كالابالا.. عمدة شباب وسط البلد !

عندما سألت شباب من الجالسين في مقاهي وسط البلد عن أشهر شاب يجلس فيها، الكل أجمع أنه "كالابالا"
هو يجلس في وسط البلد من 15 سنة، كما أنه قاسم مشترك في كل المناسبات والأحداث التي ينظمها الفنانون والمثقفون في وسط البلد، تعالوا نعرف منه الباقي..
حكايتك إيه مع وسط البلد؟؟
أنا اسمي محمد عبد الفتاح الشهير ب "كالابالا" وأنا مدير فرقة حالة المسرحية ، وغاوي قهاوي وسط البلد من حوالي 15 سنة .. كمان علشان شغلي.. على فكرة: وسط البلد فيها المبدعين والسينمائيين.. وكمان المدعين.. كل حاجة هنا بتمشي..
##
ليه؟؟
وسط البلد في أي مكان هي "أزبل" مكان فيه ! المناطق الشعبية الناس فيها بتصفي بعضها في بعضها.. لو حد وحش بيختفي، هنا مفيش منطق لأي حاجة، أقولك كمان: ناس وسط البلد هم أكتر ناس بيدافعوا عن الحريات في الوقت اللي ما بيدوش فيه حرية لأي حد.. بيتمسكوا برأيهم وبيشوفوا أن المختلف معهم جاهل ! في ناس هنا بتعتبرك جاهل علشان بتاكل في مطعم غير اللي بتاكل فيه ، هنا أكتر ناس شوفتهم بيتكلموا عن المبادئ ، وهم في نفس الوقت بعضهم بعيد عن المبادئ تماماً ..
إيه القهاوى اللي بتفضل تقعد عليها هنا ؟
الفكرة غريبة جدا.. يعني القهوة دي بقعد عليها من 10 سنين واسمها الخن، وفي قهوة اسمها التكعيبة بقعد عليها هي كمان من زمان، الخن بقعد عليها بالليل علشان الهدوء وعلشان كل اصحابي وشغلي .. كله بيتظبط هنا.. إنما التكعيبة بقعد فيها الصبح علشان بتكون خالية من أي حد ليه علاقة بالثقافة والفنانين فبكون مبسوط لأني بكون عاوز أريح دماغي ، فبقدر اقعد فيها براحتي.. إنما الخن عشرة وكمان متقفلة فتحس كأنك قاعد جوه بيت ! ##
ما هي أشهر قهاوي وسط البلد والطبيعة الغالبة على رواد كل قهوة منهم؟؟
التكعيبة بيقعد عليها ناس بتوع مسرح ومزيكا وصحفيين ومدونين والخن مسرح وسينما و والندوة الثقافية فيها أدباء وفنانين تشكيليين أما البورصة فأغلب اللي بيقعدوا فيها بتوع المجتمع المدني.. على فكرة هنا بيجي يقعد الأستاذ جورج بهجوري..
في مجتمع وسط البلد كلكم عارفين بعض.. إزاي واحد جديد يدخل وسطيكم؟؟
فعلا كلنا عارفين بعض.. بس لو واحد أمه داعيه عليه بيدخل وسطينا وبسهولة، بيجي ويسأل سؤال، بعديها بيومين ييجي يسلم عليك وبعدين يقعد مع حد منا وبالتالي يبقى دخل وسطينا.. ما انا جيت من 11 سنة علشان كنت عاوز أعمل بروفات مسرح.. مكنتش أعرف حد ودلوقتي بقيت عارف كل الناس!! ##
مثقف وسط البلد نعرفه إزاي؟
كل مثقفي وسط البلد "كاركترات"، يعني لازم تكون الشنطة متعلقة "كروس" وفي مصطلحات لازم تتقال في كلامه ، يعني مايقولكش "إنت إنسان كويس"، يقولك "إنت حد جميل"، "إنت حقيقي قوي" وبنسبة كبيرة مش بيكونوا مفتوحين على الآخرين، وتلاقيهم بيعاملوا واحد كأنه "فان جوخ" وهو مابيفهمش حاجة، بس هو صاحبنا فلازم نظبطه..
وعلى فكرة، مثقف وسط البلد ده إعرف إنه مالوش لازمة، لأن لو كان ليه لازمة مكانش ضيع وقته في وسط البلد، أنا لو أقدر ماجيش وسط البلد تاني مش هاجي، أنا ادمنت المكان والناس، حتى الناس اللي بضحك عليهم أدمنت أجي أضحك عليهم وأمشي.. الأول كنت بخلص شغلي وأروح على طول، دلوقتي بقيت مش بقدر أقوم.. حالة مرضية.
من هم أشهر شخصيات وسط البلد؟
أحمد مكي صاحب قهوة "التعكيبة"، سعد الحرامي أشهر واحد بيبيع فول في وسط البلد وعلى فكرة هو صاحب كل المثقفين من زمان، أحمد مهران صاحب أفتر ايت، وهو فنان جامد جدا وعنده تاريخ وسط البلد كله، عم سيد بواب مسرح روابط، من أهم الناس اللي ممكن تشوفهم في حياتك، تاريخ مصر كله تلاقيه عنده .
شاهد الحوار صوت وصورة .. وفي انتظار تعليقك