دردشة

حبيت النهاردة أكلمكم من قلبى , كلام مباشر من غير لف ودوران , بما إنى من البلد دى , ووطنى ووطنك واحد , بما إنى شايفة حاجات كتير بتنهار , بما إنى شايفة وطنى بينهار , بما إنى شايفة المجتمع بينهار , والأخر هيقع علينا كلنا , مش هنعد نتفرج , مش هنعد نعيب على بعض , ونجلد بعض بالكلام , تعالوا نصلح المجتمع اللى احنا عايشين فيه , تعالوا نصلح من أنفسنا , تعالوا نزرع ورد ونشيل الشوك , تعالوا نخلى النهاردة وبكرة أحلى , تعالوا نورى العالم إننا هنكون أحسن بلد , تعالوا نقول إن مصر أم الدنيا بجد .
بداية الإصلاح أعزائى من البيت , من إنشاء بيت , بيت زوجية , بيت يضم زوج وزوجة , وبعد كدة أولاد , ومن الأسرة دى هنكون المجتمع .
إختار زوجتك صح :
زوجتك اللى هتربيلك ولادك , هتراعى شؤنك , هتحفظك وهتحفظ بيتك , وأهم من كده سكن ليك ومودة ورحمة .
أهم حاجة إختارها عندها دين وأخلاق , ومفيش مانع تكون جميلة علشان تحفظ عينك من النظرات الشاردة , وتكون هادئة الطباع ومطيعة ليك , علشان ما تزهقش فى حياتك , وتفقد شعورك , وبالتالى ده هيأثر على شغلك وإنتاجك , وبالتالى هتلاقى نفسك عاطل وقاعد على القهوة , ومش بعيد تدمن مخدرات , مش بس شيشة وسجائر .
وإنتى ياعزيزتى إختارى زوجك صح :
الأخلاق هى الأهم , والدين مفيش كلام , طبعا خلى بالك أوعى يكون بخيل ولا سلبى , ولا مهمل ولا بيرغى وغاوى ثرثرة , دى صفات رزيلة وبطفش كتير من الستات .
الأولاد :
دول تاج الرأس وحبات القلوب .
ناس كتير بتشكى من الجيل اللى طالع , طول اليوم بندى دروس للعيال فى الأخلاق , ونوجه, ومفيش فايدة , كتير من الناس بتشكى , حاجة بسيطة أوى مش محتاجة تعب , لو الأب والأم فيهم الصفات , مش هيتعبوا , الطفل عموما بيقلد , زى ما بيشوف اللى بيربيه سواء الأب أو الأم أو آى حد مسؤل , هو مجردبيقلد , فأنت المسؤل الأول , إلا الشواذ ولا قياس على الشواذ , انت متربى وعندك اخلاق ابنك هيطلعلك يا عزيزى والعكس , ما تقلش البيئة , ولا النت ولا التليفزيون ولا آى حاجة , البيت هو المسؤل الأول , وسن التربية حتى سن 15 سنة , بعد ذلك ماينفعش تربى , مش هيسمع كلامك , مفيش احسن من انك تصاحب إبنك أو بنتك .
جارك حافظ عليه :
جارك بلاش تأذية بأى شكل من الأشكال , حتى ولو بالصوت العالى , حتى ولو هتدق مسمار فى حيطة بينك وبينه , وهيسمع وهيضايق بلاش تضايقة , راعى جارك , زوروا , خدله هدية ولو بسيطة كل فترة , الهدية تذيد المحبة .
الشارع :
الشارع إعتبره بيتك وشقتك , إعتبرة سريرك , كناية عن إنك أكيد مش هتنام على السرير لو فى آى قاذورات عليه , بلاش ترمى آى حاجة حتى ولو منديل ورق , حتى ولو قشرة لب , حتى ولو الشارع كله والأرض كلها قاذورات , بلاش ترمى وخليك انت القدوة .
خلينا كلنا نبدأ نبنى من جديد , راعى زوجتك , راعى زوجك , إتعاملوا برحمة مع بعض , إتعاملوا بحب مع بعض , مفيش مانع لما كل واحد يضحى شوية من آجل راحة الآخرين , بلاش نصلب رأينا , لو بيحب يسهر إسهرى معاه , لو بيحب أكله حبيها معاه , لو بيحب الخروج اخرجى , إزرع حب تلاقى حب , إزرع خير تلاقى خير .
الصدق , الأمانة , الحلم , الصبر , الكرم , كلها صفات مكتسبة , كلنا نقدر نكون فينا الصفات دى .
ماتقلش انا طبعى كدة , الطبع ممكن يتغير للأحسن , انت قوى مش ضعيف , كل إنسان جواه قوة جبارة , إحنا اللى بنحبط نفسنا , ونقلل من روحنا .
فى الآخر أتمنى ليكم حياة سعيدة , ونكون بلدنا أحسن بلد بيكم أنتم .