"البرّامين" فى آخر أمسيات هذا العام

اختتمت آخر الأمسيات الشعرية فى المعرض هذا العام، بحضور الشعراء "إسماعيل عقاب، مصطفى رجب، سعيد شحاته، عبده الزراع، محمود فهمى، محمود شرف، هشام العربى أحمد اللاوندى".
وكانت الأمسية الأخيرة قد بدأت بكلمة الشاعر السماح عبدالله والتى رحب فيها بالحضور.. بعدها ألقى الشاعر أحمد اللاوندى قصيدة بعنوان"البرّامين" يقول فيها:
كلنا ف الصف واحد
واللي واقف بَرّه مين؟
ناس بتحلف بك وتكذب
هما دول البرّامين
هما بيعينك وإنتي
اللي شريناها وباعِتنا
نفترق عنك يا سمرة
نلقى تاني الشوق باعتنا
أُحضني ولادك وشوفي
إيه منابهم م اللي نابك
كل واحد بِنْعي حَظُه
ولسه بِصرخ تحت نابك
واللي واقف برّه صقف
والمثقف تاه ف عصرك
نفض اللقمة اللي فاضلة
من إيديهم بعد عصرك
دحنا ياما أسينا منك
شوفنا بدل الويل ولين
بين جفا وعذاب ولكن
نبدله بأحضان ولين
كنتي ديما قبل روحنا
مغرمين بيكي وصبابا
من هواك تدبل جراحنا
وتنزرع فينا الصلابة
*****
حتى لما خليتي بينا
إحنا ما خليفناش وعودنا
والفروع اللي فتتنا
تشدنا وتخلع ف عودنا
خوفي يامَّه نميل تميلي
واعمل إيه لوعود جا مايل
ينحني ضهر الكرامة
وتنزع أرضك جمايل
تطرح العوزة ف ديارنا
وطرحها يضلل عليهم
وإحنا نتعرى وجسدنا
وعضمنا يفضل عاليهم
إحنا ف الكفة اللي رابحة
حفزينا بكلمتين
حسسينا إنك في ريحنا
خَلِّي يبقى الكيل متين
بصة ديما للي برّه
واللي بره مش ف صفك
فاتحة حضنك ليه وهو
بين غنايمه بإيده صفك
دي عشانى ودي عشانه
وسِبلي دي لأ دي ولا دي
وانتي ديما تنصفيهم
وتقِليلنا دول ولادي
قاطعة حبل الود بينا
وسايبه طرفه ف إيد لعين
يخطف البسمة اللي صابحة
والبريق من كل عين
هو والعصبة اللي برّه
حلفوا على نبتك ما طارح
إمتى هاتحسى بخضوعنا
وتفرشى حجرك مطارح؟