قصيدة سيرة شهيد

ابني حبيبي
رافض ليه تيجي تشوف
أمك في الحلم
خايف ؟
خايف لحسن أشوفك
أحزن أكتر
و أفضل أئن
خايف ؟
اشوفك لسه بتنزف
دمع و دم
لأ ماتخفش
يمكن لما تجيني
أهدا و اروق و يخف الهم
ابني الغالي
رافض ليه تيجي تشوف
أمك في الحلم
هو أنا ذنبي
بعد رضاعتك
أقعد الاعبك
و أغذي في روحك
روحك غالية
روحك عالية
لكن لو تحتاجها بلادك
اوعى تضن
ذنبي انا ايه
ان في يوم قلتلك
حب الناس كل الناس
حب الخال
و قبل الخال تحب العم
و لا أكون غلطانة
ان في يوم علمتك
أوعى تطاطي أو تتنازل
لما تهب رياح الظلم
فاكر يا ابني
اول سنة في دراستك
و انا وخداك على مدرستك
فجأة لقيتني واقفة بشدك
من مريلتك
و انت بتسحب نفسك مني
عاوز تجري تروح لزمايلك
و أفضل اشدك
فاكر يومها ايه قلتلك
اياك تهمس او تتحرك أو تتنفس
و انت بتسمع تحيا بلدك
هو يا أحمد
ينفع تهمس أو تتحرك
قدام ربك
فاكر يا أحمد
لما لقيتك من مدرستك
راجع عايط
و أسال مالك
تبكي تقول
أخدوا مكاني
لواحد غيري
رديت قلت
يمكن يا احمد عنده ظروف
جسمه نحيف أو نظره ضعيف
تديني ضهرك و بصوت عايط
لا يا امي
و الده يا امي
شغال مخبر عند الظابط
احضن فيك و أنا كلي دموع
و اجري اغير في الموضوع
بعد ما اقولك اصبر يا ابني
مصر دي ام
و عمر ماكان بيطول الظلم
لساك رافض تيجي تشوف امك في الحلم
فاكر لما بنوصل
نص الشهر
و انت تحس ان مفيش
كنت بشوف في عنيك القهر
و ما تقليش
و لما اتاخر عنكم في طابور عيش
كنت بتسال هي دي مصر
هي دي ام
كيف الام يا امي
تاخد منا و لا تديش
و انا اقولك لا يا احمد
احنا نموت و بلادنا تعيش
مصر دي بلدك
مصر دي عرضك
و الروح ترخص
لاجل الارض و لاجل العرض
ربك قال في كتابه ده فرض
و لساك رافض تيجي تشوف
امك في الحلم
فاكر و احنا بنركب الاتوبيس
انت تلف شمال و يمين
حوالين مني
لاجل ما يلمس جسمي خسيس
كنت ببص في عينك و افرح
و اهمس اقولك
مصر دي امك احسن مني و احسن منك
لازم تبقى عليها حريص
و اسرح و احلم
امتى هايجي اليوم و اشوفك
أحلى عريس
فاكر لما اصحابك
عملوا الثورة
و انت تقول انا نازل يا اما
رايح الثورة
رايح لاجل بلدنا ترجع حرة
فاكرة كلامك با اما
فاكرة علامك يا اما
مصر دي ام
مصر عشانها تهون الروح
و يهون الدم
يومها انا شفت في عينك نور
و فضلت راسي تدور و تدور
و يمها فرحت
اني عملت
راجل قادر ع الظلم يثور
شيء خلاني
افضل ابوسك
و افضل اضم
و انت في حضني
مش بتقول
غير مصر دي ام
مصر دي ام و لساك
رافض تيجي تشوف
أمك في الحلم
خايف ؟
خايف لحسن أشوفك
أحزن أكتر
و أفضل أئن
خايف ؟
اشوف جسمك لساه غرقان بالدم
لأ ماتخفش
بس تعالى
يمكن لما تجيني
أهدا و اروق و يخف الهم
و لا تكنش روحك خايفة
تحوم بمكان
لسة بيرضع
زل و غم