الكفر بتاعى.. الكفر بتاعك.. الكفر بتاعنا كلنا

هههههه يا راجل! معقولة؟! كلمة كافر وحشة؟! دى عادية جدا. الكلمة معناها فى المعاجم «غطى». لو قلت «كفر الليل» معناها إن الليل غطى النهار.. بسيطة خالص.. بسكوتة كد ومقرمشة. مش فاكر أغنية: كفر الليل وطلع الفجر والعصفور صوصو؟.. ههههه
معلش. كنت فاهم غلط. اصلى كنت ساعات اسمع ناس تعدى جنب الكنيسة وتقول «يا كفرة يا ولاد الكلب». كمان إمام الجامع عندنا دعوته المفضلة «اللهم أهلك الكفار والمشركين، أعداءك أعداء الدين». فشكيت إن كلمة كافر دى حاجة وحشة قوى.. تفتكر الإمام عندنا مش عارف؟
ده رأى شخصى لا يمثل الإسلام ولا نتحمل مسئوليته. اجتهاد منه ولكنه ليس ملزما. وبعدين يا أخى الإسلام لا يفرض نفسه على أحد. الكفر اختيار شخصى مشروع بنص القرآن. كل إنسان حر.
معقول؟ بالبساطة دى؟ مش متأكد إن فيه آراء كتير بتأيد الكلام ده.
مش محتاجين آراء حد. القرآن واضح بس المتطرفين بيكرهوا الناس فى الدين للأسف. غالبية المسلمين عارفين إن مفيش عندنا أهم من حرية العقيدة. «لكم دينكم ولى دين» فيه أكتر من كده؟
يا ريت الناس كلها تعرف الكلام ده.
كلهم عارفين والله انت بس بتبالغ. دى حملة لتشويه الإسلام الحقيقى. طب تصدق بالله؟
…
....
ساكت ليه.. قول لا إله إلا الله محمد رسول الله.
يا حاج أنا اسمى مينا.
طب وحد القطرين.. هههه.. لسه شايفها على الواتساب امبارح. اسمع يا مينا.. أنا والحمد لله كافر.
يا خبر.. بتقولها كده؟
يا سيدى عادى. ما هو المؤمن بشىء بيبقى كافر بباقى الأشياء. كلنا كفار. هههههه. مش باقولك انت مش فاهم ديننا.
يا ريت كل الناس زيك.
والله كل الناس بس انت رامى ودنك للجهلة والمشككين. عارف انت مشكلتك إيه يا مينا؟ إنك طائفى.
أنا طائفى؟!
طبعا. لازم تقبلنا كمسلمين. تتقبل الآخر اللى هو احنا وتتفهم عقيدتنا. من حقك تكفر بدينى لإنى كافر بدينك. ده ما يمنعش اننا نتعايش.
والله كلامك حلو. كده الواحد يحس إنه سعيد بكفره طالما معناها انه ملتزم بإيمانه ومنكر لما عداه. تصور شايفها دلوقتى عادى فعلا. هههه.. انت أقنعتى.. عادى فعلا.. أنا كافر. هههه كااااافر.
أيوه كده. كشكشها ما تعرضهاش.. قول يا كافر قول.
ههههه انت كافر وأنا كااااافر.
شفت؟ يا كافر!! مفيش مشكلة خالص. اكفر براحتك. على صوتك وما يهمكش.
ههههه كاااااافر.. أنا كاااااافر.
سامعين يا ناس؟ يا ناااااس.
إيه فيه إيه؟.. بتنادى على مين؟ وطى صوتك..
يا عالم!.. الراجل بيقول إنه كاااافر.. بيجهر بالمعصية..
يا حاج وطى صوتك.
ألا لعنة الله على العصاة الكااااافرين أعداءك أعداء الدين.
يا حاج انت بتهزر والا إيه؟ ما تزعقش الله لا يسيئك. الناس بتتلم. هيقولك مسلم غير دينه ومرتد يستحق القتل.
ما هو انت أكيد كنت مسلم؟! كلنا ولدنا مسلمين. هذه هى الفطرة التى ولدنا عليها. بتنكر؟ سامعييين.. إنه ينكر الفطرة.. ينكر الإسلااااام..
يا حاج ربنا يكرمك وطى صوتك. الناس بتبحلق. خلاص يا سيدى اتولدت مسلم. طلعونى من هنا يا جدعان.
أرأيتم؟! أتسمعون؟! مرتد كاااافر، تخلى عن إسلامه. يجاهر بالمعصية ويفخر بها فى قلب عاصمة الإسلام.
يا عم الله لا يسيئك الناس عينيها بتطق شرار. أنا لا كنت مسلم ولا ارتديت. أنا قلتلك كده علشان أخلص من الورطة دى.
وكمان منافق؟! يا عااالم.. منافق مرتد كااااافر. مجاهر بالمعصية. منكر للدين.
يا حاج فى عرضك. انت نسيت كنت بتقول إيه. مش بتقول حرية ال...
كااااافر.. فى قلب ديار الإسلام.. فى بلد الأزهر الشريف.. كااااافر.. يرضى مين ده يا إخواننا.. كااافر. باعترافه وبلسانه.. كاااافر.. تقبلوا النجاسة دى بيننا؟ فى وسطينا؟ كااافر.. يزدرينا ويزدرى ديننا ورسولنا وينكر الحق المبين.. كااافر..
يا نهار اسود!!… الناس دى كلها جت منين؟.. يا جدعان بالراحة.. واخدينى على فين.. طب والله ما كنت هاقول كافر دى بس هو اللى.. أى.. لأ.. بلاش كده.. حرام عليكم.. إنت ماسك إيه.. لأاااه.. ال.. حرااام.. ح... ر.. ا..
إيه ده؟
...
عملتوا إيه؟
...
ليه كده يا جماعة؟ مش قلنا بلاش القتل والحاجات دى. بالذمة ده كلام؟! اهو انتو كده لا تمثلوا سماحة الإسلام ولا تعرفوا الإسلام الحقيقى. ينفع نسىء لدينا كده؟! ينفع؟! إخص عليكم.. ياللا معلش.. ما تعملوش كده تانى!
********
ملحوظة.. النموذج أعلاه عرض ساخر.. تخيلى.. وغير حقيقى، يمثل غلاة المتطرفين فقط. لا علاقة له بشعبنا المتدين بطبعه، ولا يمثل الإسلام الحقيقى.