سأذهب لقداس الميلاد.. تيجى معايا؟

فيه أيام كده بتيجى محملة بأحداث تجعلك تشعر ولو لفترة وجيزة إنك لك جذور.. وإن لك هوية.. وإن لبلدك علم ستبكى بحرقة لو رأيته يهان.. وإن لك صديق مسيحى ياما وقف جنبك فى أزماتك وياما شكيت له وشكا لك، وعمركم ما اتكلمتم فى الدين.. لذلك، عزيزى القارئ قبل أن تتهور وتروح تبلغ عن زوجتك أنها هى المسؤولة عن تفجيرات الكنيسة، افتكر معايا كده: مش زمان لما كنت أنا وإنت فى المدرسة كان أحيانا زمايلنا المسيحيين بيحضروا معانا حصة الدين لأن مدرس الدين بتاعهم غايب النهارده؟.. وفاكر الواد جورج اللى كان قاعد جنبك فى الفصل؟ مش كان بيحفظ الآيات القرآنية المفروضة علينا فى مادة النصوص وابن اللذينا كان موس وكان بيكُر الآيات كَر ويجيب النمرة النهائية وإنت تكوّع؟ طب فاكر لما كنتم بتعملوا نفسكم بتذاكروا سوا عندك فى البيت وأتاريكم قاعدين تشربوا سجاير بينما مامتك ومامته قاعدين بيدعولكم تنجحوا ومايعرفوش خيبتكم القوية؟
طب فاكر لما إنت وهو بكيتوا فى امتحان التفاضل بتاع آخر السنة لأن كان فيه أسئلة خارج المنهج وخرجتوا من اللجنة لقيتوا والدك ووالده مكتفين مدرس المادة فى ركن ونازلين فيه ضرب؟ طب فاكر فى الجامعة لما إنتم الاتنين أُعجبتوا بنفس البنت وإنت جريت جرى تقولها إنه مسيحى عشان تسيبها منه وفى الآخر سكّت عليكم إنتم الاتنين واتجوزت اللى برقبتك ورقبته؟.. وفاكر لما عربيتك عطلت على كوبرى أكتوبر وضحكت عليه وخليته ينزل يزق.. وكانت الدنيا شمس ففضل يزق لحد ما نفسه اتقطع وإنت مستعبط ورافض تبدل معاه، فاكر لما هو بطل زق وراح وقف فى وسط الكوبرى ورفع إيده للسما ودعا: »يا رب يا بتاع المسلمين خده وريّحنى منه«؟..
وفاكر لما كنت بتوصل الشغل متأخر فهو يمضى لك فى الدفتر ولما كنت إنت كمان تمضى بداله فى الدفتر لما يتأخر لغاية ما فتن عليكم ابن الحلال عند المدير فخصم لك وخصم له؟ ولما جدتك تعبت ودخلّتوها المستشفى مش كان بيزورك كل يوم؟ ومش فى الغرفة المجاورة كان فيه جرجس هو كمان جدته كانت تعبانة؟ وجدك اتصاحب على جده وهمه الاتنين عينهم زقزقت على الممرضة الحسناء وقعدوا يتمنوا لو الشباب يعود يوما؟ ويوم ما ابنك ضرب ابنه مش رُحت تبوس على راسه أحسن العيال توقّع بينكم وكنت هتموت تبوس على راس مراته لولا مراتك كانت ناقراك من برج المراقبة؟ طب لما نكون فى الفرح سوا وفى الهم سوا وفى المرض والتعليم والاحتجاجات والاعتصامات سوا.. ده إحنا حتى فى رمضان بنتابع ماراثون المسلسلات سوا.. يصح برضه بعد كل ده تيجى تسأل مين فينا مسلم ومين مسيحى؟..
واسأل نفسك: هل تقدر تغفر لنفسك ذنوبك؟ لو تقدر على هذا وبالتالى لديك القدرة إنك تدخّل نفسك الجنة حدف يبقى من حقك أن تحاسب الآخرين على عقيدتهم أياً كانت.. أما بقى لو إنت زى حالاتى تدع ما لله لله، فأنا ومحمد وفاطمة وخالد سنذهب مع جرجس ومريم ومينا وسنحضر قداس عيد الميلاد، قلت إيه، هتيجى معانا؟