الأعلانات المصرية تتحدى المنطق.

عندهم فن تقنى جدا بيقدروا يخلقوا ليك بيه إحتياج لأى منتج معفن ملوش تلاتين لازمة ،
- إعلانات العقارات كلها كدب و غش .. و كل المناظر إللى بنشوفها دى تصميمات على ورق .. نظام الوحدات السكنية دا عبارة عن أرض صحراوية جرداء معليهاش طوبة .. و منطقيا عمرو دياب مش هيسكن فى بورتو أكتوبر علشان هو أغنى بكتير من أنه يسكن فى وحدة مساحتها 60 متر .. و أونست بتبيع شقق ستوديو .. و ماونتين تشيل أوت بارك مش هتغير حياتك ولا هتعيشك فى هدوء ولا هترجعك لطبيعتك .. و كاربيان مش عايزاك تستجم .. كاربيان دى متعرفكش أصلا .
- إعلانات مساحيق الغسيل و الصابون و الشامبوهات إللى بتنافس بعضها 90% من إنتاج شركة واحدة مكتسحة و هى شركة بروكتول آند جامبل .
- إعلان لمار .. بيحاول يقنعك إن البقرة لما تشرب ماية معدنية هتنتج لبن معدنى .. و إن لبنها طبيعي 100% .. مع إنه منطقيا اللبن لو مش مبستر و محطوط فى علب هيقطع !
- أم حسن أكلها شكله فى الأعلانات مقزز و يسد النفس أصلا .
- كوكاكولا و بيبسى مبيحبوش اللمة .. لأنك غالبا بتشربهم لوحدك .
- فودافون شركة وسخة مفيش كلام .. و كارت العيلة بتكلم بيه صحابك مش أخوك .. بديهيا إنت لو بتكلم أخوك و بتسأله راح فين زمن الشقاوة ؟ ، هيقولك "أقولك فين و متزعلش"؟ .
- موبينيل فاهمة فعل الخير غلط .. لأن محدش بيساعد بأغلى حاجة عنده ، و لما حد يفكر يساعد هيساعد يتيم أو مسكين بفلوس أو هدوم .. مش هيساعد واحد/ة بأنه يبعتله/ا دقايق و رسايل و ميجا بايتس .
- إتصالات .. أعتقد مش لازم أتكلم عنها أصلا .
- البنك الأهلى المصرى مش بينزل الشوارع و يدور على الأبطال و البارعين و الفنانين و المخترعين و يتبنى مهاراتهم ويساعدهم. .
- بنك التعمير و الأسكان بيقدم كل الخدمات المصرفية على أعلى مستوى .. علشان كدا لما تروح أى مكنة atm بتلاقيها فاضية أو عطلانة .
- اعلانات السمنة و الزيت .. كلها زيوت مهدرجة و عليها ألوان و مكسبات طعم .. مفيش فرق ، و الأكل إللى بيجيبوه فى الأعلانات بيبقى مرشوش و متلون .. لأن مفيش أكل شكله كدا أصلا .. آآه و الست الشاطرة طواقيها مش صفرة .. الست الشاطرة بتلبس طاقية صوف تريكوه .
- منطقيا لما بتسأل حد شايك إيه ؟ هيقولك "تقيل - خفيف - مظبوط" مش هيقولك العروسة لأن عادى فى ناس بتشرب ليبتون .
- أنا لما بكون جعانة مبكلش سنيكرز .. و مبتحولش لتنين مجنح ولا حاجة .
- مورو مش بتشحن طاقتك .. لأن الشيكولاتة أصلا بتعمل خمول و بترخى الأعصاب .
- كل الأعلانات إللى فيها بنات بتتمايص و بترقص .. البنات دى سلع من ضمن السلع الأنتاجية للشركة ، بلاش نتدلق على كل حاجة لو سمحت ، بلاش بتنصب علينا بمزاجنا ، بلاش نفرح و نقول الشركة دى صارفة و مكلفة الأعلان يبقى أكيد كويسة .. الشركة دى بتعمل مادة أعلانية بفلوسكم إنتم إللى هى متجيش نقطة فى بحر رأس مالها أصلا ..
إعلانات الشحاتة بقت أكتر من عدد سكان قطر .. بدل ما تتبرعوا لمؤسسات خيرية ضحت بجزء من نتاج شحاتتها إنها تعمل إعلان علشان تشحت تانى .. حطوا فلوسكم فى جامع ، فى إيد حد مش قادر يعيش ، الأطفال إللى مرمية فى الشوارع مش لاقية مكان يأويها ، ولا لقمة تاكلها .. حطوا فلوسكم فى مكانها و بلاش أمور الشحاتة و النصب دى تجر رجليكم .. تأملوا شوية كدا الحالة الأجتماعية و المادية للممثلين و الفنانين و غيرهم من إللى بيطلعوا يعيشوا عليكم الدور و يستعطفوا مشاعركم علشان تتبرعوا .
فكروا برة المستنقع دا شوية .. فكروا يرحمكم الله .