المقامة الاسرائيلية ( الممنوعة من العرض )

المقامة الاسرائيلية ...حكالنا حنفي بن تامر وقال :-
رحت لاستاذ مجدي , لقيته شكله زعلان , قولتله : ايه يا ريس مالك , ايه اللي شاغل بالك , قال : احوال البلد دي , عايز امشي واسيب البلد , انا عايز اعيش في بلد , مافهاش حاقد ولا حاسد , مافهاش ظالم ولا فاسد , مافهاش تنظيم ولا حزب , ما فهاش نصب ولا غش , ولا حد ب 60 وش , ولا مسح جوخ وكذب !! ,
مالهاش ف المحسوبية , مافهاش استهزاء بيا , قولتله : دة مستحيل , يحصل كل البلاد , يا عم فيها فساد , قال لي : إلا إسرائيل !! , قولتله : ايه ؟ اسرائيل؟ , قال : ايوة هي الحل , اسرائيل هي الحل , دولة نضيفة ع الاقل , مافهاش دكتاتورية , دولة ديمقراطية , فيها ساعد على ساعد , الناس فيها بتساعد , بعض عشان تتعلم , وتنهض و تتقدم , دولة مساواة وعدل , وعلم وعمل وعقل !!
من كلامه اتصدمت , وكشرت وكلضمت , وقولتله : اسرائيل ؟ , قال لي : ايوة اسرائيل , دولة لها طبع أصيل , بتحافظ على شعبها , بدمها وقلبها , دي عشان عسكري عبيط , إسمه (جلعاد شاليط ) , اديتنا بالشلاليط !! , في غزة ولبنان , وعشان (حسن نصر الله) , خطف منها حي الله , جثتين اتنين , بسبب جثتين , ضربت كل لبنان !! , مش احنا المصريين , بنموت ف العبارات , وحوادث القطورات , ولا دية ولا مسئولية , واما نسافر للخارج , بنتجلد ف الخارج , لا سفارة ولا قنصلية , يعبروا اهالينا , ولا يسئلوا فينا , مالناش قيمة ..تافهين !! , مين احنا يعني يا حسرة ؟ , ..لكن اسرائيل الواحد , عندها بالف واحد , بتشوف تبادل الأسرى؟
اسير اسرائيلي = 1024 أسير عربي
هماا واحد جيجا , واحنا واحد ميجا !! ,.. ادي يا سيدي اسرائيل , وطبعها الاصيل , فحفاظها على اولادها , وعلى خير اجنادها , ...لكن احنا عندنا جنود , بيموتوا ع الحدود , بالميات والآلاف , ولا من دري ولا من شاف , ولا حد بيسأل فيهم , ولا لينا دعوة بيهم , كبيرنا نسد وداننا , ونقول شهداء ف الجنة , ماتو ياحرام برصاص , الغدر وخلاص , لكن مناخدش موقف, هو احنا لينا موقف؟؟ , ما احنش بتوع مواقف , (الرجالة مواقف) , واحنا مش رجالة , احنا عيال بريالة , وستات لافة طرحها , على طول قاعدة مطرحها , بتنهنه وتعيط , وبتلطم وتصوط , ...دة اللى احنا قادرين عليه , ادي حكايتنا يا بيه , ادي ايامنا اللى فاتوا , ايوة باسيدي اللى ماتوا , ظلم مننا , غصبن عننا , لا بنهتم بيهم , ولا بنسأل فيهم , مالناش اى دعوة , كل اللى حيلتنا دعوة , ورا شيخ جامع جميل , يقول لنا : لبيك , اللهم عليك , بدولة اسرائيل , وبجند اسرائيل , اللهم زلزل , أقدامهم وجلجل , اذانهم يارب , يتم اطفالهم , رمل نسائهم , وارزقهم بكرب , يارب عليهم شدد , ..واحنا وراه بنردد , ولا الضالين آمين !! , كدة احنا مجاهدين !!!
ينفع حد ضربني بإيده فقلبي .......... اقف واقول له : روح ضربة فقلبك ؟ !!
