خدلك (HIKE) مع طلعة للتعلم بالمغامرة

هايك أو هايكنج كلمة بقت منتشرة جداً الفترة اللي فاتت خصوصاً واحنا داخلين على الشتاء وده الموسم بتاعها في مصر.في البداية هنتعرف عليها.
شروق الشمس الأسطوري من أعلى جبل موسى
تعريف الهايكنج: وفقاً لقواميس اللغة الانجليزية Oxford , Cambridge حيث أنه مصطلح إنجليزي في الأصل ليس له ترجمة في العربية. له استخدامات كثيرة ما يهمنا منها هو أنه مشى الجبال أو السير لمسافات طويلة ( لا يقل عن 5 أميال أو 7 كم ) لاسيما من خلال المناطق البرية ، من أجل المتعة و الترفية، والممارسة، والتدريب العسكري، أو ما شابه ذلك.
وهي رياضة جميلة جداً وجديدة نسبياً علينا في مصر و تعتبر من الرياضات الصديقة للبيئة (Eco sports) زي التجديف و الدراجات الجبلية وتسلق الجبال. و ابتدت في الانتشار في شتاء 2012 و تحديداً لما حصلت الحادثة الشهيرة في كاترين وللأسف مات فيها اربع شباب مصريين قبل التاريخ ده كانت الممارسة مقتصرة على الأجانب و ب يمارسها بحرفية عالية و عدد قليل جداً من المصريين, و السبب الظاهر للحادثة أن عاصفة ثلجية قامت أثناء توجه الشباب لجبل باب الدنيا وده جبل من الجبال المهمة في جنوب سيناء في منطقة كاترين.أما السبب الحقيقي لوفاة الشباب هناك كان سوء التحضير للطلعة وقلة خبرة الدليل المرافق للمجموعة. من الوقت ده حصل اهتمام كبير بالرياضة دي من جانب الممارسين وقادة المجموعات ومنظمات المجتمع المدني وده أدى إلى تغيير شكل الرياضة اللي بقت علية دلوقتي من انتشار بين فئة الشباب ومع ذلك لسة قدامها كتير جداً عشان تطور في مصر.
احنا مين؟
كيان اسمه طلعه للتعلم بالمغامرة (TL3AH Outdoor Education)
مؤسسة أحمد النمر: مغامر ومدرب مهارات البقاء.
أسست الفريق من اربع سنين لكن بداية الشغل الفعلي كان أول 2016 معايا فريق شباب مغامر ب يحب الطبيعة والمغامرة ب يشتركوا معايا فى كل حاجة من أول التخطيط لحد التنفيذ عندى هوس بالطبيعة وشغف بالمغامره قرأت كتير فى الموضوع واتعرفت على ناس عندهم خبرة محترمة في مهارات البقاء اشتغلت على نفسي سنوات طويلة اتعلم واحضر دورات و اشارك فى أحداث و اجهز الأدوات وفيه ناس كتير ساعدتني زى مدرسه الصحراء ومؤسسيها حبيت استغل العلم اللى اتعلمته و انقله للشباب,
من هنا جت فكرة طلعه للتعلم بالمغامرة (TL3AH Outdoor Education)
بنعمل ايه؟
ب ستغل المعلومات النظرية والخبرة العملية و قاعده العلاقات اللى عملتها فى سنوات طويلة مع مديري المحميات ومع البدو والأدلة المحليين و بنصمم مسارات هايكنج جديدة و ب نضيفها على منصة جوجل للخرائط زيي مناطق الشقوق الزلزالية في أبو جالوم مثلا على الرغم من شهرتها وأهميتها وتفردها لم يكن لها وجود على خرائط جوجل و مسار بئر العقدة وادي الرساسة يعتبر مسار جديد للفريق وشغالين حاليا على توثيق مسارات جديدة في سرابيط الخادم و جبال التيه.
أماكن وأنشطة مختلفة
بنعمل كدة ازاي؟
من خلال برنامج موجود في كل الطلعات المحلية والدولية، كتيبات المعلومات والندوات الثقافية والدورات التقنية، وسوف يستمر فريق طلعه في تقديم وتطوير أفضل الحلول ليتم الاعتراف بها باعتبارها مؤسسة رائدة للتميز في السفر والتعليم في الهواء الطلق، الحفاظ على التراث الثقافي والاستكشاف.
