لو عايز تشعر انك على قيد الحياة ..اقرأ هذا الموضوع

عقدت ندوة فى ساقية الصاوى تحت اسم "ابناء ولكن" اتكلمت فيها استاذة هدى طاهر خبيرة التنمية البشرية والعلاقات الاسرية عن ان اصبح اهتمام الاباء بينصب بصورة كبيرة على المشاكل الحياتية من ماكل وملبس وتجارة وبناء مستقبل واصبح الاهتمام بالابناء وبذل جهد زيادة فى تربيتهم اخر حاجة يهتم بها الاباء,,,كلام جميل وكلام معقول مقدرش اقول حاجة عنه لكن لما الموضوع يوصل الى انها تقول لازم الاب والام يحضونوا ابنائهم 8 مرات يوميا يبقى كلام عجيب وكلام موهوم لازم نستفسر عنه.
لذلك كلمنا استاذة هدى طاهر عشان نعرف منها حكاية دراسة الاحضان لكن الموضوع طلع كبير اوى فالدراسة دى اكدت ان الفرد يحتاج الى 4 احضان يوميا كى يشعر بالبقاء فى الحياة و8 احضان يوميا كى يشعر بالانتماء بالاسرة و12 حضن يوميا كى ينمو متزنا جسديا ونفسيا ,, وقتها ادركت ليه دايما بحس انى معقدة نفسيا ,,المهم اتضح ان هذه الدراسة ظهرت طبعا فى بلاد بره لانهم حسوا فى فترة ان اهتمامهم بالعمل والتقدم شغلهم عن الدفىء الاسرى وطبعا الناس دى مفيش حاجة تقع منهم كده فابتدوا يبحثوا ويدورا لحد ما وصلوا لهذه الدراسة اللى بتاكد ان اى فرد عنده نقص فى ارقام الاحضان دى يبقى عنده خلل نفسى على طول من غير كلام , و اى فرد عنده زيادة فى عدد الاحضان يبقى الموضوع قلب عنده لدلع ماسخ له تاثير سىء على شخصيته .
لكن استاذة هدى اكدت انهم وصلوا لنتائج هى موجودة عندنا بالفعل فى معاملتنا الاسلامية التى حث عليها القران والسنة النبوية فمثلا الغرب وصلوا لما يسمى " بقوة الان" بمعنى ان كل فرد يدرك انه زمان كان شىء عادى لكن النهاردة هو افضل يعنى لما تدخل بيتك لازم تكون افضل اب وفى شغلك انت احسن موظف او احسن مدير حتى لوكنت ساعى لازم تكون اشطر ساعى مكتب ,,, لكن كل ده له مردود فى القران والسنة فمثلا الرسول كان يشعر كل صاحبى انه الاحب الىه وكان يشعر كل زوجة له انها الاقرب اليه وانتقل ذلك طبعا الى الصحابة اللى اتربوا على يد الرسول الكريم فلو افتكرنا موقف سيدنا خالد بن الوليد عندما نحاه سيدنا عمر بن الخطاب عن قيادة الجيش فى فتح الشام والناس لاحظت انه كان بيحارب افضل من لما كان قائد الجيش فقال" اننى افتح الشام لله وليس لعمر بن الخطاب".
..
ودراسات الغرب اكدت ايضا على اثر الكلمة على شخصية الابناء وهنا عرفت ليه كل الافلام الاجنبى مليانة بعبارات من نوع " انا فخورة بك , انا سعيدة بكونك ابنى " ,لكن تعالى عندنا هتلاقى عبارات من نوع " انا مش بتاع كلام انا بتاع فعل " وتلاقى الام لو ابن جارتها عندها وكسر طبق " فداك يا حبيبى" لكن بقى لو ابنها اللى كسره " دا انا هطلع عينك" مع ان الاقربون اولى بالمعروف .
الموضوع ممكن يكون افتاكسة لكن منقدرش ننكر انه جيه على الجرح ,, فتعالوا تهتم شوية بعلاقتنا الانسانية ولو 8 مرات فى اليوم بس.....