كل الصور

مش هو دا شكل الحاجات
متغيره كل الصور
والضحكه محبوسه في عينيك
حتى ايديك
خايفه تشاور ع القمر
والحزن باين ع الساعات
والمفردات هي انعكاس
لون المشاعر ع الحروف
بص ف عينيك يمكن تشوف
ضايعه الملامح م الوشوش
حبة رتوش شبه البقع
والدمعه تغلي م الوجع
انت اشتياق الجرح لسنين العذاب
انت السؤال
وانت الجواب
وانت الحضور ساعة الغياب
الحد في المطلق سراب
كل المشاهد مهزوزين
والشرخ باين ف السنين
متلزقه كل الصور
مش هو دا نفس المكان
مش همه دول نفس البشر