بالفيديو..محمود سعد فى حوار online على بوابة الشباب

نفسي أعرف عمرو أديب عمل إيه عشان يعملوا فيه كده .. أنا مبحبش الحكومة والبرادعي مجرد مسرحية ، انا صحفي في النهاية وراجع تاني للكتابة ، مهاجمة الوزارء مش قلة أدب لكنى مبحبش الظلم ... هذه كانت بعض إجابات الاعلامي الكبير محمود سعد علي أسئلتكم التى ارسلتموها خلال الأيام الماضية بعدما أعلنا عن عمل حوار أونلاين معه ..
تصوير : أميرة عبدالمنعم
والتفاصيل كاملة في السطور القادمة .
في البداية أسئلة كثيرة من القراء عن مدي متابعتك للكرة خاصة وأن موعد أجراء هذا الحوار كان خلال مبارة الأهلي والزمالك والتي انتهت بالتعادل السلبي ؟
أنا عموما مش من محبي الكرة ومش غاويها .. بس بحب أبقي متابع وأتفرج علي 10 دقايق من المبارة عشان أبقي فاهم ، بس أنا بالفطرة أهلاوي وبشجع الأهلي من زمان بس مش بعصبية أستغرب من الناس اللي بنشوفها اليومين دول والعنف والخناقات .. وعموما المباراة كانت عادية جدا والفرص فيها متساوية والأهلي ظهر فيها بشكل كويس .
بعض الكتاب الليبراليين يرون أن حالة الهرجلة التي يعيشها المجتمع مرحلة انتقالية تمر بها كل البلاد لعمل نقلة حضارية .. هل تراها كذلك ؟
ايه الكلام الفاضي ده ....مفيش حاجة اسمها كده ، وأنا أقرأ الكلام ده في الصحف وأستغرب بصراحة.. يعني ايه نبقي عاوزين نعمل كل حاجة ومش عارفين نعمل أي حاجة ؟! فالناس عاوزين حرية ومش بيتعاملوا بمنطق الحرية والحكومة عاوزة ديمواقرطية والنتيجة ما رأيناه في انتخابات مجلس الشعب ومظنش أنها محتاجة لتعليق مني بخصوصها .
لهذا السبب لم تظهر في برنامج مصر النهاردة خلال فترة الانتخابات ؟
أنا كنت عيان وكان عندي برد شديد ..وممكن نسميها زي ما الناس عايزة .. بس أنا كنت عيان وفي إجازة وده السبب الرئيسي.
كيف تري معركة الحزب الوطني في الانتخابات وتصفيته لأسماء كبيرة في الانتخابات؟
والله الموضوع ده شغلني جدا .. فالحزب الوطني ضحي بشخصيات مهمة مثل الدكتور مصطفي السعيد والدكتور شريف عمر ووضع شخصيات جديدة لم يكن يعرفها أحد بس كلهم لهم صفة واحدة أنهم هادئون ومطيعيون وطيبون .. وأهم حاجة من وجهة نظري للحزب هو عدد المقاعد ليس أكثر ، لكن أنا معرفش هم عملوا كده ليه ؟!
من ستفتقد في الدورة الجديدة بمجلس الشعب من النواب الخاسرين ؟
طبعا سأفتقد أداء مصطفي بكري وحمدين صباحي .
ألم تفكر في ترشيح نفسك لانتخابات مجلس الشعب في ظل هذه الشعبية التي تتمتع بها ؟
ابدا وفعلا في بعض الناس في منطقة السيدة زينب طلبوا مني أترشح ولكن أنا أرفض هذه العروض تماما لأن خدمة الناس لا تحتاج الي كرسي مجلس شعب ..ولأني دائما أسأل نفسي إيه اللي يخلي واحد يدفع 2 مليون جنيه علي الدعاية اذا لم يكن مدركاً تماما أنه سوف يحصل علي مبلغ أكبر من خلال عقد صفقات وبيزنس وأنا لن أستطيع أن أعمل ذلك ، وأنا لا أعرف من أين يحصلون علي هذه الأموال ..وأنا مستعد أنزل الانتخابات من غير ما أعلق يافطه أو أعمل دعاية .. ولو حصل هذا سوف أرشح نفسي في الانتخابات .
أسئلة كثيرمن القراء حول أزمة عمرو أديب ...أين ذهب ؟
أين عمرو أديب وأين هالة سرحان ؟ لا أعرف .. وقد تكون الأسباب مختلفة تماما في اختفاء الأثنين ولكن في النهاية الأسباب وهمية وتافهة لأختفاء نجمين من نجوم الشاشة العربية .. فماذا فعل عمرو أديب ؟! منذ 10 سنوات يهاجم الحكومة ومحصلش حاجة ..وما الذي كان سيقوله عمرو أديب عن الانتخابات زيادة عن الذي قيل ، وأنا سمعت تحليل الأستاذ عماد أديب بأن ابعاده بحجة أنه " يهيج الجماهير " وأنا بصراحة مش فاهمها .. يعني ايه يهيج الجماهير ؟؟؟ ليه يحرموا جمهوره الكبير منه في الوطن العربي كله .
