أعلنت الثورة على الفيس بوك..

وهأنزل إنتخابات ضده وإيه يعنى هو أحسن منى فى إيه
وأضح إنه عايز ثورة
وان رئيس الفيس بوك عايز يتغير
إما يحسن خدماته وإما يرحل
(هو يمشى.. مش هنمشى)
ثورة ثورة فى كل بيج بيج.. بروفايل بروفايل
جروب جروب .. لايك لايك
كل شوية يبعتلى رسالة على الميل وكأننا أصدقاء
ويقولى اجرى بسرعة الحساب بتاعك فى حد نفسه وهيموت ويعيط ويسرقه
طب اعمل ايه انا ابقى اسكت واستنى لما حسابى يتسرق
اجرى طبعا على حسابى وبسرعة أغير الباس ورد
وبعدين يسيبنى شوية وأول ما أفتح حسابى
الاقى طلبات طلبات وبعتلى رسايل
تعرفى فلانة ولا فلان ضيفيهم
طيب وإنت مالك أنا مش عايزه أضيفهم هو بالعافية
وكل شوية يقولى غيرى الصفحة الشخصية
فلانة ولا فلان غيرهم (بيغظنى.. وهو عارف إنى بتغاظ)
أو يجننى ويقولى أول ما أفتح الفيس
أنت لست Sabreina Hakeem
طيب أنا مين .. المشكلة إنى خايفة أصدقه مرة وأروح أدور على نفسى ومالقيهاش وقتها أعمل ايه.. أبقى مين
والمصيبة انى لو حبيت أدور على اسمى
ألاقى مليون واحدة اسمها sabreina
طيب سيبلى خصوصية شوية حتى إسمى بتوزعه
والاهم من ده وده
كل شوية يسمح بفتح صفحات مسيئة للاسلام
ويقولى خدى بالك فى صفحة مسيئة إجرى إبعتيها لأصحابك وإعملى عليها حظر
ولازم عدد معين طبعا
وفى الاخر يقولى الحرية.. لا مساس
طب وكان من الاول ليه
بتفتحها أساسا ليه
ما ترفض من الاول أنها تتفتح
ولا هى حركات وبس علشان تجمع الناس وتشغلهم
عموما بعد كل اللى بيعمله ده
قررت أعمل عليه ثورة
وأول ما نزلت الاعلان فى صفحتى
قفلى الصفحة 3 ايام
بس ولا بيهمنى فتحت حساب تانى وثالث ورابع
ويبقى يورينى هيعمل إيه
ثورة ثورة.. الى الفيس الى الفيس
وهيشوف مين اللى هينتصر فى الاخر
وعلى فكرة فى أعضاء ما صدقوا واضح إنهم شايلين منه قوى
أصله بيتدخل فى كل حاجة
ده ناقص يقولى عندكم غداء ايه النهارده
إسمك وتاريخ ميلادك
العائلة والاصدقاء
بتحبى إيه.. مخنوقة من مين (طبعا مش قادره اقوله منه)
فاضل يسألنى عن عنوان بيتنا ورقم الموبايل
ربنا يستر ومالاقيش حسابى إتعمل عليه حظر
لو مرجعتش خلال 48 ساعة
أبقى روحت طره بوك