سيد منير عطيه يكتب : مهما تشبع

خد نفس م الحب واوعى
يوم تردُّه
أى باب للبُعد سدُّه
وأنت ح تعيش فوق حياتك
عمر أكبر من سنينك
ألف مرّة
كل حاجه انشالله مُرّة
رح تكون بالحب سكر
خد نفس م الحب واسكر
وابتدى تفتح وريدك
للحبيب يتدارى جوّة
كون تمللى حضن أدم
اللى كان الكون لحوّا
واوعى تفتح باب لغيره
دى الرياح ف الغيره نوّة
تهدم البنيان وتهدم
معبد الأحلام ف ليلة
اوعى تبقى ف لحظة ساذج
أو تكون شمشون دليلة
دى البداية الساذجة توصل
للنهاية المستحيلة
وانت لسّه ف أولى بادئ
يعنى لسّة سنين طويلة
لو عايزها تكون جميلة
خلّى أحضانك مواني
خلّى جوّة القلب مرسى
صب من أبريق مشاعرك
والحبيبة ح تبقى حسّة
مهما تشبع برضه لسّة
طعم أجمل م اللى فات
رح يفيدك بكرة حتما
لمّا تقرا الذكريات
إرمى طعم المُر برّة
لم شهد من الساعات
دى الحياة سكّر نبات
لمّا بالأشواق نحلي
إبنى جوّة القلب معبد
للغرام والحب صلّي
إوعى م الأوهام تخلّي
ركن ضلمة يدارى شوفك
إصنع الضى المناسب
واللى يتحمّل ظروفك
واما تمشى ف سكّة عتمة
إمشى دوغرى ودارى خوفك
إوعى حد ف يوم يشوفك
وانت مدبوح المشاعر
خلّى جرحك يبقى مخفي
خلّى قلبك قلب شاعر
يصنع الحلم المغاير
لمّا ينطق بس كلمة
يمشى وبنبضه المغنّي
مهما تبقى السكه ضلمة
خلّى قلبك يبقى نجمة
تحدف الضى المباغت
فوق رصيف الإنهيار
يومها تبقى الدنيا جنّة
مهما كان ف الأرض نار
خلّى قلبك باختصار
يبقى وقت الشِدّة أب
يبقى وقت الحب حب
يبقى وقت الضعف إبن
يبقى وقت الطيبة أم
رح تشوف للدنيا معنى
رح تشوفها بلون وطعم
حتى لمّا كابوس يزورك
رح يشدّك ألف حلم
بس صدّقنى الأهم
رح تعيش من بعد عمرك
عمر تاني
عمر تالت
عمر ألف
طول ما نازلة الدنيا لف
رح تكون عنوان لقصة
ما انتهتش