عند الجواز.. العنصرية تبان في الطول والألوان!

ولاد: السمار نص الجمال.. والجمال جمال الروح
ولاد: ملك الأردن بحاله مراته أطول منه أنا اللي هرفض
بنات: لو أتجوزت أقصر منى هحس إنه أبنى
ولاد: يعنى أخدها طويلة وفى الآخر نخلف نخل
بنات: ما اتجوزش اسمر أنا ليه نخلف عيال أفارقة
ما تخلهمش يضحكوا عليك ويقولك بنشتري راجل أو يضحكوا عليكي ويقولوا المهم الأصل ساعة الجد العنصرية هتبان وهيظهروا على حقيقتهم في الأخر، صحيح في ناس يهمها الجوهر، بس كتير يهمها اللي قدامها منظرو أزاي حتى في مثل يقولك " يا واخد القرد علي ماله يروح المال ويفضل القرد على حاله" فنلاقي أسئلة كتير عن شريك الحياة ياتري هو؛ أبيض ولا أسمر، طويل ولا قصير، تخين ولا رفيع. ولو دورت جواك هتلاقي عنصري صغير بيهتم بالحاجات ديه.
فتوضح يارا محمد، طالبة بكلية التجارة جامعة بنها، "ماقبلش أتجوز واحد أسمر لأني سمرة أصلا ولو أتجوزت واحد أسمر هنخلف عيال زى الأفارقة أكيد". ويشير محمد فوزي، طالب بكلية التجارة جامعة بنها، "عادي جدا البنت لا بشكلها ولا بأي حاجة غير إنهم بيفرقوا عن بعض في جمال الروح ودا الأهم بالنسبة ليه، واللي يهمني طبعا الجوهر لأن الشكل بيروح مع الوقت وتقدم العمر". ويوضح أمجد محمد، طالب بكلية العلوم جامعة المنوفية، "الجمال مش باللون، في بنات سمرة بتبقى جميلة جدا أكتر من البيضا، وأنا عادي ممكن أتجوز واحدة سمرة، ده حتى السمار نص الجمال زى ما إحنا عارفين".
ويشير أحمد ياسر، مهندس إلكترونيات، "أنا بفضل تكون زوجتي أقصر مني، لكن مفيش مانع لو هي طلعت طويلة عني عادي جدا وبعدين دا نصيب والأرزاق متقسمة". وتقول مي أنور، طالبة بكلية الآداب جامعة بنها، "عادي جدا جوزي يكون أقصر مني، بس ميكونش قصير أوي يعني ميكونش تبع الأقزام بمعنى أصح". وتؤكد رحمة محمود، طالبة بكلية الحاسبات والمعلومات جامعة المنوفية، "لأ ماقبلش أتجوز واحد أقصر مني لأني طويلة أصلا، وكدا مش هينفع خالص دا غير شكلنا وإحنا ماشيين في الشارع جنب بعض، وأنا مش متخيلة المنظر بجد هنبقى أوفر أوي".
وتقول نورا محمد، طالبة بكلية الألسن جامعة المنيا، "أنا مش ممكن أقبل إن عريسي يكون أقصر مني، أنا عايزة حد أكون ماشية جنبه زى بنته مش هو اللي ابني". وتوضح تغريد ممدوح، طالبة بكلية الإعلام جامعة القاهرة، "أنا ما أقبلش يكون أقصر مني، لازم يكون أطول علشان العيلة عندي ما شاء الله طوال، وبعدين دا مستقبل أجيال طالعة وياريت الموضوع هيقف عنده هو بس عيالي ممكن يطلعوا قصيرين برضو". ويضيف عبد الدايم سامي، طالب بكلية التجارة جامعة بنها، "أنا أصلا بحب البنت الطويلة، بس بشرط متكونش أطول مني يكون طول بعقل". ويشير أحمد حسن، طالب بكلية العلوم جامعة المنوفية، "الحقيقة في الجواز أنا ماشى بالحديث اللي بيقول كلكم لآدم وأدم من تراب إن أكرمكم عند الله أتقاكم، مش هتفرق بقى طويل أو قصير أو أبيض أو أسمر، ملك الأردن على سبيل المثال زوجته أطول منه وعادي جدا". ويقول مينا جرجس، الطالب بكلية حاسبات ومعلومات جامعة بنها، "أه ممكن أتجوز واحدة أطول مني عادي مش قصة، أهم حاجة الأخلاق، لكن الطول والحاجات التانية دي كلها شكليات وكلام فاضي ملهوش لازمة".
ويوضح بلال الصاوي، الطالب بكلية الحقوق جامعة القاهرة،" المسألة مش مسألة طول أد ما هي مسألة شخصية وجمال داخلي، وأنا عمري ما بفكر في الشكل بس أتمنى لو تكون برج الدلو لأني بعشق سيدات البرج دا". ويؤكد عمرو عرفات، طالب بكلية الحقوق جامعة عين شمس، "أنا رافض تماما أتجوز واحدة أطول مني، ودا لأني طويل وطبعا لو أتجوزنا منظرنا وإحنا ماشيين جنب بعض في الشارع مش هيكون لطيف، دا غير إننا هنخلف عيال نخل وموضوع إنها سمرة ولا مش هيفرق بالنسبالى، وعادى لو أتجوزت واحدة سمرة". ويقول سامح نادر، طالب بكلية الاقتصاد والعلوم السياسية جامعة القاهرة، "مراتي ممكن تكون أطول مني مش مشكلة أوي بس لو هي متقبلة قصري دا عنها وراضية بيه وأكون مالي عينيها من الآخر، وأنا كمان مش حاسس إن الموضوع عائق ما بينا في التعامل".