مبارك بعد ما مات

عبد الناصر والسادات .. سألوا مبارك بعد ما مات
إيه يا مبارك سبب الثورة .. رد مبارك قال ده الشات
عيال كات هايفة ومش شايفة .. وملهومش في البال حسابات
ناصر قاله إوعى تكمل .. أجدادهم بنو أهرامات
والسد العالي في عهدي بنوه .. بالهمة قبل العضلات
ده شباب واعي كان الداعي .. تديهم تعظيم سلامات
تقدم ليهم ولأهاليهم .. قبل الغَضبة ورق كشوفات
ثروة مصر لكل ولادها .. مش ضمن حِساب أو تركات
أنور كمل قاله استنى .. ده مبارك قائد مطارات
مهارة كبيرة في حرب أكتوبر .. طيران طاير كالفراشات
بارليف بإديهم نسفوه .. ليه توجه ليهم إهانات؟
إيه يا مبارك سبب الغُمة .. في التحرير ويا الأزمات
ده أنا سايب من بعدي الأمة .. عُهدة من ضمن الأمانات
ليه تحرم شعبك بالذِمة .. من حقه في حتى الزيادات
يجي الغلا ياكل في فلوسهم .. بعد ما تدِيهم علاوات
ده انت النائب ليه تتاوب .. والميزانية في إيد عصابات
يفهم إيه ابنك في الوطني .. تديله أمانة السياسات
فتحي سرور صفوت مع عزمي .. غَموا عنينا وقالوا إشاعات
زرعوا في مصر بدل الخُضرة .. مساحات جامدة م الخرابات
حَبوا يولعوا نار الفتنة .. بين إسلامنا وبين راهبات
جَنوا على مصر في يوم الحِنة .. شنوا عليها في ضلمة غارات
يخربوا فيها وينهبوا خيرها .. مش سامعين حتى الهتافات
خِلص كلامي معاك يا مبارك .. بعد الوقت كله ما فات
هِنا في الآخرة .. شوفلك صِرفة ..مش أموال قصدي الحسنات