معجون كلام: القواعد الذهبية للقيادة في شوارع القاهرة الألمعية !

لما كانت القاهرة مدينة مختلفة، لها خصوصية شاملة في كل شيء، وبحثا منا – نحن القاهريون – عن الطرق المثلى للمعيشة بها، والتطور من أجلها،كان لشوارع القاهرة مكانة خاصة في قلوبنا، ففهيا نقضي ردحا طويلا من اليوم، في محاولات لا تكل ولا تمل للوصول إلى ما نصبوا اليه من أماكن، وحتى تصبح القيادةأسهل، قررت أن أوظف خبراتي القاهرية في وضع لائحة تشتمل على أهم القواعد التي يجبعلى أي قائد سيارة في القاهرة يحترم نفسة الإلتزام بها، ولتكون دليل أيضا لمحدثي القيادة وللغرباء عن مدينتنا الغراء.. وإليكم القواعد بالتفصيل..
القاعدة الأولى
انسى فكرة السير في خط مستقيم، في شوارع القاهرة تكون ساذجاً لو سرت في خط مستقيم، يجب أن تسير في خطوط متعرجة وذلك تفاديا للحفر الطارئة والندبات الصاعدة والمهملات الملقاة في الطريق، وماتقلقش، غالبا اللي وراك هيعمل زيك.
القاعدة الثانية
المطبات غير الطبيعية وغير الصناعية هي مكون اصيل للشارع المصري، ولذلك فلو كنت خايف على عربيتك فاعرف انه من الغباء الشديد إنك تجري بها في الشوراع اللي ماتعرفهاش وخاصة لو كنت بليل، فيا اما تمشي براحة، يا إما تشوف واحد وتمشي وراه وتسيب بينك وبينه مسافة كافية، بحيث لو لبس هو المطب يكون عندك فرصة تهدي.
القاعدة الثالثة
إحذر تماما من اللعب مع الكبار، يعني الاوتوبيسات وخاصة اتوبيسات النقل العام، والتريلات والنقل الثقيل، دول ملوك الطريق، ولهم حق الأسبقية دائما، ومهما أخطأوا انت لازم تسكت وإلا هتشوف الويل والثبور وعظائم الأمور، لأن كل سواق فيهم مؤمن بالمقولة الشهيرة "يا ارض اتهدي قبل ما يعدي واحد قبلي"، يعني باختصار تهدي على جنب الطريق لغاية ما التريلا تعدي.
القاعدة الرابعة
لو شوفت عربية ماشية بالراحة ومش على بالها الدنيا باللي فيها اعرف ان اللي سايقاها ست، وساعتها لازم تيجي على بالك الحكمة الشهيرة"يا تهدي يا تعدي"، يعني ماتحاولش تضرب كلاكسات ولا تقلب نور أو حتى تستنى منها إنها تتصرف صح، نصيحة ابعد عنها على قد ما تقدر.
القاعدة الخامسة
مين اللي قال إن الحارة الشمال مخصصة للي عاوزين يجروا؟؟دي معلومة خاطئة تماما، الحارة اليسرى مخصصة للي بيتمشوا، عادة لو عاوز تجري خد الحارة الوسطى، لأن الشمال واليمين بيبقوا ماشيين براحتهم.
القاعدة السادسة
لو عاوز تاخد "يو ترن" على اليمين مثلا، إوعى تغلط وتاخد يمين الطريق، لأن ساعتها هتتأخر جدا لغاية ما تشوف اليوترن، خد أقصى اليسار وتعالى عند الملف واقطع الطريق بكل برود، وهتعرف ساعتها إيه السبب اللي مخلي اللي واخدين يمينهم يتأخروا، لأن بكل بساطة كل الناس بيعملوا زيك وبيقطعوا الطريق من أقصى الناحية التانية، خليك ناصح يا أستاذ.
