إنت ليه مش زي بابا؟

للأسف جوازات كتير أوي دلوقتي بتنتهي أول ما تبتدي.. والسبب الخايب اللي الناس بتردده هو إن (العروسة أصلها متدلعة أوي).. بس مش ديه الحقيقة.. البيت بيتخرب لأن البنت مبتلاقيش في بيت جوزها الأمان.. آه بيبقي فيه جبنة رومي ولانشون وعيش ريتش بيك وراجل اسمه مكتوب على باب الشقة.. بس مبيبقاش فيه الأمان اللي كان موجود في بيت أهلها.. البنت لما بتسيب بيت أهلها بتكون خايفة وبتفضل تدور على مكان تطمن فيه ويحتويها.. ولأن البيه دايما مشغول ومسحول في ماتشات "البلاي ستيشن" وحجر "المعسل" ولو فكرت تكلمة تقوله إنها حاسة بوحدة بيقولها (ابتدينا النكد)! فمبتلاقيش مكان يطمنها غير (حضن بابا).. البنت دايما بتدور عالأمان لو لقيتة عندك وفي بيتك، عمرها ما هتسيبه ولا هتسيبك.
"هو إنت ليه مش زي بابا؟" سؤال بتسألة كل زوجة شابة لجوزها، وللأسف الشديد أوي إن الزوج دايما بيفهم السؤال ده على الجانب المادي فقط.. فهنلاقي إجابته بتدور بين (ليه هو أنا حارمك من حاجة ما أنا لسه جايبلك بلوزة لاكوست بالشيء الفلاني) أو (لأ ماهو مينفعش تقارنيني بأبوكي لما أبقي بأقبض زي ما أبوكي بيقبض أبقي تعالي واسأليني) وفيه اللي بيرد بجملة (ياااااه عالدلع) كل الردود السابقة ملهاش أي علاقة بالسؤال.. عزيزي الزوج السؤال كان (إنت ليه مش زي بابا؟)..مش (إنت محفظتك ليه مش قد محفظة بابا؟)
ها في إجابة؟
ولأن دايما مبيبقاش فيه إجابة غير (لأ بقولك إييييييه أنا معيشك في نفس المستوي اللي باباكي كان معيشك فيه) يا أخينا والله المقارنة مش في المستوى المادي خالص المقارنة في مستوى الأمان والحب والحنان.. برضو بيرد يقول (لأ بقى أنا زي باباكي وأحسن كمان).. الزوج المصري الأصيل لا يقتنع.. لا يستوعب!! بص يا سيدي باختصار كدة أنا هأقولك بابا كان ولسه بيعمل إيه.. وإنت أحكم بنفسك إذا كنت إنت زيه ولا لأ!
بص يا سيدي بابا.. عمره ما كان يزعلني.. ولو شافني ببكي يجري يضمني في حضنه وميمشيش غير وأنا بضحك.. بابا كان حنين عليا أوي.. حتى في عز الخناق بيني وبينه حنيته بتبقي باينة عليه.. بابا كان بيفرحني دايما.. مكنش يعرف ينام غير وأنا بضحك.. كان أول ما يقعد ع الغدا ميحطش لقمة في بقة غير ما أكون قربت أشبع.. كان بيحب يطمن إني كلت وشبعت.. لما كنت بقولة كل يا بابا.. يرد يقولي (أنا بشبع لما ألاقيكي شبعانة).
عارف إن بابا لما كان بيمر بظروف مادية وحشة.. عمره ما كان يزعقلي ويقولي (أجيبلك منيييين ومعيييش زفت فلووووس) لأ والله عمره.. بابا كان بيفهمني بالراحة ويحضني يقولي معلش وهعوضك.. حضنه وضمته ليا كانوا أحسن ميت ألف مرة من طلبي اللي ماتحققش أو من الخروجة اللي مخرجهنيش.. عارف إن بابا لما كان بينزل يروح مشوار عمره ماكان بيجيب لنفسه بجنيه لب بس لازم وهو راجع يجيبلي عشا أو شيكولاتة معاه، مكنش بيقدر ياكل برا من غيري أنا وماما.. عارف إن بابا ملهوش حياة خاصة بيه.. حياته مامتي وأنا.. عارف كده؟
ولعلمك كمان بابا مبيروحش قهوة ويسيب مامتي قاعدة تكلم نفسها.. ولا حتى يعرف يعني إيه بلاي ستيشن.. بابا مكنش بيفضل طول ماهو قاعد معانا ماسك موبيلة وباصص فيه.. بابا كان بيحب يقعد معانا.
عارف كمان إن بابا كان يوم الجمعة يصحينا قبل الصلاة عشان كان بيبقى محضر لنا فطار جميل، الطعمية السخنة والعيش الطازة.. آه والله كان بينزل يوم أجازته مخصوص عشان يجيب لنا الفطار وبعد ما نخلص فطار كنا نتلم سوا قدام التلفزيون وشوية وننزل نخرج.. الخروجة كانت بتبقى حلوة.. حلوة أوووي يمكن تكون مكنتش في حتت غالية زي اللي بنخرج فيها أنا وإنت لأن وقتها هي دية كانت الخروجات، كانت يا إما النادي يا إما عند قرايبنا بس بجد كنا بنبقى مبسوطين أوي، لأن بابا مكنش بيبقي مستعجل إنه يخلص الخروجة عشان يروحنا ويلحق يروح لصحابه ع القهوة!
عايز تعرف كمان إنت مش زي بابا في إية؟
بابا كان بيحبني..حنين عليا..طيب أوي
بابا عمره ما كان سبب في دمعة تنزل من عينيا
بابا عمره ما ضربني ولا هانني
بابا عمره ما حسسني إني جماد
بابا عمره ما جه عيد ميلادي وقالي (عايزة تورتة ولا مش لازم أنا بقول نجيب جاتوة أصل التورتة كبيرة وبتفضل في التلاجة)
بابا عمره ما سابني متضايقة ونزل يروح القهوة
بابا عمره ماشافني عيانة وقالي "فكك من التمثيل"
بابا عمره ما احتاجته وملقتهوش
بابا دايما جمبي ومعايا.. حتي بعد ما مبقيت مراتك.. برضو بابا هو اللي مالي مكانك
بابا عمره ما سابني واقفة مع ميكانيكي ولا سباك ولا نجار ولا كهربائي لوحدي
بابا كان دايما معايا.. ولسه معايا
فاهم يعني إية (معايا)؟
فهمت يعني إيه بابا؟
لو خطر في بالك إنك بعد كلامي ده تقارن مراتك بوالدتك فاعرف وافهم إن مراتك بتغسل وتكنس وتنضف وتطبخ وتحمل وتأكل وتحمي وتلبس وتودي مدارس وتذاكر وتودي تمارين وتربي وتجامل وتكوي وتستحمل قلبة وش حضرتك وفي آخر اليوم بتلاقيها قاعدة مدارية هدتها ووجع ضهرها ورا ابتسامة.. م الآخر مراتك مش ناقصها غير حاجة واحدة عشان تبقي زي مامتك.. عارف إيه هي؟ إنها تبطل تسألك (إنت لية مش زي بابا؟) لو عايزها تبقي زي مامتك تمام جاوبها عالسؤال إجابة عملية.. وخليك زي بابا
ها هتعرف؟