النفسية.. مع د. محمد طه | البحث عن أب

فى هذا الباب الأسبوعى الذى يظهر كل يوم احد، يتواصل د. محمد طه أستاذ م. الطب النفسى، معكم، والإجابة على أسئلتكم واستفساراتكم فى كل ما يخص أحوال النفس، والطب النفسى، والعلاقات الإنسانية.
راسلونا على: http://m.me/mohamedtaha.net
●● كل الرسائل تخضع للسرية والخصوصية التامة، والإجابات عليها تكون بطلب المُرسل وبدون ذكر أية معلومات شخصية.
السلام عليكم..
عندى 19 سنة، متعقلة بمدرس جدا، كنت بعتبره زى بابا أوى. بابا وماما عمرهم ما أعطوا ليا احتياجاتى النفسية، مع إنى محتاجاها جدا. دايما ضرب واستهزاء. تعبت أوى منهم وبقيت لوحدى.
هو عوضنى عن كل حاجة، كان دعم ليا كبير جدا. كنت باتصرف معاه بطفولتى. كان الوحيد اللى بيفهمنى، وأقدر أعيط وأحكى معاه. كان واقف جنبى فى كل خطوة. اتحملنى كتير أوى.
بعد ثالثة ثانوى أنا اللى بعدت عنه بعد ما اتعقلت بيه أوى. بس بقالى أكتر من سنة مش قادرة أنساه. دايما بحلم بيه وأقوم معيطة. دايما لما ألاقى حد ماشى شبهه أجرى أشوف هو واللا لأ. مهووسة بيه أوى. دايما بافكر فيه ومش قادرة أنساه.
حاولت الانتحار بعد ثالثة ثانوى بسبب فشل دراسى بس مامتش. نصايحه ماشية عليها فى حياتى، هى اللى مخليانى لسه عايشة. بدلت الانتحار بأذى الجسد، ممكن أكسر كوباية وأذى بيها نفسى.
أنا بعانى من الاكتئاب من صغرى لغاية دلوقتى، وما زلت بانكر وأقول أنا طبيعية.. قولى أنساه إزاى؟ أنا تعبت أوى.
أختى العزيزة..
خلينى أفاجئك.. إنتى مش بتحبى المدرس.. ولا متعلقة بيه.. إنتى بتحبى أبوكى.. وبتدورى عليه..
للأسف يا صديقتى إحنا فى أحيان كتير بنعيد توجيه مشاعرنا من شخص إلى آخر.. بحثا عن الشخص الأول فى الشخص الآخر.. ودى حاجة مشهورة ومتكررة ومنتشرة بشكل لا تتخيليه..
اللى اتحرم من الأب بيدور على أب.. فى المدرس.. فى الشيخ.. فى الحبيب.. فى الزوج.. وأحيانا فى الابن.
واللى متعلق بالأم برضه بيدور على أم.. فى زميلته.. فى أستاذته.. فى خطيبته.. وطبعا فى مراته..
إحنا بنمشى فى الشارع نلبس الناس وجوه غير وجوههم.. ونحس ناحيتهم بمشاعر لا تخصهم.. ونسقط عليهم احتياجاتنا ورغباتنا وحكاياتنا القديمة..
عارفة أغانى الحب من أول نظرة؟ كلها كدب.. لأن اللى بيحب من أول نظرة، هو فى الحقيقة حد شاف فى اللى قدامه حد غيره.
عارفة مشاعر الكره والاستفزاز وعدم الراحة الأولية المبدأية مع حد ولا عمرك شوفته ولا عرفتيه قبل كده؟ هى برضه فى حقيقتها موجهة ناحية حد تانى قديم، فكرك بيه الحد الجديد.
عارفة اللى بتتخانق مع جوزها وهى شايفه فيه أبوها؟ واللى مش طايق مديره علشان شايف كمان فيه أبوه؟ واللى بيدوروا على أب أو أم أو أخ أو أخت فى القطط والكلاب والعصافير؟
صديقتى..
معظم علاقاتنا عمياء.. لا نرى فيها غير ما احتجنا أن نراه..
مُدرسك زى مانتى قولتى بالظبط كان يعتبر زى باباكى.. وانتى كنتى بتدوريه فيه على باباكى.. اللى ماكانش بكل أسف أب حقيقى.
تعلقك بيه هو بحث عن أب.. أحلامك بيه هى بحث عن أب.. اكتئابك وسلوكياتك الانتحارية هى بحث عن أب.
انتى محتاجة تاخدى حقك من أبوكى.. محتاجة إنه يبقى أب بجد.. محتاجة تحسى بوجوده وتشبعى منه..
علشان كده.. أنصحك إنك تعملى كل اللى تقدرى عليه.. كلمى حد من قرايبك.. كلمى شيخ الجامع أو كاهن الكنيسة.. كلمى والدتك وأخوالك وأعمامك.. خليهم يطلبوا من والدك ويُلحوا فى الطلب لغاية ما يقتنع إنه يروح معاكى لطبيب أو معالج نفسى موثوق.. يشتغل معاكم انتم الاتنين على علاقتكم ببعض.. وكيفية علاجها وإعادة صياغتها.. إلى جانب علاج فردى لكل منكم على حدة..
وإذا ماسمعش الكلام.. وتجاهل النصيحة.. وماستجابش.. كملى علاجك انتى.. وربنا موجود.. ومش هايتخلى عنك..
كل دعواتى معك..