أحلقي شعرك يا بثينة

طبعا أنا عارفة أن الجو العام الذى تعيشه مصر هذه الأيام لا يحتمل اى افتكاسات خالص لكن الواحد ساعات بيكون قاعد ولا به ولا عليه وتيجى الافتكاسات من المشهد السياسى نفسه , الموضوع وما فيه أن الإعلامية بثينة كامل طالبت نساء مصر بحلق رءوسهن اعتراضا على الدستور الجديد.
بصراحة أنا أول ما قريت تعليق الإعلامية الكبيرة على تويتر أخذت وقت عشان استوعب هى بتتكلم جد ولا هزار ولكن لقيتها بتقول " هنمشي في الشوارع عراة الرأس لنُعرى الضمائر.. رءوسنا الحليقة صفعة على وجه مجتمع أهدر حقوقنا وحقوق فئات كتير لما وافق وسكت وأقر و"صهين" على تزوير وانتهاكات حصلت في الاستفتاء وقال: أخيراً هذه هي الديموقراطية" , وبعد كده لقيت الكلام بيكلكع " ديمقراطيتكم العرجاء لن نقبلها.. لن نقبل بتزوير إرادة الشعب بالتجهيل والتخويف من الفوضى وباسم الشريعة واستغلال احتياج الفقراء وبكل أشكال التزوير سواء المباشر في الصناديق أو غير المباشر في العقول" وقتها اكتشفت ان الكلام جد الجد وبدأت أفكر فى الاقتراح وأتخيل المنظر العام .
وأنا بتخيل قابلت ناس اصحابى فعرضت عليهن الفكرة وكان الرد مش لطيف خلاص واحدة منهن قالت لى ماشى ابدأى أنت الأول وإحنا نمشى وراكى ونقول العبيطة اهى , وبعد هذا الرد بصراحة بدأت أتردد شوية واحسبها كويس ووجدت ان مثلا لو نفذت الاقتراح هقدر أوفر فى الشامبوهات والكريمات والحبشتكنات بتاعت البنات وكمان المعاكسات هتقل -إن كان دى فيها شك - يعنى حتى لو حلقت قرعة هيطلع لى واحد يقول لى "احبك يا اقرع " دا غير ان البرادعى وقتها هيحس إن ليه عزوة , وبعد ما دخلت فى مود الاقتراح صوت من بعيد ندانى وقال لى " شعر المرأة هو تاجها" انا طبعا مش هنكر إن فى ستات كتير شعرهن عايز الحرق مش الحلق لكن متوصلش إن امشى زلبطة كده , طب يا أستاذة بثينة مفيس اى بديل يعنى مينفعش مثلا الستات متطبخش متغسلش وكمان يا أستاذة بثينة اقتراحك ده هيخلى الستات اللى معترضين على الدستور يقلبوا اخوان مسلمين وش .
انا مش عايزة أجهض الفكرة وخلاص لذلك أطالب الإعلامية الكبيرة بثينة كامل إنها تحلق شعرها هى الأول عشان منحسش انه نظام تدبيس وخلاص .. ولا إيه رأيكن؟