القاعدة السابعة
من العيب أن تعتقد أن استخدامك للإشارات هو أمر مجدي،يعني لو شغلت الاشارة يمين أو شمال أوعى تفتكر ان حد هياخد بالإشارة دي ويسيبك تعدي، ابسلوتلي، الحل الوحيد يا أستاذ هو إنك تخرج دراعك من الشباك، أو تخلي اللي جنبك يخرج دراعة لو هتدخل شمال، ده نوع من الترابط الحميم مع زملائك من قائدي السيارات، لأنهم بيحسوا انك بتقدرهم وبتطلع ايدك تشاورلهم، إنما لو اكتفيت بالإشارة يبقى إنت ونصيبك.
القاعدة الثامنة
لازم تعتمد على حدسك دائما، لأن العلامات الارشادية غالبا لا قيمة لها، يعني ببساطة ممكن وانت نازل من على كوبري اكتوبر تلاقي واحدطالع قدامك من ع المنزل، عادي جدا، ومش من حقك تعترض طبعا، وبالتالي لازم انت تاخد بالك بدل ما عربيتك تسافر وانت معاها لعالم آخر.
القاعدة التاسعة
جي بي ايه؟؟ اه تقصد جي بي اس؟؟ يا بيه الكلام اللي بتقولهده عيب وحرام، الحجات دي ماتكلش معانا أبدا، احنا بنؤمن بمبدأ اللي يسأل مابيتوهش،وأحيانا بيتوه بردو! وغالبا نصائح الجي بي اس هتخليك تلف حوالين نفسك ومش هتوصل.
القاعدة العاشرة
من الغباء إنك تسيب أي مسافة بينك وبين اللي قدامك،ليه؟؟ لأن ببساطة لو سيبتها هتلاقي واحد رمى بوز عربيته ودخل في مكانك حتى لو كانت حارته ماشية، طيب ليه عمل كده؟؟ أهو غلاسة كده!!
القاعدة الحادية عشر
قاعدة البوز، وهي قاعدة أصيلة قديمة تتلخص في أن منيتقدم ببوز سيارته أولا له حق الأسبقية ولو كان هو أصلا على خطأ، يعني لو الليجنبك رمى بوزه عليه ونجح في كده يبقى هو اللي عدي، لو في تقاطع وواحد رمى بوزه الأول حتى لو الاشارة بتديك انت حق انك تعدي لكن قاعدة البوز أهم وأعلى فالعلاقة بينها وبين الاشارة كالعلاقة بين الدستور والقوانين، تعلوا ولا يعلوا فوقها أحد.. يعني طالما هو رمى بوزه يبقى يعدي، أو كنت تبقى فالح من الأول وترمي بوزك قبله.
القاعدة الثانية عشر
لو وقفت في اشارة لازم تتأكد أولا إنها مراقبةبالكاميرات أو في عسكري واقف جنبها، لو مالقتش حاجة من الاثنين اللي فاتوا اعرف ان الاشارة دي ديكور وإن قاعدة البوز السابقة هي التي يتم تنفيذها في هذا المكان.
أما لو كانت الاشارة مراقبة، فخد بالك، ساعات الاشارة بتعلق، فلو لقيتها قفلت فترة طويلة بص على باقي الشوارع المتقاطعة، لو لقتيتها قافله عندهم هم كمان يبقى عدي على بركة الله وانت مطمن إن الاشارة علقت ومش هتصورك، طبعا أشهر اشارة بتعلق هي اشارة روكسي.
القاعدة الثالثة عشر
لو سمعت وراك سارينة اسعاف أو مطافي أو بوليس ماتتسرعش وتفضي المكان، اطلع براسك من العربية وبص وراك، في 80 % من الحالات مش هتلاقي لا عربية اسعاف ولا مطافي ولا بوليس، هتكون عربية زيك تمام مركبة سارينة يا ولدي وانت مش واخد بالك ففكك منها.
