قصيدة ... ياقاهره .. من ديوان / لحد إمتى ؟

عَبَر عليكي كتير بشر
خَدوا كل شئ من حضرتك
إلا العِبَر
ياقاهره
وانتي الفريده في المدن
رغم التعب .. رغم الضنى
لسَّاكي قادره تطبطبي
على دا ودا
يا قاهره
لسَّاكي قادره تطنِّشي
وعلى الجميع بتحبِّشي
فى ليل الشتا
يا قاهره
يا زى طفله بتفرحي
بنجاح صغيَّر أو كبير
وبقلب أم بتصفحي
عن طعنه من واحد حقير
وعن اللي جه عز الشتا
شال الغطا
ياقاهره
لسَّاكي قادره تكمِّلي
ويَّا اللي مات عنده الخِشَى
واللي رفع
صُوتُه عليكي ولا اختشَى
واللي بجهله بيطعنك
جوَّه الحَشَى
يا قاهره
لسَّاكي صابره على اللي فاكر
إنه يقدر يغصبك
أو حتى يقدر غصب عنِّك
يِأمرك
أو مهما كانت قوِّته
يقدر يخالف مذْهبِك
أو مهما كان سحر ابتسامتُه
يخدعك
يا قاهره
على سبيلك من زمن
عَبَر الخليل
أما الكليم ...
بوحي من رب السما صبح الأمير
حتى المسيح
بيكي من الروم إحتمَى
صهر ونسب
منِّك وجب للمصطفى
ياقاهره
يا شمس تسرج للنهار
على ضهر ليل
وقمر بيغزل م السمار
رمشُه الكحيل
يا ناى بيعزف غنوتك
موال أصيل
يا نيل بيجري جوه منك
سلسبيل
لمَّا بيلمس كل ثانيه رقَّتك
ترقص ضفافُه لمَّا يسمع
ضحكتك
ويشوف عيون بدر التمام
على طلِّتك
يا قاااااااااهره