مصباح علاء الدين ( مقامة )

اخبرنا ميمون ابن لبيبة القرداتي فقال :
يوما ما وانا ماشي ف الطريق عند الصباح , تاتة تاتة مثلما البطريق لقيت مصباح , فقلت لعله دة ..مصباح علاء الدين ولقيته , من حسن حظي عشان.. احقق كل ال اتمنيته , ثم دعكته فطلع منه ... دخان اسود ورصاصي وبني كمان , ففضلت اكحكح واقول :.. يخرب بيوتكو ما تصلحوا الشكمان ! واذا بصوتن رخيم يقول... مين اللى طلعني برة ؟ , فاجبتو بصوتن واثق : انا ال طلعتك م الجرة , فقال : يادي الوقعة! , الجو شتا وسقعة , وانا كنت ف السرير , مستدفي تحت لحافي , منك لله يا شرير , علشان طلعتني كدة حافي .. دا ال بيخرج من داره , بينقل مقداره ,وخصوصا الايام دي ..فقلتو لهو : يا افندي ؟...بصلي هنا ... فقال : عايز أيه ؟ فقلتو : انا بيتهيألى , ان حضرتك عفريت .. بتعمل الحاجة فساعتها , لو سمحت عاوز كاسارولة فيها سجق مقلي , فقال لى : انت شايفني ..شغال في مصمط ياحيلتها ؟ , فقلتو لهو : مش دة مصباح.. علاء الدين يا عم المارد , فقال ليا : ايوة هوا ..دا المصباح يا عم البارد !!
فقلتو طب ليه ما بتقولشي.. عبدك وبين اديك شبيك لبيك ؟ , وتقوللى اتمنى حاجة...وتحققهالي وانا زي البيك
فقال ليا: انا مش عبد ...عند حد انا عبد لله , والطمع ف الدين واللى... بيقدم الخير بكرة يلقاه , فقلت : اانت عفريت كدة ؟ , ام شحات ف السيدة ؟ ..انا ليا سبع طلبات مجابه .., هتحققهم يعني هتحققهم ..
فقال لي : , بملأ فيه ,...بطل تتابع افلام عربي ...واهتم شوية بالغربي ..فقلتو له : يعني انت مش هتحقق ولا امنية , دا ايه الحظ لاسود دة ....يا لحظي الملعون , طب ممكن اطلب اي حاجة انشا الله اغنية ؟ , فقال : هو انت فبرنامج ما يطلبه المستمعون ؟ خش على النت وحمل.. الغنوة ال انت عايز تسمعها , وماتكسلشي وتتنبل ...مرارتي مش ناقصة واحد يفقعها ! , فقلتو طب اخبرني عن ...علاء الدين وكيف شقى وعانا ؟ , فقال لي ما باحبش اجيب ....سيرة حد مش موجود معانا ...الغيبة والنميمة, من الصفات الذميمة , ممكن اخش ف المصباح بقا؟ ..انا مليت , فقلت طيب ممكن اخد ..صورة معاك يعني كدة.. تذكار؟ ,علشان اما احكي لحد ..اني فيوم لقيت , مصباح علاء الدين الناس : ما تقولشي عليا دا واد فشار ؟فقال: ما باتصورشي ومش ..باحب اطلع ف الصور..شيت , فقلتو له طب اخر طلب؟ ..ممكن تمضيلي ع التشيرت؟فزمجر ودخل ف المصباح ..دون ان يستأذن مني ..فقلت : يبدو انهو ...حضر عهد الانفتاح , وفضلت ادعك ف المصباح ..لقيت واحدة بتقولي عفوا , لا يمكنك الاتصال ..العفريت غير متاح , فقلتو في نفسي اكيد , المصباح دون تقليد , تلاقيه كوري او تيواني , والا صيني أو ياباني..وهنا يحدثنا ميمون قائلا : ثم وضعتو المصباح..مطرح ما خدته بهدوئن وسلامي , ومشيتو ابحث عن مصباح.. نوكيا أصلي يحقق لي أحلامي.... والختام