أيوه المقال ده منحاز شوية و عارفة إن في رجالة كيوت هتقراه برضه عشان تقلدنا .. بس اللي غيران منا يقلدنا .. مبيهمناش في مقولة بحبها اوي بتقول ايه ؟ "ما هي ملكة بدون ملكها؟ حسنا ، من الناحية التاريخية ، أكثر قوة ". (مش عارفة مين اللي قاله) قابلت في حياتي اشخاص كتير الولد اللي بيقضي وقت - الولد اللي عايز يثبت لنفسه انه يقدر يجيب أي بنت و الولد اللي مش واثق في نفسه فبيطلع فيّا القطط الفطسانة عشان يحس بالكمال المزيف وهو يا حبيبي ناقص و طبعا معروف بقول عليهم ولاد عشان دول مش رجالة .. فيه بقي رجالة عاملة نفسها إنها رجالة يخرجك أحسن الأماكن و يحسسك انه مصباح علاء الدين يلا اطلبي بس اطلبي يا حبيبتي و ادفعي الحساب بعدها من تعب أعصاب و دوا ضغط .. طب ايه مفيش رجالة ؟ فيه بس فيه اللي موجودين عشان التناسل..اللي هو يلا لازم أعمل بيت و عيلة و في منهم بيبقي لطيف و في بنات بتحب النوع الدايركت ده وبيتجوزوا و صورهم بتكون حلوة اوي تنفع كارت تذكاري تحفة . أنا مش واحدة معقدة فبتقولك نصايح عشان تتعايشي.. أنا جاية اقولك بس إنك مش محتاجة تتعايشي.. مش محتاجة حد يقولك إنتي حلوة عشان أنتي حلوة يا حلوة . قواعد البنت السينجل الأربعين 1- السنجلة مش ابتلاء 2- 90% من المتجوزين مش مبسوطين 3- رصيدك في أمان 4- مش هيجيلك صداع 5- مش هتجيبي هدايا في الفلانتين - ANNVIRSARY - عيد جواز - عيد طهور- عيد أول بصة جابتني ورا 6- هتنامي وتصحي براحتك مش حيجيلك صداع إلا نادرا 7- إنتي لذيذة و لو عاجبك واحد مش لازم تخافي و تفكري هتفتحي مواضيع إزاي مش مطلوب منك تقومي بدور التلفزيون في العلاقة اللي تتدخليها ..RELAX 8- مفيش قطر ! GUESS WHAT? مهما الضغط كان حواليكي..مفيش قطر حيفوتك ..فيه نصيب جاي بتوقيت ربنا واحدة . 9- متكفريش بالحب .. الطيبون للطيبات .. صدقي إن في حد شبهك .. جاي ..بس ليس الآن 10 - الحياة حلوة و مش واقفة علي واحد بكرش أو حتي بطنه شوكلاتة 11- الأكل جميل و مش حيتأخر عليكي ولا يقفش ..بس متدوسيش في النقطة دي اوي و تبتي فيها 12- لما بنكون في علاقة مع شخص فترة طويلة بتظهر علينا علامات الإنسحاب ..انسحاب الشخص ده بتفاصيله و ذكرياته ..بالأماكن و الحاجات المشتركة ..العلاقات دي بتكون زي الإدمان بنحتاج مخدر و بندور علي شخص غلط وقتها يملي الفراغ ده ..ساعتها ارجعي لنقطة 11 براحتك بس بلاش مخدرات اخرتها وحشة والله 13 - الست ساعات بتقف في ضهر الراجل و بتنسي أن ضهرها هي اللي مكشوف . 14- انتي غالية و مهمة براجل في حياتك أو من غيره ..إنتي لوحدك - كفاية . 15 - في أيام هتحسي إنك مش كويسة .. عادي ..بس حتي و أنتي مش كويسة . إنتي كفاية . 16- متخليش أي مخلوق يهز ثقتك في نفسك. إنتي متخلقتيش ناقصة من غير راجل. 17- لا توجد فتاة عانس ، توجد فتاة منع الله عنها شر زوج غير مناسب و إبتلاء زوج فاشل ، يوم قريب سيمنحها الله كل ما تتمناه .." نجيب محفوظ 18- اقري المقولة بتاعة عمك نجيب و افتكريها كويس . 