عندنا سلسلتين أساسيتين ب نعلم بيهم المغامرين:
1. سلسلة تعقب مصر (Tracing Egypt) ودي بتبقى مدتها أكبر من 3 ايام و ب نركز فيها على اكتشاف وتسجيل الأماكن الجديدة والمخفية في مصر يتخللها تدريبات عملية على كيفية التصرف فى المواقف الصعبة
2. سلسلة اتخذ هايك (Take A Hike) ودي بتبقى يوم واحد أو يومين على الأكثر كل ويك اند عشان المغامرين اللي مش فاضية ب نركز فيها على حرفيات الهايكنج ومنافعه واستكشاف الأماكن القريبة من القاهرة بواسطة الرياضة الجميلة دي.
زائد طبعا عندنا كورسات ثابتة:
زي كورس تسلق الجبال للمبتدئين (Beginner Outdoor Rock Climbing Course) ده بيتنفذ فى دهب وحاليا ب ندور على اماكن نقدر ننفذ فيها فى القاهرة.
و كورس الغطس في المياه المفتوحة (PADI scuba diving open water course) وده كمان ب يتنفذ فى دهب وبيتم الغطس فى اجمل مناطق الغوص هناك
و كورس كيف تصبح دليل محلي (Into Local Guide) بالتعاون مع جوجل من أجل تصحيح وإبراز خريطة مصر على منصة جوجل للخرائط.
مواقف صعبة؟
بيقابلنا مواقف صعبه كتير لكن علشان ب نتخذ كل احتياطاتنا في التنظيم للطلعات بحمد الله كل المواقف عدت على خير لازم ننسق مع كل الجهات المعنية من مديري المحميات وشيوخ البدو و ب يكونوا عارفين كل التفاصيل للطلعه وخط السير بالظبط والأولوية دائما بتكون لسلامة كل الأفراد ب نلتزم دائما بالخطوط الحمراء اللي مستحيل نتعداها غير مقبول بالمرة المغامرة الغير محسوبة وغير مسموح بالتعدى باى صوره على الحياة البرية كل أفراد الفريق عارفين ان زجاجه بلاستيك صغيره ممكن تكون حاجه مدمره للبيئه من المواقف الصعبة اللى عدت علينا موقف وادي الرساسة و بئر العقدة كنا بنحاول نسجل مسار جديد طوله 15 كم ب يمتد من بئر العقدة بمنطقة أبو جالوم إلى وادي الرساسة عن طريق عمل اختصار للمسار الطبيعي للوادي(29 كم) بصعود الجبل والنزول من الجهة الأخرى وبعد 5 ساعات من الصعود والهبوط والسير على أحجار الجبل التي لم تطئها قدم أحد من قبل وصلنا لمنطقة الاستراحة ومنتصف المسار 7.5 كم و بعمل حصر لكمية المياه مع المغامرين استعداداً لإستكمال المسير اكتشفت أن المخزون المتبقي مع المغامرين لا يسمح بالتقدم فى المسار المخطط. هنا كان القرار بإلغاء المسار والرجوع إلى مصدر المياه بئر العقدة من طريق مختصر طوله 3 كم مخطط له مسبقاً ومع إصرار المغامرين المشاركين باستكمال المسار الجديد ل شغفهم بطبيعة المكان و حماسهم لتحقيق شيء جديد لكن كان عنصر السلامة المشاركين مهم والجميع تفهم الموقف وتم الرجوع إلى البئر مرة أخرى بسلام واستكمال باقي البرنامج بأمان.
آخر الأخبار؟
طلعة بتجهز دلوقتي لحدث فريد من نوعه فى مصر. ب نرتب حاليا لتدريب مجموعة من المغامرين على تنفيذ كود السلامة والمسؤولية على جبال سيناء (موسى, الصفصافة, كاترين).
المهمة:
تدريب المغامرين على تنفيذ كود السلامة والمسؤولية على جبال سيناء (موسى, الصفصافة, كاترين) عن طريق قيادة مجموعة من المشاركين المتوجهين لمشاهدة الشروق على جبل موسى والنزول بهم حتى فرش إلياس, والانفصال والتوجه لرأس الصفصافة مروراً بين الجبال ثم التوجه الى اخر وادي الأربعين للاستراحة والتجهيز للقمة الأعلى كاترين والتخييم على القمة والنزول بعد الشروق وإنهاء التدريب في الكرم.
المدة:3 أيام 3 ليالي – أكثر من 60 ساعة أعلى الجبال.
مستوى الصعوبة: من متوسط الى عالي.
سيتم اختيار و انتقاء المشاركين قبل التنفيذ.
لمزيد من التفاصيل: Tracing Egypt – Mountain Safety Code
دي كانت أول مقال عن رياضة الهايكنج وطلعة لتعلم بالمغامرة وان شاء الله قريبا مقالات متخصصة اكثر ومعلومات اكثر. دمتم مغامرين.