هدية لفايدة العنانية إهداء / هشام الجوهرى

مين اللى يصعب عليك ؟
شعب مظلوم 30سنة ، شعب مريض 30سنة ،شعب مقهور 30سنة، شعب مسلوب الإرادة 30سنة ، شعب بلا كرامة 30سنة ، فساد فى التعليم ، فساد فى الصحة ، فساد فى المحليات ، فساد فى الزراعة ، فساد فى الاتصالات ، فساد فى البترول ، علمونا الفساد ، علمونا إزاى نخرب فى البلاد ، عارفة ليه؟ لأن المُصلحين لازم يبقوا مسجنوين ، معتقلين ، لأنهم حاولوا مرة يبقوا بنى ادمين .واحنا مش عاوزين نتسجن ، مش عاوزين نتجلد ،وبلاش نصلى الفجر فى جماعة
مالها صلاة البيوت ، وبناقص صلاة التهجد والقيام ، خلوا الناس نيام ، أحسن لنا من ليل اللئام . محناش قدهم يجرجرونا ف نصاص الليالى ،كل ده علشان بنصلى فى المساجد يعنى ايه؟ كنا نروح نصلى فى المعابد؟
مين اللى يصعب عليك ؟
شباب ضيعوا فيه الأمل ،شباب حطموا فيه القيم ،دمرونا فى الأمم .والموظف مسكنوه ، شحتوه ، جوعوه ، أدبوه علشان فى يوم طالب بحقه فى الزيادة ، ملقاش عندهم غير البلاده ، صوته اتكتم قال بلا ده ، طب عاوز رغيف مش مسرطن ، مش مبطن بالرمل ،؟ ومش ضعيف ، يمكن يجيلنا ضيف ، يلا بلاها ضيف ، ينام خفيف .
قلت عاوز أبقى ظابط ،قالوا لى ادفع بالألوف ،رغم الأنوف ، يطلع اسمى فى الكشوف ،أبقى ظابط واطلع لفوق لحد ما أعلق ويا النسر السيوف ،واخد رشاوى
واخد بلاوى واخد القصير والفلات فوت ، وكله بالمال يفوت ، والفقير يموت .
مين اللى يصعب عليك ؟ مين اللى يصعب عليك ؟ مين اللى يصعب عليك ؟
أكيد مصر اكيد الشعب المظلوم أكيد أكيد أكيد
لكن لو قلت إن اللى عملوا كل ده فى الشعب صعبانين عليك ؟ ساعتها بس مش عارف أرد عليك بأيه؟
اهداء / هشام الجوهرى