محمد رياض: اعتزلت كرة القدم مبكرا بسبب لاعب كان أسرع من محمد صلاح

قال الفنان محمد رياض، إنه احترف كرة القدم في بداياته، حيث كان يلعب ضمن صفوف نادي أبو سمبل، ومقيد في الاتحاد المصري لكرة القدم تحت سن 19 عاما.
وأوضح "رياض"، خلال حواره مع الإعلامية منى الشاذلي في برنامج "معكم" على قناة "cbc"، أنه اعتزل في سن مبكرة، ولم يكمل مسيرته الرياضية؛ بسبب إحدى المباريات، قائلا: "كنا نادي درجة تانية، تحت سن 17 سنة و19 سنة.. وقتها طلعنا الدوري الدرجة الأولى وبنلاعب الأهلي والزمالك والفرق دي، وإحنا كنا فرقة بلا تمويل، مكنش فيه فلوس وكنا بنشتري الحاجات على حسابنا".
وأضاف: "كنا بنلاعب نادي اسمه نادي المية، كنت بلعب باك رايت، في الشوط الأول الكورة اترمت من ورايا وشايفها عدت من فوقي وبيني وبين لاعب الفريق التاني 5 أو 6 أمتار قلت هلف براحتي ده مش هيجيبني، في ثانية مشوفتهوش الواد صاروخ خد الكورة وجاب جون، أول جون جه بسببي".
وتابع: "عرفوا بقى إني مش عارف ألاحق الواد، فيرموا الكورة من ورايا والواد صاروخ، مش عارف أضربه ولا أوقفه ولا عارف أعمل حاجة، ده كان أسرع من محمد صلاح، والله ما كنت بشوفه، بيعدي بسرعة الصاروخ مبلمحوش، كان خرافة.. خلصت الشوط الأول وطبعا غيرني المدرب، مكملتش الماتش دخلت أوضة اللبس وغيرت ورجعت البيت واعتزلت ومروحتش النادي تاني خالص".