صباح الخير

--------------------- ( Good Morning America )--------------
صباح الخير يا امريكا , برنامج امريكى من زمان , كان صباح اول يوم لى ف امريكا من اكتر من تلاتين سنه _ اول ما فتحت النليفزيون لقيت فيه واحد بيتكلم شكله جد اوى بيتكلم بجد .. وهو فيه ايه ؟! مش متاكد بالضبط , بس اللى كنت متأكد منه انى الواحد ده اعرفه و الوجه ده مش غريب عنى ولا غريب عليا و الدم ده زى دمى انا حاسس كده و حاسس بيه اوى .. كان الدكتور العالم / فاروق الباز .. صدقونى حسيت بأمان , حسيت بفرحه , حسيت ان لى قيمه , كان نفسى اقوم وابص من شباك الدور ال 51 بفندق آبى فيكتوريا بنيويورك وانده ع اللى ف الشارع تعالوا شوفوا واحد اهو من بلدى , واحد مصرى , مصرى زيي , انا كمان مصرى .. قعدت على طرف السرير , واستحضرت كل الانجليزى اللى اتعلمناه , وركزت قوووووى و مش عايز كلمه تفر منى خالص .. بس يا خساره فرت منى وغرقتنى دموعى .. انا كنت فاهم انهم مستضيفينه فى برنامجهم ( Good Morning America ) على اعتباره عالم مصرى , كنت متصور انه بيشتغل فى مصر وجايبينو هنا عشان يتعلموا منه .. اتاريه مش مصرى أو مش مصرى اوى أو كان مصرى ف مصر .. ما تقومى بقى , نايمه ليه ! مش هم دول ولادك ولا انتى كرهاهم .. مش ولادك دول ولا انتى نسياهم .. ولا زعلانه منهم اوى ومش مسامحاهم ؟