جمهوريه مصر العربيه

انت عارف يعنى ايه
لما تشوف الغروب
وقت المغربيا
لما تمشى وسط الخضره
وتلمس ندى الزرع
وقت الفجريا
لما تاخد مراتك وولادك
تتمشوا ع النيل بالليل
وتشوفوا الولاد
وهما بيعزفوا ع السمسميه
لما تلاقى الدنيا ضلمه
وانت مش خايف
من الحراميه
لما تكون راجع من شغلك
بالليل اوى
وتلاقى واحد بيقولك
تعالى اوصلك بالعربيه
لما تحضن حبيبك اوى
وانتوا بتسمعوا اغنيه
لما قلبك يفرح
والبت الحلوه
بتبص م المشربيه
لما قلبك يدق
وانت ماسك ايد حبيبك
فى حرم الكليه
لما جسمك كله يعرق
وهى بتقولك بحبك
يا نور عينيا
لما تاخد ايد راجل عجوز
وتعديه الطريق
بطيبه وحنيا
لما ست كبيره تعبانه وقاعده
وتطبطب عل كتفها
وتسقيها شويه ميه
وتاخد بطاقتها وتقف فى الطابور
وتجيب معاشها
وتديها النقديه
لما تلاقى وقت الفطار فى رمضان
الملايين ع الطريق
بيوزعوا ع الصايمين عصير وأكل
ايه العظمه ديا
انت عارف يعنى ايه
كل اللى فات
يعنى ناس عايشين
بطيبه وحريه
طب انت عارف
كل اللى فات
هتلاقيه فين
هتلاقيه فى
جمهوريه مصر العربيه