يمكن عمري بقى 90

لوحة اتنقشت سرعة خيل
مسافة الليل
تغير زاوية و تظبط ميل
شفاف لون المية وأزرق جايز لون السيل
ورق اسكتش عريض
على الوانك مفيهوش حيل
ينطق طول ما بترسم ضحك وحب ودمع و ويل
لوحتك إنت بطل حكايتها
نهايتها نسخة لبدايتها
مهما وصل بيك الإحساس
مهما اللوحة هتبهر ناس
مهما هتبدع برضه هتسمع
اللي يقول لك فيه اقتباس
مهما تعيش اللوحة سنين
عمر العمر ما كان مقياس
مهما تخبي صوت الفن
بيوصل من ورا 100 ترباس
وانا خبيت لوَحي وعمري
في حجاب غامق قال ده إطارها
لوحي مكانها
كان اتيليه الشعر الابيض تحت الطرحة
عمر ما كان لبسي الاسود
معناه إني نسيت الفرحة
صحراء حزني تبان لك بور
لكن حبك شجرته طارحة
نفسي الشوق على قد ما ياخد
يدي علاج لأمالي الجرحى
لسة باحس إن أنا طفلة
عايزة اتدفى في حضن عيلتنا
لسة باحس بصوت لمتنا
كل ما ازود بيت في الشعر
بشم فشعري ريحة بيتنا
ياما حبينا بصدق وفرحة
وعمر الفرحة ما يوم حبيتنا
لسة من ورا طقم سناني
في طعم الحب بادوق وبقرمش
لسة بشوفك كل ما بارمش
لسة بحبك قد الشعر
وقد الضي في وشي ما كرمش
لسة ورقي ضفايره طويلة
عايزة تغني تقول وتعيد
لسة بموت في جمال رمضان
وأفرح أول يوم العيد
سني يمكن بقى تسعين
بس شبابي في قلبي وعيد
كل ما بكبر بيك بتصبر
لُقانا الجاي ماعدش بعيد
شاهد رمشي إن إنت في وشي
مرسوم ذكرى بين التجاعيد
اوعى العمر يخليك تمشي
وتقول قلبي ماعدش سعيد
عمر الحلم ما بطل يرقص
لو اللي بيحلم أصله قعيد
وانا احلامي سكوت في كلامي
حلمت يسود الكون ده سلامي
حلمت الفن يعلن دولة
ترفع فيها الناس اعلامي
حلمت تكون لي بطل أفلامي
وأكون لك أنا أجمل إنسانة
حلمت تقول حبيت فنانة
ياما غنيت انغام دفيانة
ليه خدني لحني على خوانة؟
ليه بنتغطي في وقت النوم
والأحلام تطلع بردانة؟؟
املك لو هيدفي أمالك
هتعيش لو فكرك منبوذ
عمر القافية ما كانت هي
اللي تخلي الشعر يبوظ
مهما يبث اليأس في قلبي
الارسال دايما مهزوز
لو كان فيه في العمر رجوع
عمري ماهرجع لو ده يجوز
صدق حلمك .. مهما هتكبر
عمر الحلم ما يبقي عجوز