19- ربنا ثم نفسك و بعدين أي حاجة و أي حد تاني . 20 - متقبليش بأي حد و السلام. استني نصيبك ..استني اللي ينفعلك ..متبقيش زي البنات اللي شايفة إن اهم إنجاز في حياتها إنها اتجوزت و خلفت ..حبيبتي القطط بتتجوز و بتخلف كل يوم مش قصة! 21- البنت اللي متجوزتش مش ناقصها حاجة! 22- الجواز مش صفقة ولا نزولة شوبينج هتختاري موديل يعجبك و تشتريه و تمشي . 23 - الجواز حياة بين اتنين فيها مودة وتفاهم ..و تبقوا صحاااااب ..لو مفيش كل ده بلاها يا سوسو 24- حبي نفسك 25- اتسندي علي نفسك و اقفي علي رجلك ..اتقوي بيكي 26- لما هتحبي نفسك بجد مش هتسمحي لحد يهينها أو يجرحها أو ينيمها معيطة. 27- لما تحبي نفسك مش هتقبلي بنص حب ..بنص اهتمام ..بنص مشاعر ..بنص راجل .. سمعاني يا نصة يا قمر إنتي ؟ 28 - لما تحبي نفسك هتحبي اللي بيحبها بجد و حتبعدي عن اللي مش فارق معاه. 29 - لو راجل خانك ده مش معناه إنك (مش كفاية / العيب فيكي ) ولا هو ملقاش معاكي اللي هو محتاجه, معناه إن هو خاين و رمرام بس. شفتي بسيطة إزاي ؟ 30 - اعملي وقت لنفسك كل يوم تعملي حاجة بتحبيها حتي لو ساعة واحدة ! إنتي مش امرأة بلا قيد.. يلا استفادي بالوقت ده و اعملي كل اللي بتحبيه اللي كان حابسك مات "بصوت علاء ولي الدين " 31- العبي رياضة ..أول حاجة هتحافظي علي شكلك و ده حيزود ثقتك في نفسك و هتحسي إنك كل يوم شكلك اجمل 32- متهمليش نفسك و متبخليش عليها علي رأي الفنان تامر حسني "عيش بشوقك" اصرفي يا حبيبتي و بحبحيها علي نفسك 33- اتفرجي علي أفلام كتير .. الأفلام هي العالم الافتراضي بتدخلي جواه و بيعيشك تفاصيل ممكن تلهمك تعملي حاجة بتحبيها 34- اشتغلي ! متقعديش بروطة.. كل ما يبقي ليكي كيان و اسم و تعملي شغل بتقبضي عليه فلوس آخر الشهر هتحسي بقوة محدش في دنيا هيديهالك ..إحساس إنك معتمدة علي نفسك و في نفس الوقت بتشغليها بدل التفكير علي حاجات بتضايقك 35 - لو أنتي لسه خارجه من علاقة فريش بيطلق عليكي الكائن الذكر "فريسة" و ده لو هو عارف إنك مجروحة و يفضل يطيطب و يدلع مش عشان هو شايف الحلو اللي جواكي لا عشان عايز يشوف حاجات تانية .. متثقيش فيه حتي يثبت براءته و صدق نيته . 36 - متكسليش ..متكسليش تتعرفي علي حد ..أنا عارفة إن الكسل صفة بشرية بس قاوميها. لو جاتلك الفرصة مبقولكيش KEEP SINGLE, KEEP COOL أنا بقولك إن لو مجتش ITS COOL 37 - لما بنكون مع حد لسنين و علاقتنا بتنتهي بنكسل نبدأ من جديد ..بنخاف نرجع نتعود علي حد و يمشي ..بنكسل نقول بنحب ايه و بنكره ايه ..بس تعالي افكرك كده كام مره كسلتي و كام مرة بدأتي من جديد ؟ مبتقفش علي حد .. 38 - في حد هيحب تفاصيلك اللي كنتي فاكرة إنها مش حلوة عشان بس اتقالك كده! 39 - لو أنتي محبتيش نفسك و احترمتيها إزاي تستني من حد تاني يعمل كده ؟ 40 - اللي يقولك هنفرح بيكي امتي ؟ قوليله أنا فرحانة دلوقتي ..تفرح معايا ؟