القاعة الرابعة عشر
طيب لو لقيت ان السارينة حقيقية وان هناك عربية اسعاف مثلا؟؟ يبقى هنا عندك معركة لو كسبتها هتبقى من الأحرار اللي تغلبوا على الزحام، ساعتها خلي الاسعاف تعدي وارمي بوزك وراها عدل وخليك لازق فيها يمين في شمال على طول، لأن الطريق هيفضى ليها وبالتالي ليك إنت كمان، إوعى تضيع الفرصة دي.
القاعدة الخامسة عشر
كما أخذت حزرك من التريلا، لازم تاخد حزرك من التوك توك والموتسيكلات خاصة الصيني منها، لأن اللي بيسوقوها غالبا عيال مش فارقة معاهم حاجة وأبسط حاجة عنده إنه يخبطك وهو مش هيحصله حاجة وانت مش هتعرف تطلع منه بحاجة.
القاعدة السادسة عشر
في السيارات الملاكي تحذر من نوعين، فيات 128 و شاهين، غالبا اللي سايقهم بيكون فاتح صدره ومش هامه حاجة، حاجات عربيته بتلاته جنيه ولو اتخبط مش هيحس بتمنها إنما إنت هتعيط على اللي حصلك، فابعد عنهما قدر المستطاع.
القاعدة السابعة عشر
غالبا اللي بيعدوا الشارع مش بيبصوا للعربيات، يعني هم عندهم ثقة إنك إنت اللي هتتفاداهم، ماهو مش معقول يعني تبقى عاوز تخبط واحد معدي في أمان الله، وعلشان كده تلاقي اللي بيعدي بيبص قدامه مع ان العربيات جايه من جنبه، وإعى تفتكر انه هيجري علشان ماتخبطوش، انت واهم، التقل صنعة يا مان!!
القاعدة الثامنة عشر
النور، هناك أصول لاستخدام نور سيارتك، يعني غالبا غير مسموح غير باستخدام الأنوار إلا في اضيق الحدود، خلي بالك الشوراع ضلمة والناس نظرها ضعيف ولما بتشغل نورك بتعمي اللي قدامك واللي جاي في وشك، لازم تكون زوق وتشغل نور السهراية بس على أقصى تقدير.
أما بقى لو حد وراك شغل النور ، قدامك حل من اثنين لا ثالث لهما، الأول إنك تسيبه يعدي، وتيجي وراه وتضرب العالي، الثاني إنك تقلب مراياتك بحيث ان النور ما يضايقاكش ولا تشوفه وتهدي وتسيبه ياكل في نفسه، عادي على فكرة.
القاعدة التاسعة عشر
لا تفقد الأمل سريعا لو لقيت الطريق زحمة، لو لقيت الطريق واقف فجأة فكده هناك احتمالات موثوق في أحدها، الأول ان تكون عربية بايظة فموقفه الطريق، الثاني ان فيه لجنة، الثالث ان فيه حادثة يا اما على ناحيتك يا اما الناحية الأخرى والناس بتتفرج، الرابعة ان يكون في الطريق موقف ميكروباصات والسواقين طالعين سادين الطريق علشان يحمّلوا، الخامسة إن هناك عربيات كاروا واقفه في نهر الطريق تبيع بطيخ مثلا وهذا حادث بالفعل أمام قصر القبة، السادسة إن بنت جميلة - وساعات كتير بتكون مش جميلة - واقفة مستنيه تاكسي واللي بيعدوا بيعرضوا عليها بكل أدب وذوق وشهامة إنهم يوصلوها!!
القاعدة العشرون
مين اللي قال إن الكلاكس يسبب الإزعاج وممنوع استخدامه إلا في أوقات الضرورة؟؟ في مصر الكلاكس أحد أهم طرق التواصل والكلام بين البشر، فهو لا يقتصر على كونه آلة تنبيه كما ظن المخترع الأول للسيارة، الكلاكس بتشكر، تشتم،تحب، تغلس، تصوت، تعترض، بيه ومآرب أخرى، لازم تتعلم الشفرة بتاعته علشان تفهم غيرك بيقولك ايه وعلشان كمان تقدر تتواصل مع الآخرين في عالم الأسفلت.