س : هل عصير القصب أفضل من الزواج ؟!

احدث الدراسات التى أجراها المركز القومى للبحوث الاجتماعية والجنائية أكدت أن نسبة العنوسة فى مصر والوطن العربى زادت عن الحد .. لدرجة ان عدد العوانس فى مصر وصل الى 5 مليون عانس .
.
وفى المقابل البنات اللى تعدوا سن الثلاثين أطلقوا شعار" الضرة مش عيب" لأنه مفيش وقت للمبادىء والقيم ، وكلمة " لا " للزوجة الثانية خلاص " إتمسحت بأستيكة " من النوع المستورد .. فالقطار قرب يسيب المحطة والبلد كلها كمان.
دكتورة داليا الشيمى مستشارة العلاقات الزوجية والعاطفية عقدت ندويتن فى ساقية عبد المنعم الصاوى الاولى للبنات بذلت فيهما قصارى جهدها عشان تقنعهم بإن الامل لسه موجود وانه بلاش " يرخصوا انفسهم " .. لكن طبعاً البنات " أذن من طين و أذن من عجين " ، دول عدوا الثلاثين يا جماعة .
الندوة الثانية كانت للشباب .. والله الست الدكتورة كانت شوية و هتبوس أيديهم عشان يقبلوا على الزواج و بلاش شعار " انا عازب وبراحتى" لان الزواج نصف الدين ومشروع ناجح ، وكمان الدنيا اختلفت واللى كان بيحصل زمان من مغالاة فى المهور وتكاليف الزوج خلاص انتهى .. دلوقتى الاب والام ما بيصدقوا يخبط علي بابهم عريس الغفلة اللى هياخد إبنتهم على حصان أو حتي حمار .. مش هيعقدوا الدنيا طبعا..
الموضوع ده فكرنى بواحد بلديتنا كان معاه ربع جنيه ففكر يعمل بيه إيه..
يشرب عصير قصب .. و لا يركب الأتوبيس ؟ فقال : أنا لو ركبت الأتوبيس هيبقي فيه حل من إثنين : يا إما هقف أو هقعد .. ولو وقفت مش هتبقي فيه أي مشكلة
لكن لو قعدت هيبقي فيه حل من إثنين : يا إما هيقعد جنبي راجل أو تقعد جنبي ست .. وأنا لو قعدت بجانب راجل مفيش مشكلة ..لكن لو قعدت بجانب ست هيبقي فيه حل من إثنين : يا إما هنعجب ببعض يا إما مش هنعجب ببعض .. ولو معجبناش بعض مفيش مشكلة .. لكن لو أعجبنا ببعض هيبقي فيه حل من إثنين: يا إما هنتجوز .. يا إما مش هنتجوز .. ولو متجوزناش مفيش مشكلة .. لكن لو إتجوزنا هيبقي فيه حل من إثنين : يا إما هنخلف يا إما مش هنخلف ، ولو مخلفناش مفيش مشكلة .. لكن لو خلفنا هيبقي فيه حل من إثنين : يا إما هنخلف ولد أو بنت .. ولو خلفنا بنت مفيش مشكلة .. لكن لو خلفنا ولد هيبقي فيه حل من إثنين : يا إما ح يستقيم أو ح ينحرف ..ولو إستقام مفيش مشكلة .. لكن لو إنحرف هيبقي فيه حل من إثنين :يا إما يدمن أو مش ح يدمن ، ولو كان عايز فلوس للإدمان هيبقي فيه حل من إثنين :يا إما يسرقني أو يقتلني .. يا خبر أسود .. لا ياعم أنا أشرب عصير قصب أحسن !!
ودلوقتي أيه رأيكم .. الجواز ولاّ عصير القصب ؟!