معني ذلك أن مصر متجهة الي تضييق اعلامي في الفترة القادمة ؟
طبعا لا يمكن أن أجزم بوجود تضييق بس علي الأقل مش هتيبقي فيه حرية كبيرة .
ولو طال هذا التضييق محمود سعد ماذا سيكون رد فعلك ؟
هقعد في البيت .. وعموما مفيش تضييق علي أنا بس أو علي شخصي .. فالشاشات كلها معرضة لتضييق اعلامي كبير وأنا حاولت أكتر من مرة فتح بعض الملفات مثل الاخوان المسلمين وغيرها في مصر النهاردة ولكنهم رفضوا ، وعموما البلد كلها مرتبكة وفي حالة مخاض لشيء ما محدش عارف ايه هو والبلد متلخبطة ومفيش استقرار حقيقي .
محمود سعد وسط هذا الكم الهائل من المشكلات التي يسعي لمساعدة الناس علي حلها .. ألا يصيبك الاكتئاب ؟
بالعكس ده الشيء الوحيد اللي بيحسسني أني بعمل حاجة لأني لما أناقش قضية اجتماعية أو سياسية أو اقتصادية نادرا ما يحدث تأثير بسبب كلامي ..ولكن عندما أعرض مشكلة لخمس حالات تحل منها اثنتان يبقي معني ذلك أن فيه أملاً وأني أعمل حاجة وأفيد الناس وده اللي يهمني ، وأنا عموما أتعاطف مع كل الحالات الانسانية يعني مثلا اليوم اللي عملنا فيه حلقة من داخل السخن مع الشخص اللي قتل مراته وولاده بسبب خسارته لكل أمواله في البورصة .. وأصابته حالة من الجنون اللحظي لأنه كان عايش في مستوي معين وصعب عليه أنه يقبل الوضع الجديد .
قراء بوابة الشباب طلبوا من حضرتك تقييم أداء الدكتور أحمد زكي بدر وزير التربية والتعليم ؟
أنا رأيي إنه بيشتغل كويس قوي ولكن هو رجل ايقاعه أسرع مما يجب وتأتي قراراته سريعة وتخض الرأي العام .. ولكن هناك نقطة مهمة جدا لأن الإرتقاء بمستوي التعليم ليس مسئولية أحمد زكي بدر ..دي مسئولية الحكومة كلها ولازم تبقي الدولة عارفة ده ولازم تبقي أعلي نسبة من الموازنة لصالح التعليم ولايصح أن تكون نسبة التمويل للتعليم 12.6 % من الموازنة العامة فقط ، لازم الناس تتعلم كويس لأن هو ده الطريق الوحيد لتقدم البلد دي .
عندما استضفت الدكتور هاني هلال البعض قال أنك كنت عنيفاً معه .. لماذا ؟
أبدا لم أكن عنيفاً معه .. كنا مختلفين وهو بيتكلم عن الحرس الجامعي وأزمة جامعة عين شمس كأننا بنحلم مش كلام ومتصور ، والاعتراض علي الوزارء مش قلة أدب وطالما بتكلم في نقاط موضوعية .. وأنا عموما مش ضد أي وزير في المطلق و أنا قابلت الدكتور هاني وشكرته وحييته علي أعمال كثيرة له ولكن احنا كنا مختلفين في وجهات النظر في الموضوع ده .
تعليقات كثيرة جاءتنا حول وقوفك طوال الخط مع الوزيرة عائشة بعد الهادي حتي بعد تصريحاتها الأخيرة بخصوص خريجي الكليات النظرية ..ما تعليقك ؟
لا أنا مختلف مع هذا الكلام تماما فتصريحات الوزيرة هي انتقاد للحكومة في أصلها لأنها انتقدت مستوي خريجي كليات النظرية وقالت أن سوق العمل لا يحتاجهم فهي بذلك تنتقد التعليم الجامعي وليس الخريجين ، وأنا لا أقف معها طوال الوقت ولكنها بتشتغل ولما بتعمل حاجة مش كويسة بقول زي ما بهاجم أي وزير .
ألا تخاف من مهاجمة الوزراء بهذا الشكل ؟
بالعكس هم اللي بيخافوا مني عشان عارفين أني ماليش حسابات ومش بخاف من حاجة ومش طمعان في حاجة ولا بعمل توازنات ولا الكلام ده .. أنا مع المشاهد والجمهور فقط لا غير .
في سؤال أخر عن اختيارك لمرشح الرئاسة بين الرئيس مبارك والسيد عمرو موسي والدكتور البرادعي ، من تختار ؟
أه ...دي حاجة مهمة جدا ...أنا بقي عاوز الناس تفوق من الوهم ده ولا البرادعي هيترشح ولا عمرو موسي هيترشح لأنهم مش في أحزاب ومحدش هيغير الدستور ، والبرادعي ده مسرحية النظام حاول يلهي الناس بها مش أكتر ، لكن خلينا واقعيين مفيش حد منهم هيترشح .