مستنيين ربنا , ينصرنا على عدونا , بالحظ والقدر , زي ما انتصر , لجدودنا المسلمين , في غزوة الاحزاب , طب دول اعدوا العدة , وفكروا بعد مدة , واخدوا بالأسباب !! , دول كانوا مجاهدين!! ....لكن احنا يا صاحبي نمنا , وحلمنا وهمنا , بالنصر والصعود , منغير أدنى مجهود !!
دولة ولادها بيتهانوا .......اوى وهما ف الجيش
دولة ناسها بيموتوا ........علشان رغيف العيش
ينفع تنتصر ؟ , لا يمكن تنتصر , ابدا على اسرائيل , احنا نحارب اسرائيل , بالمسلسلات , والافلام والكلمات , ايوة نحارب اسرائيل , بفرقة (ناجي عطا الله ) , وشعار (حسن نصر الله ) , وب (رأفت العجان ) , وب(جمعة الشوان) , بالشعر وبالخطابة , في (سينا ) و(طابا ) , وبالاغاني كمان , (انا بحب اسرائيل ) , و(انا باكره اسرائيل ) !! ..., مش بنحارب بالعلم , والايمان والفلاح , والجيش والسلاح , لأ بنحارب بمسلسل , او برنامج مهلهل , او غنوة او فيلم , او رؤية او حلم !! ,.... وكمان بنحارب بعض , بمشاعر حقد وبغض , مالناش فبعض خير , كارهين لبعض الخير , لكن الاسرائليين , مع بعض متضامنين , ف التوراة متحابين , لكن احنا يا اسفاه , مش متحابين ف الله , رغم اننا مسلمين !!
قولت : فدي عندك حق , قال لي : ربك والحق , يكفي ان اليهود , عملوا دولة بيهم , سموها باسم ابيهم , الاكبر ونبيهم , سيدنا يعقوب , ولعلمك يا حبوب , اطفال الحجارة , اللى بيرموا الحجارة , على جنود اسرائيل ,...يعتبروا اكبر دليل , على عظمة اسرائيل , قولتله : ياسلام ؟ معقول ؟ , قال لي: الحكمة بتقول : ( لا تقذف بالحجارة سوى الدولة المثمرة ) !!
ولعلمك اليهود , هما اسياد العالم , بيتحكموا ف العالم ,اقرا كتاب (اليهود ) , بيقول فيه الحج لبيب , :- (للعالم تلابيب , مسكاها تل ابيب) , اه طبعا اسرائيل , بتحكم وبتتحكم , ف العالم كله يا فندم !! , واحنا شوية براميل !!
قال حنفي بن تامر : بعد ما مدح اسرائيل , واهان القومية , الشعبية العربية , فهمت انه عميل , ..ما بقيتشي متحمل , انه يسرد ويكمل , قولتله : اسكت يا خاين , دمنا نهارك باين , نسيت انت اليهود , خلافين العهود ؟ , خلاص انت نسيت , احتلال فلسطين , وتمانية واربعين ,, وستة وخمسين , وسبعة وستين, مش الاسرائيلين , برضة نجسو الأقصى؟ !!, وحرقولنا الاقصى , في تسعة وستين؟؟!! , والا سيادتك نسيت , قتل الانبياء , وقتل الابرياء , والقادة والزعماء , والسادة والعلماء , ..هه ؟ سيادتك نسيت , قتل المجاهدين؟ , ومذبحة دير ياسين؟ , وقتل الشيخ ياسين؟ , ..دول ناس ربنا لعنهم , في قرآنه واهانهم , دول قردة وخنازير , وعلى قلوبهم جنازير !! ..,فاكر قال ايه فرهود , فكتابه (اليهود , وتكبر قوم هود ) :-
عمري ما شوفت يهودي بيبكي الا قدام حائط المبكى
دول عالم قاسية ويا خوفي يدخلوا بعد القدس مكة !!
وتقول لي اليهود , الخنازير القرود؟ , فكك ياعم بناقص , انا اصلا مش ناقص , كلام وحش انهزامي , وسع كدة من قدامي , بعدين سيبته ومشيت , وروحت على البيت , وانا زعلان من رطنه , ومن خيانته لوطنه ....والختام