أحمد عفيفي يكتب: الجمعة القادمة في تاريخ مصر

" اوعى تخاف م القوي اللي يقولك انا .. منفوخ وفاضي وهوا .. مستقوي من ضعفنا .. وان كان لابد الموت .. اصرخ بعلو الصوت .. جايز بشر يسمعك ويوصل اللي ابتدى " .. تخيلوا أثناء الثورة وخلال ال 18 في 2011 كتبت مقالا وبدأته بنفس كلمات محمد العدل وصوت محمد منير .. ولم أتصور بعد عامين من الثورة ان اكتب مقالا وابدأه بنفس هذه الكلمات العبقرية التي أظن أننا لم نعد بحاجة إليها .. فقد طلقنا الخوف بالتلاتة .. ولم تعد تُرهبنا سلطة أو سلطان .. إلا أن البعض – وهم ليسوا بالعدد القليل – يتصور ان نظام مرسي والإخوان أكثر بشاعة من نظام مبارك ، بل أكثر من ذلك قالوا عن نظام مبارك " كان حاجة ببلاش كده .. بس احنا اللي كنا مش شايفين " .. لكن نظام مرسي والإخوان ، يذهب البعض في تخيّله ويقول جاء ليبقى ويستأسد ولن يتزحزح عن مكانه قيد أنملة .. وفي سبيل ذلك سيفعل المستحيل .. لن تهمه دماء شهداء جدد تُهدر.. لن يهمه صرخات ملايين " احنا غلطنا لمّا اخترناك " .. كنا فاكرينك حتبيّض وشوشنا وتبقى جماعتك جزء صغير من الشعب يدخل ضمن الفصيل الأكبر .. لكنك صممت ان تكون فقط رئيسا لهم وتدوس على بقية شعبك بالحذاء.

دعك من كلامك المعسول المدهون بزبدة يطلع عليه النهار يسيح .. شبعنا كلام وحديت من اللي كان قبلك.. صحيح اتأخرنا أوي في ثورتنا ، لكن العزاء الوحيد اننا قمنا بيها .. ونجحنا فيها ، الا انك وبمهارة فائقة تُحسد عليها كرّهتنا في ثورتنا النبيلة .. من فرط استهانتك بقدرتنا على القيام بثورة أخرى.

بعيد تماما عن ذهنك يا سيادة الرئيس ان الشعب الذي ظل نائما مستكينا طيلة 30 سنة ثم " فاق " .. لن تأخذه مرة أخرى ولو " تعسيلة " ساعة عصرية .. مش حيحصل ابدا .. شعب مصر شعب اصيل وودود وابن ناس أوي .. يديك فرصة ويرمي لك الكورة مرة واتنين وتلاتة عشان تجيب جون .. لكن الجون والاجوان جات في الشعب نفسه .. انت بتلعب معانا ولا ضدنا ؟ .. واضح انك مش حريف سياسة.. ومعندكش فكرة اساسا عن أصول اللعبة .. جربناك في حراسة المرمى فاتهزت شباكك يجي عشر مرات .. قلنا نجربك في الدفاع .. فبقى اللي رايح واللي جي من جماعتك يعدّي دون ادنى مقاومة وبمزاجك .. قلنا يمكن ينفع في خط الوسط .. حتى دي فشلت فيها " مش محتاجة عبقرية " انك تقف في مسافة وسط بين جميع القوى المتصارعة .. واكتر من كده كسرت وسطنا ورقابينا وخلّتها زي السمسمة قصاد اللي كانوا عايزين شفيق ودلوقتي بيقولوا لنا : شفتوا اختياركم وصل بيكم لحد فين.

طيب العب في الهجوم وهات جون .. برضه منفعش .. هجمت علينا احنا وبعزم مافيك تشوط الكورة في وشنا ، ولو قلشت منك تشوطنا برجليك .. وانت مطمن ع الأخر إننا حنسكت .. ننضرب على قفانا ونسكت .. وان الناس مش كل يوم بتقوم بثورة .. وان ثورة يناير جات معانا كده .. كبرت في دماغنا فقلنا نكمّل .. واننا مش على استعداد للموت تاني .. كفاية اللي راحوا مننا .. وفي الأخر جيت انت تحكم!

