واحة الشعر

شعراؤنا شموس فى سماء الإبداع ينيرون لنا ببصيرتهم وبصرهم طريقنا ويخبرونا ما لم نخبره فيما فاتنا من أمورنا الحياتية فهم بمثابة توثيق وشهادة على عصرهم ونحن نخصص هذه المساحة من الإبداع لمجموعة متميزة من الشعراء الشباب لإتاحة الفرصة أمامهم والتعريف بهم.
قصيدة
ما بين الشارع الفاضى
وبين بيتنا اللى كله عمار
يدوب خطوه بتتسابق
عشان تحضن بواقى الدار
وكام صوره وكام برواز
لناس مش هما هما الناس
وكام دمعه ف ملامحهم
خلاص معادتش تملا الكاس
وكام تعويذه ع الحيطه
وكام كفه عشان العين
وكله سكوت مفيش زيطه
وهو سؤال بقاله سنين
مين راح يمسك الدفه
وعم شمندى من زمانين
مضى غايب مع الغايبين
***
شجر غيطنا بلا ضِلَّه
مفيش هيلا مفيش يلا
ف ناس معازيم
وناس جايين بلا دعوه
وناس واقفة بتتفرج
على الماشيين بلا سكه
وناس قاعدين على الدكه
وناش شقت ضلام الليل
وغطو الشقّه بالشقّه
كما دمعى اللى غطى الحزن بالضحكه
****
ولسه النور على السلم بيستناك
ولسه بقَّف استنى خطاك ع الباب
ف ليل الغربة بترجاك
متتأخرشى وتجيلى
عشان عاملالك الأكل اللى بتحبه
متتأخرشى وتجيلى
عشان نقعد أنا وانت
اقولك شعر ونحكِّى
ف أول كلمه كاتباها عشان خاطرك
فتسمع مره وتقولى كمان تانى
عشان بتشوفنى ف مرايتك
أنا تانى
بيصرخ أوله جواك
عشان محبوس بلا مخرج
بلا حرية أو إفراج
وتضحك تضحك القمره
ويكسى الكون ربيع اخضر
كإن عيونك السمره
غنا بيسكِر
وحضنك لما يحوينى
شموس تقدر
تخبى العتمة ف جرابها
****
وغيب يابا وحستناك
أمانه عليك م تتأخر
وخلى اليتم يتاخر
واقولك حاجه م الآخر
مفيش بعدك قصايد شعر
برغم إن القدر غلَّاب
وجاب ويانا م الآخر .
شعر : مى منصور – القاهرة

انسى
إنسى إنى كنت وردة
فوق عذابك فارده عودها
من ضياعك جيت رويتها
قصة غالية وبغرورك ليه نهيتها
إنسى إنى كنت ضحكة
حلوه جوه عنيك قريتها
كنت فرحة بين ايديك
وانت عمرك ما اشتريتها
وافتكر بس إنى بعدك
مش حاضيع وأعيش لذكرى
لأ حافكر إيه ف بكره
لو تبيعنى إيه حيجرى
مش حتفرق جوه قلبى
مش عشانك افتكر..
وافرح بدمعى
لأ حاجدد ف الأمانى
عمرى ما حاثبت مكانى
ايوه حاثبت لك وجودى
حاكبر اكتر من حدودى
مش عشانك
حابقى دبلانه ف عودى
شعر : هناء عابدين - قنا

اطمنوا
الحجاجى - الأقصر
اقفل عينيك
لاحسن تشوف الدنيا
منزوعة الرحمة
عيش كفيف أحسن
مفيش داعى تشوف
شجر ماوقفش ف صفك ف أزمه
ولا صندوق بريد لاحن لك
ولا حس بانتظارك للجواب
وبلاها نجمه انطفت
قبل ما توريك الطريق
ولا عمود النور
ف شارعكم الضيق
الحكايه مفهاش تشويق
يخلى بياعة المناديل
تنسى الام مفاصلها وتغنى
ولا ممتعة لحد
إن السبت ياجى بسرعه
ويغالط ورق النتيجة اه
يا امبارح ياقاسى
لاصعبت روحى عليه
وماسبتليش خيط ضى
اتهجى الشوفه بيه
اقفل عينيك
واحكى لصحابك
قد إيه البنت حلوه
وانت الوحيد اللى بتشوفها
وانت بتغمض عينيك
وانك الساحر
اللى بتقدر تحضر روحها وقوام تاجى
رغم اتها مخاصماك
بتضحك والشمس تطلع
والقمر ف السما مكسوف
جربوا تغمضوا
مش محتاجين إذن
الشوفه ببلاش
الخشب بيصير حرير
والبعد أجمل م اللقا
وأحن باكتر كتير
اه يانجمه خاب ظنك
وعمود النور ف شارعكم الضيق
و ياشجر بلا رحمه
اطمنوا مأمون بخير .
شعر : مأمون