أحد القراء سألك اذا ظهر لك فانوس سحري ستطلب منه ايه ؟
أنا عموما تشغلني فكرة العدالة وازاي الناس متبقاش حاسة بالظلم ، وده مش معناه أني ضد الفقر ولكن ضد أن يشعر الانسان بالظلم ..ولكن الفانوس السحري لن يستطيع أن يحقق لي ذلك فأنا سوف أطلب منه طلباً أخر هو أنا يأمر الملايين حول العالم بأن يشاهدوا كل حلقاتي في مصر النهاردة وأن تعجبهم .
ولكن الا تشعر الحكومة بهذا الظلم ؟
الحكومة لديها احساس بالأمان وده جاي من الورق ، وأحيانا يقال أن بعض المسئولين يتم تضليلهم .. فكل المسئولين يعرفون الوضع الحقيقي ورئيس الجمهورية نفسه يتابع كل الجرائد ويتفرج علي التلفزيون وكل البرامج الفضائية .
نعود مرة أخري الي مصر النهاردة .. لماذا لا يلبي محمود سعد رغبات المشاهدين في الظهور 3 مرات أسوعيا؟
لا كده كفاية جدا علي قدي وقد صحتي .. وبعدين فيه زملاء تانين لازم ياخدوا حقهم بالظهور والتواجد إضافة إلي مني الشرقاوي .
بالمناسبة هل مني الشرقاوي مفروضة علي البرنامج كما قيل ؟
مفروضة من مين وعلي مين ..؟؟ مني اختيار وزير الاعلام بنفسه وهي واحدة من مؤسسي برنامج البيت بيتك وكانت زعلت شوية ومشيت ولما فكرنا نجيب عنصر نسائي أخر كان اقتراح الوزير بمني وهي مذيعة شاطرة وموهوبة وعاملة جو حلو قوي في البرنامج .
أحيانا يشعر المشاهدين أنك تتحدث أكثر من الضيف ؟
دي مشكلة حقيقية في وأحاول أحلها أنا والزملاء في البرنامج .. بس دي غلطات بتحصل في الهواء وده شيء طبيعي وأحيانا بتاخدني الحمية لأني في الغالب مش ببقي مجهز الأسئلة وبسيب نفسي أتناقش وده خطأ أعتذر عنه .
لو نظرنا لشروط عقدك مع شركة صوت القاهرة .. هل ضايقك شرط منعك من الظهور علي أي تلفزيون أخر ؟
لأ أبدا ...ده حقهم والحق ميزعلش أبدا ، وأنا زي ماقلت أمضي العقود بحسن نية بدون التمحيص والتدقيق حتي مسألة الأجر والأشياء المادية لا أحب التحدث فيها لأن الأرقام الفلكية التي يتم كتابتها في الجرائد تستفز الفقراء جدا ، ومثلا أول امبارح كتبوا عني أن اتسرقت من عربيتي ماسة برقم غريب كده ..وأنا استغربت ، ماسة ايه اللي هشيلها في عربيتي ؟ عربية صديقي كان فيها بدلتان احداهما فيها علم به قطع ماس صغيرة جدا واتسرقت فقالوا قطع ماس وكلام ممكن يستفز الناس وده غلط .
قناة أزهري حققت قد ايه من أهدافها بما أنك مديرها الاداري ؟
أنا راض عنها بنسبة 30 % وأنا عارف أن مهمتنا صعبة لأننا نحاول نوصل الفكر المعتدل وفكر الأزهر ، وأنا عاوز أقترب من الناس هم يقتربون من القناة ، وأنا أتابع الإعلام الديني منذ سنوات وكان للأسف يحاول فرض بعض المعتقدات المتشددة ، ومع زحمة الحياة الناس فهمت أن هذا هو الدين .. والناس عموما أصبحت مائلة للتطرف نتيجة العنف في المجتمع .
أخر يوم في 2010 .. ماذا تتمنى فى سنة 2011 ؟
نفسي أعمل حملة من خلال برنامج مصر النهاردة لتبني تنظيف القاهرة لأن حالها أصبح يصعب علي الكافر والحياة فيها أصبحت مستحيلة ونفسي أفضل أتكلم في الموضوع ده لغاية ما يحصل تأثير فعلي .
أخيرا .. هل نسيت محمود سعد الصحفي ؟
أكتب فين ولمين .. وعشان إيه ؟ قفلوا الدستور ومفيش حته تانية أكتب فيها ، والحالة دي جت لي مع الكتابة ، أنا زهقت من الكتابة وهكتب ليه وهأثر في مين بكتابتي دي ، بس أنا أعتقد أن دي مرحلة مؤقتة وأني سأرجع للكتابة تاني لأن هي دي شغلتي الأساسية .
شاهد فيديو الحوار مع محمود سعد: