يااااه .. الله يرحم أيام زمان !

فاكر أيام زمان؟ ارجع بالذاكرة شوية للوراء أيام اللعب وراحة البال ، فاكر الأيام دى ولا أنت نسيت من كثرة الهموم ، حنيت لأيام زمان وبدأت تفتكر بعض الحاجات اللى كانت دايماً متعلقة فى ذاكرتك .. حاجات بسيطة جداً لكنها كانت جواك " رمز " لزمن الروقان والحنين للبساطة ..
تعالوا نفتكر مع بعض .. فاكر الدكة اللى كنت بتقعد عليها فى الفصل، وشخبطتك والكلام اللى كنت بتكتبه عليها، فاكر مين كان قاعد جنبك طول فترة الإبتدائى والإعدادى والثانوى، فاكر أول كتاب قريته وشكل غلافه وكان بيفكرك بإيه، فاكر الألعاب التقليدية اللى كنت بتلعب بيها وانت صغير، فاكر شكل مكتبك والحاجات اللى كنت محتفظ بيها صور زمايلك ومقتنايتك الشخصية، فاكر شكل الإعلانات البسيطة اللى كنا متعودين عليها، فاكر المسلسلات إللى كانت بتلم الأسرة ومكنتش تلاقى ولا واحد فى الشارع، فاكر شكل كتب الدراسة بتاعت زمان، فاكر شكل الشيكولاتة والبونبونى بتاعت زمان، فاكر شكل الأتوبيس القديم اللى كنت بتركبه وانت رايح الجامعة، أكيد إنت دلوقتى دماغك بدأت تروح وتيجى وترجع لورا وتحن لكل شىء بيفكرك بأيام حلوة، وحتى لو انت مش فاكر .. تعالي نفتكر مع بعض .