بتصرف فلوسك في إيه ؟!

معروف إن الشباب مصارفهم كتير.. وسواء كان لسه بياخد مصروف أو بيشتغل ، يا تري بيصرف فلوسة في إيه ؟! ...وهل في آخر كل شهر يحتاج إلي معونة إضافية ولا بيقضيها وخلاص ... تعالوا نشوف...
أحمد عيسي- 20سنة كلية تجارة- قال: أنا طبعا لسه باخد مصروف وطبعا لأني لو أخدته كله مرة واحدة يعني بالشهر هيتصرف في أسبوع بالكتير، وعشان كده مجبر إني احصل عليه كل أسبوع ، وكالعادة أول 3 أيام في الأسبوع بيكونوا احلي أيام بعد كده ممكن اقضيها وأحيانا أضطر اني اقعد في البيت لحد ما يخلص الأسبوع لكن عموما فلوسي بصرفها في حاجات معينة ودي أساسية بالنسبة لي، زي البلاي ستيشن وشحن الموبايل والخروجات أو القعدة علي أي كافية مع أصحابي ولكن ممكن تتحول في نهاية الأسبوع من كافيه لقهوة عادية عشان الفلوس قلت طبعاً .
أما أحمد فوزي- 21 سنة كلية آداب- فقال : أكتر حاجه أضيع فيها فلوسي المواصلات مش عارف ليه يمكن لأني مش بعرف اركب الأتوبيس وعلي طول مقضيها تاكسي وبعدها ييجي في المرحلة التانية الأكل لأني طبعا طول النهار بره البيت ومع أصحابي فمن الطبيعي إني أكل بره وعشان كده كل فلوسي رايحه علي الأكل والمواصلات لدرجة أن ممكن أصرف لي في الشهر 300 جنيه بين الأكل والمواصلات بس!!
سعد الدين أحمد- 22 سنة كلية تجارة- بيقول: أنا بقي من الوادي الجديد لأني قاعد في القاهرة بمفردي فأكتر حاجه اصرف عليها هي الأكل لأني طول النهار خارج البيت وطبعا مصاريفي في الشهر تتجاوز ال500 جنيه والانترنت ياخذ مني فلوس كتير لاني من عشاق البحث والمحادثات علي الانترنت وبالتالي ممكن أصرف شهريا مالا يقل عن 100 جنيه للانترنت
أما هشام ابراهيم- 21 سنة – فبيقول أنا فلوسي بتتصرف علي الانترنت والبلاي ستيشن وممكن السينما لأنها في الصيف طبعا الخروجة الأساسية بعد الكافيهات., وفي الصيف تختلف المصاريف عن ايام الدراسة لأن في الدراسة بتروح علي التصوير والملخصات ولكن في الصيف المصاريف أكتر لأني أخرج كتير واحيانا كل فترة أسافر الي الاسكندرية أو السخنة وبالتالي أحتاج الي مصاريف كتير .
اللي جاي على قد اللي رايح..ده اللي قاله إسلام أنيس- 23 سنة كلية تجارة- وبيقول: أنا باخد مصروف حوالي 150 جنيه، وكمان بشتغل والله بحوالي 200 جنيه في فترة الصيف، وكله رايح على الأكل، والقهوة، والنت، والسجاير، فأنا شاب ومحتاج أصرف أكيد، بس أعمل ايه بقي ، دا أنا حتى ببقي محتاج حد يكملي مصاريفي في نص الشهر.
وبيقول محمد حسام الدين- 22 سنة كلية تربية-: المصاريف بتختلف في كل وقت، ففي فترة الدراسة الفلوس رايحة على الملابس في البداية وبعد كده الكتب والملخصات، والأكل والمواصلات، وفي الصيف الفلوس بتضيع على السهر والكلام ده ، فبصرف في فترة الدراسة حوالي 350 جنيه في الشهر، أما في الصيف فحوالي 300 جنيه.