حلمه لسه مكتملش
بين حروف الكلمه اسمك
زى بنت معلقه
ضفايرها فوق شباك منام
حلمه لسه مكتملش
زى رمش عيون حزينه
على وش متعاص بالدموع
زى جوع البرد لضلوع الغلابه
تحت غيمة كل ليل
يامغربانى فى الشوارع
مش لاقى دافع
أنى أرجعلك سعيد
مش لاقى إيدك ترمى حبل الضى
ف عيون البعيد
مشوار حكايتك
زى صبح وحيد بينحت سقف
ليلك للوصول
علشان يطول
كل حيطه لكل بيت
على مد شوفى
فى القصيده
أيام بليده
وفكره مش لاقيه انتهاز الفرحه
فوق خد البنات
على كف عدرا النور
ف حلم الأمهات
شباك حسين مفتوح
على باب التوجه للإله
مرسوم على وشك مداه
وتنهدات الأولياء
بتشد فجر الخضر
من بين السطور
ياكل نور
مع طوافين المولويه
والحضور
اللى بيشقوا الستاير
عن فضا العتمه
اللى راسمها الشيطان
محتاج طريقك
بر للغلبان
مفهوش ديابه
أو مستوحشين
محتاج ل طين
طمى متعبى بسنين الضله
مستنى الخضار
محتاج مدار
يكسى الغيطان العيانين
بحنين لفاس الفلاحين
محتاج إيدين
وكفوف إيمان
وصلاة تهجد للشقا والعرقانين
محتاج حنين
وقلوب تدوب
جوا كاس الحب
عشق مينتهيش
لو هب طيش الضلمه
يبنى
بنبضه جيش
إنتى مش محتاجه حد
إلا قلبى
لو كان بجد
حبه ليكى
خالى من حب الجميع .
شعر : مصطفى التمساح - سوهاج

قصيدة
أنا غارق فى مقلتيك ..
فأنقذينى ..
بابتسامة جمرة الشفتين ..
واروينى بطعم الغيم ..
حين تضمنى نجواك فى الليل الوحيد ..
يا شهرزاد الليل ..
بغدادية هذى الليالى الألف ..
لم أقتلك ..
كان الحسن يقتلنى اشتياقا كلما غنيت لى ..
وأنا البعيد ..
أنا الغريب ..
أنا المسافر فى مدارات الدموع ..
أنا المصلى بانتحابى ..
فى محاريب الحزانى ..
كنت انتظر اخضرارك فى صحارى القلب ..
لو أن المسافة أمهلتنى ...
آه .. لو أن المدينة أعجلتنى ..
واستدار البدر فى كراسة الإنشاء حين رسمت باسمك نصف دائرة ..
وكان النصف سيرى حافيا كى أكمل الفردوس ..
يا سمراء ...
لم تزل المسافة بيننا أبدية ..
أزلية ..
كراسة الإنشاء صامتة ..
ونهرى من سراب .
شعر د : علاء جانب – القاهرة

التماس
كفرالشيخ
ماراثون دموع
وعنيكى أول دمعه ف كشوف الوجع
وانا قلبى آخر ضحكه للطفل اللى تاه
واداكى عُمرُه لم يقول .. هاتي
غناكى
خلا الورد يحضن ف الشجر
والنخل يقبل وقتها يصبح ناياتي
فمتقفليش باب الطموح فيا
وادينى فرصه للرجوع ليا
يمكن .. أصادفِك ف اكتشاف ذاتي
2
شاعِر بحجم الاحتمالات العبيطه للجنون
مؤمن بقانون التعرى ع الورق
قلمى الأنين .. حِبرى القلق
فادينى حلم يساع مساحة رؤيتي
أفرد عليه حزن اليتامى السكرانين بيكي
وابنى بطول اليأس كورنيش للأمل
واصنع حواجز وهم ضد الدبابات
واعمل ميدان بره الوطن للمجهدين
من صمتهم
مفيهوش رصاص
مفيهوش ضرر
علشان يكون جواه قصاص
بالمختصر
هرسم عيونِك طوق نجاه
فمتبخليش فى الوقت دا
بمحاولة تانيه إنى أفتش عن حياه
وسبينى أجرى ف كرنفال دمعك مطر
والحق قصيده جمعتنا ف شطرتين
ساعة خفوت
وسبينى اضمك ف الصخب
أو ف السكوت
لكن رجاءً
لو فشلت ف كل دا
فمتسحبيش حق اللجوء ...
للموت .
شعر: أحمد سعيد موسى