وحشتينى

يمين الله.. وحشتينى
وحشنى الحب فى عيونك
وحشنى السحر فى جفونك
وحشنى طيف على الميه
يلاغينى ,, ويغرينى
وحشتينى
.....
أنا سواح يا جنيه
سافرت كتير
وطول عمرى مابين الشط والميه
وشفت كتير
صبايا ع الشطوط نايمه
عيونهم للرفيق هايمه
وخوفى من غضب ربى
غضضت الطرف من عينى
.....
وبعد السير وترحالى
رجعت لبلدى وأنا خالى
خلى البال
وكام موال بيحلالى
أغنى للطيور وحدى
وأمسح بالزهور خدى
لدمعه نازله من عينى
لحد فى يوم قابلتينى
ومن نبعك رويتينى
ووعد جميل على اللقيا
وصوت ع البعد يرضينى
ومن يومها وأنا حيران
بأحكى اللوعه للشطآن
وصوت الموج ووشوشته
وغنا عصفور وزقزقته
ودعا كروان
فى وسط الليل يواسينى
وحشتينى
.....
وحشتينى يا عصفورة
يا بنت الإيه .. يامغروره
دخلتى جوه بستانى
بكلمه حلوة مشهوره
سمعها قلبى طار منى
وطرتى معاه يا غندوره
ومن يومها .. وأنا بأغنى
وأشكى للطيور همى
ونار البعد تكوينى
وحشتينى
....
أنا جاى لك يا جنيه
يابنت الإيه يا حوريه
شايل قلبى على كفى
وشايل الحنه بإيديه
وريحانه وعود ياسمين
وكام ورده منديه
وتوب أبيض معاه طرحه
وتاج.. فيه ماسه ملاليه
وأمد الإيد..لعمر جديد
وكل الناس .. تهنينى
وحشتينى