ف شارعنا واد بلطجي

ف شارعنا واد بلطجي وعامل فيها معلم
عليه غضب ربنا و ف وشه متعلم
ساكن ف قلبه شيطان بلسانه بيتكلم
ولا عمره يوم يختشي وأن عدي ما يسلم
لسايب حد كبير ولا عاتق حتي عيال
دايما يقلب فيهم عمال علي بطال
ماسك ف أيده الموس وف كل الجيوب شغال
وناصب علي جيرانه لأنه أتولد محتال
أزيته فينا عدت حدودنا كتير
فارض أتاوه يوماتي علي أي حد كبير
ولو حق طفل صغير ياكله بدون تفكير
ولا مره حاسب نفسه ولا حتي عنده ضمير
مبلطج علينا ليه وبينا مستهتر
وكل اللي بيخصنا بأيديك بيتكسر
ولو حد عاتبك يوم بتقوله بنهأزر
هو أنت قضا مكتوب علينا ومقدر
أخدت منا الغالي وحتي كل رخيص
قلعتنا هدومنا لما بقينا بلابيص
وعينك علي رزقنا بتفصصه تفصيص
وشارعنا ضلمته وعمره ما دخله بوليس
نازل أزيه ليه بتحطم ف كل الناس
مارحمت واحد فينا لو حتي كان كناس
مش خايف يجي لك يوم وبالقدم تنداس
وأزاي نقولك حس وأنت مفيش أحساس
مفيش ف قلبك قلب ولا مره ترحمنا
ف قلبك حجر جرانيت ف قلوبنا بيطحنا
وعمال تبيع فينا ومن بدري بتصحي لنا
ونفسك تمشينا وعن بيتنا ترحلنا
وكل ما يطلع فجر بتاكل أكلنا وبالع
وماحدش عاجبك ليه من سكان الشارع
وليه بتسقينا المرار وأنت ف الطالع
ربنا ياخدك وأشوفك وسط النيران والع
أفتكر ربنا موجود وعمرك ما ح يسيبك
ومنه فين ح تروح ومسيره ح يجيبك
ويحاسبك قديم جديد وأهو عارف الاعيبك
ولا حد طايقك فينا واخدينك علي عيبك
مع تحيات الشاعر العاشق / نبيل عبدالعزيز هذا العمل سبق نشره ضمن ديوان حماريات نبيل عبدالعزيز مكتبة مدبولي اصدار 2009عام