صحيح المنطق بيقول انك تاخد فرصتك بالكامل .. لكن العقل بيقول الجواب بيبان من عنوانه .. والخسارة القريبة أسهل وأقل فداحة من الخسارة البعيدة .. اللي انكسر في 7 شهور ممكن نلحقه ونصلّحه.. لكن بعد اربع سنين والدنيا خراب أسود ، حنحتاج أد ايه عشان نصلّحه .. انت يا ريس مرسي خسرت كتير أوي ورصيدك في الشارع اصبح شبه معدوم باستثناء جماعتك طبعا .. الناس مش مطمنة على الأيام الجاية .. وانت ماشاء الله نازل فينا تطمينات .. تقولنا الاقتصاد زي الفل .. نلاقي الناس مش لاقية لقمة العيش في الشارع .. تقولنا الأمن رجع تاني .. اتاريه رجع لك انت .. لحمايتك انت مش لحمايتك مع شعبك .. حتى الراجل وزير الداخلية احمد جمال الدين اللي كان واقف على الحياد ما بين جماعتك والجماعة الثورية .. " وده في حد ذاته غباء امني منقطع النظير وقلة أدب " .. حتى ده مش عاجبك .. لانه ساب جماعتك تضرب الثوار من غير ما ينضم ليها ويضرب هو كمان .. اخد منك استمارة 6 واتوكل على الله لانه مفهمش الرسالة بتاعتك من تعيينه .. انت هنا لحماية النظام مش لحماية الشعب .. والحياد بتاعك ده عند امك ، مش عند مرسي .. سايبلي يجي مليون واحد محاصرين الاتحادية وتخليني اهرب من الباب الخلفي والعيال الوحشين الكخة ولاد الكلب يحدفوا عربية الرياسة بالطوب .. دي رمز الدولة يا سيادة الوزير .. مش ده اللي اتفقنا عليه .. حتعملي فيها وزير داخلية بجد وترجع شعار الشرطة في خدمة الشعب يبقى طريق السلامة يابا والقلب داعيلك.

ان هنا قاعد في الكويت ومش عارف بالضبط الناس الجمعة الجاية ناوية على ايه .. لكن قلبي حاسس انها مش نازلة عشان تمشي وترجع بيتها تاني .. الناس فاض بيها .. صحيح صبرت على مبارك 30 سنة .. لكن مقدمات حكم الإخوان في 7 شهور بتقول ان النتائج زفت وطين .. طيب ليه نستنى 30 سنة تانية واحنا نقدر ننقذ البلد ومستقبل عيالنا دلوقتي ؟ .. اخلع يا ريس بدري بدري .. وعايز خروج أمن ؟ .. انا اضمنها لك من اللحظة دي .. فداك ياعم اللي اتقتلوا في المدة القصيرة اللي حكمتنا فيها .. فداك ياعم الخمسين عيل اللي فرمهم قطر الصعيد .. فداك ياعم الغلابة بتوع الأمن المركزي اللي كنت ناوي تضربنا بيهم .. فداك يا عم اللي ماتوا في عمارة المعمورة ، وفدى ابو ضحكة جنان نائب المحافظ البرنس اللي على قفاه ختم المرشد .. مسامحينك يا سيدي .. بس خد بالك لو واحد ..واحد بس مات الجمعة الجاية .. يبقى يا داهية دقي .. خلصت يا عم مرسي .. الدم بيسحب دم .. ولو مات صاحبي حاموت جنبه لو ما اخدتش حقه .. مش عايزين ندخل تاني في دوامة وسخة .. مين اللي قتل والقناصة اللي فوق السطوح والطرف التالت والرابع والعاشر .. خلاص زهقنا من المسلسل الغبي ده .. دم امه تقيل على قلبنا .. فشوف يا عم الريس .. لو لقيت ملايين في ميادين مصر بتقول خليك في الرئاسة بس بشروط .. واحد اتنين تلاتة .. تقول حاضر وتنفذ .. ولو لقيت الناس بتقولك شكرا .. مش حتنفع معانا .. اخلع .. من غير نقطة دم واحدة تبل الميدان.. واقسم لك حتبقى انت الكسبان .. دي شيلة تقيلة اوي يا مرسي مش حتقدر عليها .. فسيبها للي يقدر واللي عايز يشيل .. هى مش عافية ولا عضلات .. هى بس عايز شوية مفهمومية .. عايزة واحد بيبص لمصلحة العامة مش الجماعة .. عايزه واحد يحس ان مصر بلد كبير ميتهنش من حد بفلوسه .. دولاراته.. وريالاته .. طظ فيهم كلهم .. احنا أكبر ، لو كبيرنا كبير .. مصر كبيرة اوي يا مرسي .. وبصراحة كده.. وم الأخر انت مش قدها.