ابن الفقير

يا ابن الفقير
أوعي تشكي
م الغلا
ولا تعمل بلبلا
أو تقول
بقي فيه مجاعة
في البلاد
هيه إيه
بقت اختراعه..؟
كل ساعة
مشكله
قول تمام
سمعا وطاعة
وان سمعت
قول إشاعة
مش إذاعة
هيه ولا....
ولا إيه المسألة..؟
وان لقيتها
صداع وخل
والكلام
أصبح ممل
هوَ حل
يا ناس بسيط
ع الغلا
تعمل عبيط
أوعي دمك
يوم يشيط
أو تزيط
خليك ظريف
نام خفيف
يعني بناقص
م العشا
طول حياتها
ملطشة
ويَّا أهلك
وأنت حالتك
بالبلا
يعني تشرب
م البحور
مش مهم
ولا تسكن
في القبور
مش مهم
المهم إن القصور
مش ليك يله
الغي عقلك
خلي جهلك
للأمور
هو الأساس،
أوعي تعمل
فيها عنتر
دا الشعوب
يا ما فيها ناس
غاوية الكلام
والفرفشه
وأنت برضه
مش ح تقدر
والمشاكل
مالها لازمة
وان قالو لك
قول دي أزمة
أيوه أزمة
ومرحلة
يابن وطني
لا تشاكل
أنت مش
قد المشاكل
أنت بس
غَنِّي وطبل
قوم وهَبِّل
قول براحتك
بس وحدك
في الخلا
أو يسمع حد بيك
يشتكيك
يطحنوك
زي الفريك
يبقي يومك
قندله
ولا تنهيها
بعلقة حلوة
ولا غَلْوَة
تنسي فيها
المرجله
وأما تغلي
أي سلعة
قول بناقص
منها خالص
أنت ناقص
بهدله..
لو يزيد
السعر لِمّْ
في الغدا
أو مش مهم
ضم إيدك
في الفطار
والخضار
منه بناقص
في العشا
والرغيف
لو مش نظيف
أو خفيف
ولا طعمه
جلد ليف
ولا شكله
عاد مخيف
قول بناقص
منه خالص
ولا يعني
هوَ كيف؟
كل وجبة
بالغموز
هو يعني
جوز ولوز
ولا عيش؟
اعتبر..
انه ما فيش
يعني عيش
يعني قصر
في الكلام
والعلام
مش شرط يبقي
في مدرسة
والهدوم
علي جتتك
متقطعة عامله
زي البردعة
قديمة
بس كويسة
يعني مش
لازم تغيّر
كل يوم
ع العموم
مهما كان
جيبك مفلس
برضه عيش
أو تغلط
أو تغلس
وأوعي تطلع
م الهدوم
لا النجوم
تفتن عليك
ما تلاقيش
وفي ايديك
تلبس أساور
من حديد
والشاويش
تلقاه معك
لأ.. وتلبس
إيه بقي..؟
قول جريمة
قول قضية
قول حبال
المشنقة
قول... وقول
قول بريء..
قول ضحية
في النهاية
هيه.. هيه
طرحة..
علقة ميه.. ميه
وأنت جسمك
عمره واخد
ع الشقا
واللي نحس
مش ه يشعر
لما يفطس
ولا يغطس
في الهموم
حتى لو
تعرف تعوم
برضه ه تودع
فطيس،
والنصية..
كون حريص
قبل ما
تلبس قميص
الجواز
خلي عينك
ع الجهاز
دا المهور
ولعة.. وجاز
وأنت بيتك
من قزاز
ما تحدفش الناس
بالطوب
وأوعي تمشي
بالحبوب
لو تبقي
في يوم عريس
وأن بقيت
لا تفكر يوم
تخلِّف أو تولِّف
يوم تنام
أو تقيِّل
كل قيلولة بعيل
والحكومة تشيل
وتصرف
ع العيال
يعني مش
لازم تسيب
ليك فروع
أو مجرد احتمال
للوجود
من أي نوع
كون قتوع
يا للي مش
لاقي وعمرك
كله جوع
إيه اللي واخده
من حياتك
إيه..؟
ما فيش
يعني أصلا
أنت مش
مفروض تعيش..!!
***
قصيدة (( ابن الفقير ))
رابط القصيدة علي اليوت يوب فديو
http://www.youtube.com/watch?v=sbqomYrg4ok&feature=related
==========
ايميل الشاعر
mabouzeid87@yahoo.com