عندما فصل الله الدين عن الدولة

انت ازاى تقول إن ربنا هو اللى فصل الدين عن الدولة؟
أنا ما قلتش حاجة. ده ناموس الكون زى ما ربنا خلقه. هو انا اللى عملت الكون؟
استغفر الله. ربنا طبعا
شفت؟! خلقه وعمل له السنن والقواعد. صح؟
أكيد
طب لما بيكرم أمة من الأمم ويفتح عليها بيختارهم بناء على إيه؟ شايفه متوصى بالأمم اللى بتجرى ورا الناس فى الشارع ساعة الصلاة؟ أو اللى بيهجموا على القهاوى ويمسكوا الفاطرين فى رمضان؟ ما بيحصلش. ربك بيكرم الأمم اللى بتجتهد وبتشتغل. يعنى انت شايف اليابانيين والا الكنديين دول مقطعين الدعاء، ومقضيين السنة حج وعمرة؟! يا راجل دول حتى مش مسلمين. لكن اشتغلوا وعملوا دولة مؤسسات، مبنية على قواعد المساواة بين اللى عايشين فيها، والناموس الإلهى اشتغل ورسالة ربك واضحة تماما: من جد وجد ومن زرع حصد، ولا علاقة لدينك وعباداتك بالموضوع. يبقى مين اللى فصل الدين عن الدولة؟
الأمم دى نجحت بأخلاقها وهى دى أخلاق الإسلام.
يعنى عاوز تقول لى انهم مسلمين ومش عارفين؟! ماشى. اعمل زيهم. خليك مسلم زيهم واعمل نفسك مش عارف. اتعلم واجتهد وادعم الدولة المدنية اللى ما بتفرقش بين المواطنين على أساس العقيدة، وخلى عباداتك وإيمانك لنفسك.
انت عاوزنى اتخلى عن ديني؟ الدين المعاملة وكل اللى انت بتقول عليه من ممارسات وأخلاقيات جزء من الإسلام.
صحيح. لكنها مش حكر على الإسلام أو المسلمين. وبصراحة لو بصيت حواليك هيبقى صعب تثبت ان المسلمين لهم علاقة بيها من الأصل.
التطبيق الغلط لا يعيب النظرية
ده طبعا لو كانت النظرية ان الدين والدولة حاجة واحدة. بس زى ما انت شايف ربنا عمره ما كافئ حد علشان إفراطه فى الطقوس. وقوانينه فاصلة تماما بين الدين والدولة. عاوز تبنى دولة قوية وعادلة ربنا مديلك العلامات والإشارات الواضحة. تشتغل وتجتهد هيكرمك.
يعنى انت عاوز الناس ما تعبدش ربنا؟ وعاوز تفصل الأخلاق والعمل والعلم والأمانة عن الدين؟
يا راجل هو انا قلت كده؟! حق العبادة والاعتقاد مكفول للجميع وربك هو اللى بيحاسب عليه مش حد تانى. لكن ده مالوش علاقة بالدولة ولا من اختصاصها أصلا. وما دام شايف إن العلم والعمل والمعاملات الأخلاقية بين الناس من صميم الدين يبقى اتفقنا، مارس الدين زى ما انت شايفه: علم وعمل واخلاص واجتهاد، مين اللى ماسكك؟
انت ليه عاوز تفرق بين الناس؟
بالعكس. انا فهمى لكلمة الناس مش مقصور على المسلمين السنة بس. الناس فى مجتمعات النهاردة عندهم أديان وعقائد مختلفة، واللى عاوز يبنى دولة قوية لازم فعلا يوحد الناس ورا رسالة توصل للمسلم وغير المسلم. رسالة إنسانية للكل.
الإسلام بيكفل ده كله، وبيساوى بين الناس كلها.
ده كلامك دلوقتى مش اللى كنت بتقوله امبارح لما كنت مبسوط من بيان دار الإفتاء اللى بيحرض ضد اللى ما يصومش. وحتى لو ده كلامك ومقتنع بيه، الإسلاميين طوائف ومجموعات، وعمر ما كان فيه اتفاق بينهم خاصة فيما يتعلق بحقوق غيرهم.
انت كلامك مليان مغالطات ومهين للدين والعقيدة. بل فيه إهانة للذات الإلهية.
يا سيدى بتعلى صوتك ليه. الدنيا زحمة والناس تفهمك غلط. إهانة إيه بس انت عاوز..
كمان!! فاطر وبتسب الدين فى رمضان؟! الحقووووونى..
يا راجل حرام عليك.. إيه الزحمة دى؟.. يا عالم.. مش.. بس.. لأ.. أ......