أحمد عفيفي يكتب: «اتغطى» وأنت نايم.. يا «عريان»!!

غطيها كويس وانت نايم يا عصام يا عريان .. طبعا قصدي دماغك .. حكم فيه ناس بتصطاد في الميه العكرة وانا مليش في قلة الأدب .. غطي دماغك عِدل وانت نايم يا عريان عشان متحلمش كتير أحلام وردية ، فتلاقي وشك في الحيط وقفاك ليا .. إيه يا ابن الحلال اللي انت بتقوله ده .. بقى انتوا ناوين - والنية لله - انكم تنافسوا على 100 % من مقاعد مجلس الشعب اللي جي .. دي إيه البجاحة دي .. صحيح صدق اللي قال سكتنا له دخل بحماره.. ياعم روح كده وانت شكلك مش عارف حاجة خالص في اى حاجة .. إياك تكون فاكر إننا هبل وبريالة .. من سنة فاتت اخدتوا 77 % ب " نعم " اللي تودي الجنة .. وانا واحد قلت " لأ " ومدخلتش النار ولا حاجة .. غرّقتوا البلد وغرّقتوا الغلابة رز وسمنة .. والجعان يسمع الكلام ويقول أمين .. ودخلتوا المجلس ويا ريتكم ما دخلتوا .. فضحتونا وجرستونا وقصرتوا رقابينا .. وخليتوا اللي ميشتري يتفرج .. واحد بلكيمي وصلحه بعملية تجميل في مناخيره .. " تقولش حيمثل مع انجيلينا جولي فيلم جديد وعايزها تفقع براد بيت بومبة محصلتش وتسرح معاه هو بعد ما مناخير جنابه بقت حلة وصغنونة " .. وواحد تاني دقنه نازلة لحد ركبته وإمام مسجد.. كان بيصلي العشا بالناس وسرحان في ميعاده مع البت الحلوة .. فصلي بسرعة بالناس ، وباله كله في اللي حيعمله مع البت بتاعته .. وراح للأمورة ، وفي حتة ضلمة والقمر طالع ، وفي العربية عمل فيها شكري سرحان وهاتك يا بوس وتقفيش في اللي جنبه .. وواحد تاني قال يعني مفيش وقت بيفوته .. قام يؤذن للصلاة والجلسة شغالة ..

عشان كده يا عصام يا عريان الناس كشفتكم ع الأخر .. وجات انتخابات الرئاسة فنزلت نسبة المصوتين لمرسي كمرشح إخواني نسبة مذهلة .. وفي الإعادة تلات أرباع اللي صوتوا له كانوا كارهين شفيق .. يعني م الأخر شعبيتكم في الشارع حاليا بعافية يجي عشرين حبة .. ولو عملتوا قرود .. قرووود عشان تاخدوا النسبة الأولى في المجلس ال 77 % .. تبقوا لامؤاخذة بتحلموا .

ناقصين احنا استفزاز من سي الافندي عصام العريان القائم بأعمال رئيس حزب الحرية والعدالة .. اللي لا فيه حرية ولا فيه عدالة .. بس الأسامي ببلاش .. واحدة شكلها يقطع الخميرة م البيت وامها تسمّيها قمر .. وواحد حرامي وابن كلب وتلاقي اسمه صالح .. وواحد فين مايروح كان يخربها وتلاقي اسمه مبارك.

المهم ياعمنا عايز اقولك ان الذكاء نعمة .. لأنه بيحمي صاحبه من بلاوي كتيرة .. تصريح زي اللي انت قلته مفيهوش ريحة الذكاء .. طيب ده حتى المثل بيقول : داري على شمعتك تقيد .. وانتوا من كتر ما انتوا مكشوفين .. النور عندكم قاطع على طول .. عشان كده قاعدين تلطشوا يمين شمال .. وفوق وتحت .. تقولوا حاجة وتعملوا عكسها.. تعينوا محافظين من عندكم في الأماكن اللي شعبيتكم فيها في الأرض .. حركة مكشوفة ولؤم فلاحين أهبل .. ولما نقول لكم عيب كده .. شوية فطنة يا ناس .. تقولوا علينا فاهمين غلط .. ونفوّتها بمزاجنا .. تقوموا تقولوا حننافس على 100 % من مقاعد المجلس .. يا سلام .. يعني احنا مكناش فاهمين غلط ولا حاجة .. ده احنا فهمنكم وخبزنكم وعجننكم .. وعارفين انتوا ايه .. وبتحلموا بإيه .. ونفسكوا تروحوا بينا على فين .

بس بعينكم .. كان غيركم اشطر .. 30 سنة مقهورين وطالع عين اللي خلفوا أهالينا وممسكوين بقبضة من الحديد والنار .. لكن ساعة الجد عملناها في 18 يوم .. ورمينا مبارك وعياله وعصابته في السجن .. ومبقاش فيه حاجة اسمها الحزب الوطني .. بس انتوا مصممين انكم تكونوا نسخة شبه الأصل من الحزب الوطني .. مفيش مخ بتلاتة تعريفة .. ولا محاولة لقراءة التاريخ بشكل واعي وجيد .. تاريخ إيه ؟ .. ده الكلام ده يا دوبك من كام شهر .. هو انا بقولكم راجعوا تاريخ محمد علي ومذبحة القلعة .. ارجعوا بس 18 شهر فاتت وشوفوا ايه اللي حصل .. يمكن يكون عندكم مخ وتتعظوا.

شوفوا .. انا بقول الكلام ده ، وايدي على قلبي .. خايف بعد كام يوم يصدر الحكم بعودة مجلس الشعب بتاع الكتاتني والبلكيمي والنائب بتاع النسوان .. وتحصل الإعادة على التلت الفردي بس .. وده على فكرة متوقع ، رغم ان كل القانونيين الفاهمين أوي بيقولوا استحالة .. والا حنبقى دولة " سنية ولعة " .. لا قانون ولا يحزنون .. اللي عايزه الريس وحزبه وجماعته يكون .. زي بالضبط أيام مبارك .. الورق ورقنا والدفاتر دفاترنا .. وحبايبنا جاهزين .. لكن لو سكتنا لكم .. ولو ده حصل .. يبقى من حقكم تلاعبونا لعب القرود والقرداتي .. من حقكم نوريكم نومة العازب تبقى ازاى ونكشف لكم عوراتنا وتعملوا فينا اللي انتوا عايزينه .. ده لو سكتنا .. وده مش حيحصل .. الناس فاقت .. صحيح ناموا تاني .. بس نومة التعسيلة .. انتوا عارفين لما الواحد يبقى تعبان وبقاله يومين منمش بيحتاج قيمة ساعة بس يريّحها حتى على الكنبة .. بعدها يقوم زي الحصان ويفوق ويكسر الدنيا .. اياكم تفتكروا ان الناس نامت ومش حتقوم لها قومة تاني .. تبقوا بتضحكوا على نفسكم عشان بعد كده العالم كله يضحك عليكم.

اتغطى كويس يا عم العريان ونام ومتحلمش كتير .. وبعدين اصحى وصحصح وشوف الدنيا ماشية ازاى .. احسن تلاقي اللي انت مطمن له اوي ده .. قام قومة تجيب عاليها واطيها .. وكل الأخطاء اللي وقع فيها في الثورة الأولى .. مش حيقع فيها تاني .. انتهينا يا عم العريان.. كان زمان وجبر .. وابو قرش عمره ما حيبقى بقرشين طول ماهو مصمم انه يفضل على حاله .. فاهم يا عريان .. ولا أقول كمان!!