عيال جدعان شعارهم : محدش يصرف علينا !

معظم الشباب حاليا - وخصوصا وهم علي أبواب دخول الجامعة بعد كام يوم - يحتاجون لمصاريف كثيرة .. ولكن بعضهم قرر يعتمد على نفسه ويعفي أسرته تكاليفه ، تعالوا نشوف عملوا إيه .
كفاية كده ، أكفي نفسي بقي.. ده كان مبرر أحمد سامح- 20 سنة كلية تجارة- واللي بيقول: والدي صرف علي كثيراً جدا، وبصراحة أنا شايف إني أقدر أكفي نفسي بنفسي، لأن الهم بقي ثقيل على والدي جدا، وخصوصا إنه كان موظفاً وخرج على المعاش، وعندي أخوات صغيرين عايزين مصاريف كثيرة، فقلت أشتغل أي حاجة علشان مصاريفي ومصاريف الكلية والكتب، فأشتغلت في محل ملابس من بداية الإجازة، وكنت أقبض 200 جنيه في الشهر أصرف منهم نصفهم، والباقي معي علشان مصاريف الكلية ، وسأكمل في شغلي عادي حتي الامتحانات.
##
ويقول خالد عز الدين- 21 سنة كلية آداب - : أنا أعتبر مرحلة الجامعة دي علشان أتعلم إزاي اعتمد على نفسي بعد كده ، ووارد جدا إني أتخرج ولا أجد عملاً ، فبدأت من دلوقتي أعتمد على نفسي وأتحمل مسئوليتي، فاشتغلت أكثر من حاجة، وبدأتها في بنزينة ثم في مكتبة، وجمعت مبلغاً علشان الجامعة ومصاريفها، وفي أول شهرين في الدراسة سأواصل العمل وبعد كده أكمل بعد الامتحانات.
##
أما محمد سليمان- 21 سنة كلية تجارة- يقول: أول ما دخلت الكلية أخذت من والدي حوالي خمسة آلاف جنيه، وقال لي إن دي مصاريفي في الجامعة، وقال لي لا تطلب مني مليماً بعد كده، وطبعا المبلغ سهل إنه يتصرف، ففكرت في عمل مشروع بهم، واتفقت مع أكثر من صديق إننا نشترك في المشروع، وفعلا فتحنا محل موبايلات صغير، يعني على قد الكروت وكام موبايل، وبدل ما أقعد أصرف في الفلوس استثمرتها، والمبلغ اللي بيطلع أصرفه على الكتب ومصاريفي الشخصية .
ويقول أسامة فتحي- 20 سنة كلية تجارة : المفروض إني أتحمل مسئولية نفسي من دلوقتي، لأن أهلي لو صرفوا علي النهاردة بكرة مش هلاقي حد يصرف بعد التخرج، فقلت أخدها من قاصرها وأبدأ اعتمد على نفسي، واشتغلت في مصنع وأكسب 300 جنيه في الشهر، والحمد لله بيكفوا مصاريفي ومصاريف الكلية، وبساعد كمان والدي في مصاريف البيت، وبعد التخرج لو مفيش شغل سأكمل في المصنع مؤقتا.
##
أما رضا عبد الراضي- 22 سنة كلية آداب- فبيقول: أنا والدي رجل أعمال وعنده شركة دعاية وإعلان، ولكني قررت إن محدش يصرف عليا، وأعتمد على نفسي في مصاريفي من ساعة ما دخلت الكلية، فاشتغلت من سنة في شركة تانية غير شركة والدي، وأحصل على 375 جنيهاً، وأصرف منهم، بكده أحس إني بجد راجل ومش مستني فلوس بابا وماما ! .
وبيقول سامح محمد- 21 سنة كلية آداب-: ناس كثيرة شايفة بعض شباب الجامعة " تافه " ولا يقدر يتحمل أي مسئولية، لكن أنا شايف عكس كده، وأنا شخصيا قررت اعتمد علي نفسي السنة دي، وبدأت شغل من الإجازة علشان مصاريف الدراسة، وكمان والدي على قد حاله، فقررت أشيل الحمل من عليه من دلوقتي، وأشتغل حالياً في مكتبة أمام الجامعة، وكمان بتنفعني في تصوير الكتب والملخصات، وبجانب كده أحصل علي 270 جنيهاً .
##
أنا راجل ومش عايز حد يصرف عليا.. ده اللي قاله سيد محمود- 20 سنة كلية تربية- واللي بيقول: أنا والدي متوفي، وأمي موظفة، وأنا الابن الأكبر، فلازم أكون رجلاً ومتحملاً للمسئولية، وعلى الأقل مش عايز أحسس والدتي بأي عبء، ومش عايز حد يصرف عليا، وأشتغل حالياً مشرفاً في مصنع زجاج، وأحصل على حوالي 250 جنيهاً .
##