طلاسم

سمير ابراهيم زيان
حد عارف
ليه عيون القلب عميه
ف الوش بصه مبرءه
ولا
بالعقل تايهه
جوه دايره محروقه
حد عارف
ليه بتسقط مطره صالحه
ورعد بارق
ف بحر تخرط ميه مالحه
ولا
آخر الحلو حادق
حد عارف
ليه النبته ديا معسله
بسقيه واحده
نبته تانيه محنظله
بميه راقده
من سحابه مظلله !
حد عارف
ليه قابيل ف عروقنا يجرى
رغم انه اللى قتل
لما كان الحبل سرى
يبقى مين اللى اتقتل
حد عارف
ليه نهار الدنيا يحبس
للنجوم ماتبانش فيه
لما ليله ف آخره يلمس
للقمر يفتح عنيه
حد عارف
ليه صوابع الكف خمسه
والشمال شف اليمين
ولا نقطة حرف لسه
ع العيون تعرف بغين
حد عارف
ليه نلف الكعبه سبعه
ع
الشمال ولا اليمين
ولا هى
الدنيا جامعه
للبرايا بأصل دين
حد عارف
ليه جبال الأرض غارزه
والصخور بتأن خِشيه
هى ليه
جذور الشر بارزه
من صدور بتزن آسيه
حد عارف
ليه بندبح ؟
للأسود
ولا
الضحيه ؟
بالحدود
والخروف خوف يمأمأ
ولا
م الفرحه يهأهأ
مين حيأكل لحمه نيه ؟!
حد عارف
هو ليه العضم شايل
التقيل ولا الخفيف
ولا
ف الآخره حياكل
النحيل ويا الظريف
حد عارف
ليه بشر رقابها فوق
السما بتشوفها تحت
طلعنا نلقاها فوق
هى ليه تايهه تحت
حد عارف
أى نمله لها صوت
وبإيه نساوى وزنها
ولا
حكمه لسليمان يفوت
والعباره ف بطنها
حد عارف ؟!
**
الثلاثاء 21 فبراير 2017
سمير زيان