بابا ... علمنى حب الوطن (2)

عدت بالأمس من لقاء انتخابى جماهيرى لصديق عزيز مرشح بانتخابات الشعب الحالية ، واستقبلنى كرم كعادته اليومية فوجدته ينظر إلى ما بيدى من صور للصديق المرشح قائلا : دى صورة مين يابابا اللى معاك .دى صورة عمو يا حبيبى نازل الانتخابات يا كرم علشان ينجح إن شاء الله ويبقى فى مجلس الشعب و يراعى مصالح الناس والبلد.
بص يا كرم لما تكبر ويبقى لك صوت انتخابى – يعنى أيه صوت انتخابى يابابا ؟ يعنى لما تكبر وتروح الجامعة ويبقى عمرك 18 سنة تبقى تختار الراجل المحترم اللى الناس بتحبه وهوه بيحب مصر تختاره علشان يتكلم عن مشاكلنا فى مجلس الشعب ويدور لها عن حلول .صح يا عم كرم ؟ صح يا بابا .يبقى إن شاء الله لما تكبر هتختار مين ؟ اللى بيحب مصر ويعمل الخير لها ولأهلها . كرم يابنى أنا عاوز أقول لك حاجة تانية مهمة .قول يا بابا . عارف المظاهرات اللى كانت فى مصر دى كلها علشان أيه ؟ علشان مبارك يمشى يا بابا .تمام تمام ،وليه يمشى ؟ عارف ليه يا كرم ؟ علشان هوه وولاده وأصحابه كانوا وحشين وخربوا مصر يبقى كان لازم يمشوا كلهم صح ؟ صح يا بابا . أنا بقى عاوزك لما تكبر إن شاء الله لما تشوف أى حد بيخرب فى مصر تقول عليه وإوعى تسكت علشان مصر بلدنا ،وكفاية اللى حصل لها . خلاص مش عاوزين نسكت على الظلم بعد النهارده .بابا ؟ نعم حبيبى . إحنا كنا بنغنى فى الحضانة النهارده "ارفع راسك فوق انت مصرى " .برافو عليك يا كرم .