفزيونية التي تقوم بها فتيات أو سيدات..طب دي بأه جايبة من أول السمنة و الشاي لغاية إعلانات "خللي السلاح صاحي" ..الإعلانات الوحيدة اللي مافيهاش ستات هي إعلانات مصلحة الضرائب.. خللي الضرايب بأه تنفعكم بدل السمنة و الشاي و....أي حاجة تانية يعني.
الرابع : إذا كنت صاحب شركة أمتنع عن تعيين السيدات و إذا كان لدي موظفات أقوم بفصلهن من العمل. طب إعملها كده ..أبو وردة هيسمعوه و هو بيعمل زووو فوق نافوخك من آخر حارة في الصين.
الخامس: إذا كنت سائق تاكسي أو ميكروباص فلا أقوم بتوصيل النساء..ولا يهمنا ..هنقضيها تكاتك..
السادس: المطالبة بالمساواة في تأدية الخدمة العسكرية..و ماله بس انتوا عارفيننا..جمعيات و أجازات و أذونات رضاعة لكن عموما إحنا ما نتأخرش أبدا عن خدمة الوطن.
الرابع عشر : الإمتناع عن الزواج من أي فتاة حاصلة على أكثر من الإعدادية أو مؤهل متوسط.. دي واضح إنها نتيجة تنفيضة جامدة من الفيونكة أيام الجامعة يا برنس ..و إذا كنت أعرف شخص متزوج من مصرية أقاطعه لأن الذي يقبل الزواج من مصرية في ظل القوانين المعمول بها ليس رجلا..هييه.. مسكوا في بعض..
أما أكثر مباديء الجمعية إستفزازا على الإطلاق هو المبدأ التاسع عشر و الأخير: إذا دخلت مصر حربا لا أدافع عنها..ده علشان مصر مؤنث مثلا وإلا إيه؟ المباديء ال19 و الموقع الموجود على الإنترنت مش موقع على الفيس بوك ولا أنشأه شوية شباب في جامعة خاصة أو مجموعة من العاطلين الضريبة.
الأخبار اللي نشرت عنه بتقول إن القائمين على الموقع و أعضاء الجمعية من المثقفين و أساتذة الجامعة و الصحافيين و المهتمين بالشأن العام .مش عارفة عددهم كام بالظبط لكن كل اللي جه في دماغي و أنا باقرأ مباديء الجمعية إن لو عدد أعضاءها زاد عن 1 ..يبقى إحنا مش محتاجين مجلس قومي للرجل، إحنا محتاجين حد يستوردلنا رجالة من بره. و لا عزاء للسيدات.